Read obolo Neyem 12 Bible Online

Neyem 12 - obolo bible

Neyem 12

¹Ebi ngwugwa mè ebi otoko kè Libai ìgọgọọk Jerubaben gwun̄ kè Sialitien mè Jesuwa inan̄a mè usun̄ akọn̄ ika ire echi: Seraya, mè Jerimaya, mè Ejira,

²mè Amariya, mè Maluk, mè Atus,

³mè Sekanaya, mè Reyum, mè Meremot,

⁴mè Ido, mè Ginetọn, mè Abija,

⁵mè Mijamin, mè Mayadia, mè Biliga,

⁶mè Semaya, mè Jioyaribu, mè Jedaya,

⁷mè Salu, mè Amok, mè Ilikiya mè Jedaya. Ebibi ere ebi ibot inyi ebi ngwugwa mè ebi melek kiban̄ me ukot kè Jesuwa.

⁸Ebi otoko kè Libai ìre Jesuwa, mè Binuwi, mè Kadimien, mè Serebiya, mè Juda, mè Mataniya. Mataniya mè ebi melek kan̄ ere ebi ibot me lek ikọkọt okwa mè itọtọn̄ Awaji me Uwu Mbuban.

⁹Ebi melek kiban̄, ìrere Bakubukia mè Uni, ekikeke ibene isi ida Mataniya me mgbọ ekikọt okwa.

¹⁰Jesuwa ore nte kè Joyakim, Joyakim onenire nte kè Eliasibu, Eliasibu onenire nte kè Joyada,

¹¹Joyada orere nte kè Jonatan, Jonatan onenire nte kè Jaduwa.

¹²Me ukot mgbọ Joyakim orebe ogwu òban Awaji, ebibi ere ebi ibot me owot iman ebi ngwugwa: Meraya onan̄a me owot iman kè Seraya; Ananiya onan̄a me owot iman kè Jerimaya;

¹³Mesulam onan̄a me owot iman kè Ejira; Jeyoyanan onan̄a me owot iman kè Amariya;

¹⁴Jonatan onan̄a me owot iman kè Maluk; Josefu onan̄a me owot iman kè Sebaniya;

¹⁵Adina onan̄a me owot iman kè Arim; Elikai onan̄a me owot iman kè Merayot;

¹⁶Jekaraya onan̄a me owot iman kè Ido; Mesulam onan̄a me owot iman kè Ginetọn;

¹⁷Jikiri onan̄a me owot iman kè Abija; Pilitai onan̄a me owot iman kè Miniamin mè Mowadia;

¹⁸Samuwa onan̄a me owot iman kè Biliga; Jeyonatan onan̄a me owot iman kè Semaya;

¹⁹Matenai onan̄a me owot iman kè Jioyaribu; Uji onan̄a me owot iman kè Jedaya;

²⁰Kalai onan̄a me owot iman kè Salai; Eberi onan̄a me owot iman kè Amok;

²¹Asabiya onan̄a me owot iman kè Ilikiya; Netanen onan̄a me owot iman kè Jedaya.

²²Me ukot mkpulu kè Dariọs òso iba, ogwu ubọọn̄ Pesia, mîge erieen̄ ebi ibot owot iman ebi otoko kè Libai mè ebi ngwugwa me ukot kè Eliasibu, mè Joyada, mè Joyanan, mè Jaduwa.

²³Egege erieen̄ ebi ibot otoko kè Libai itap me ikpa mfufuk usen me usen mege inire ukot kè Joyanan gwun̄ gwun̄ kè Eliasibu.

²⁴Ebi ibot otoko kè Libai ìre Asabiya, mè Serebiya, mè Jesuwa gwun̄ kè Kadimien, mè ebi melek kiban̄. Îre ebibi ekikeke ibene isi ida ebi ngwan̄ me Uwu Mbuban mgbọ ekikọt okwa itọn̄, agan̄ ge isibene okwa itọn̄, agan̄ keyilọ îra ibọkọ, ike Debit ogwu ikwaan̄ Awaji odọmọbe ibe ekerọ.

²⁵Mataniya, mè Bakubukia, mè Obidaya, mè Mesulam, mè Talimon, mè Akubu ere ebi ìkibem otunchit ìkikpọ chieen̄ me lek otutuuk uwu isun̄-inu òkup me otunchit ama.

²⁶Îre ema ekpọ chieen̄ me otunchit me ukot kè Joyakim gwun̄ kè Jesuwa, gwun̄ kè Josadak, mè ibem si me ukot kè Neyemaya ogwu mkpulu, mè Ejira ogwu ngwugwa mè ogwu uti ikpa.

²⁷Mgbọ ebefaka mgban ama Jeruselem itap me ubọk Awaji, egwegween̄ ebi otoko kè Libai inan̄a me ere geelek ema elukbe ibe enu enegọọk erọ orirọ ya, mè esa mkpamkpa, mè uneen̄ ile, mè uneen̄ ija, enu enekọt okwa itọn̄, mè ekwak nkwukwak, mè enwọọn̄ unwọọn̄ erie ijọk ifafaka mgban ama ya itap me ubọk Awaji.

²⁸Mîgween̄ si ebi ìkọt okwa geelek ìluk me asabọn ama cha òkup iriaak Jeruselem, melek bọn ama ebi Netofa,

²⁹mè ebi ìnan̄a me Bet Giligan, mè ebi ìnan̄a me agan̄ Geba mè agan̄ Ajimabet. Ebi ìkọt okwa chi mînama asabọn ama ikana Jeruselem inyi lek kiban̄.

³⁰Ebi ngwugwa mè ebi otoko kè Libai enenigwọk lek kiban̄, mè inigbama lek otutuuk otunchit melek mgban ama ya.

³¹Emi nneniria ebi ibot Juda ibe enene ekeke me inyọn̄ mgban ama ya, mè inidọmọ ọgbọn̄ ebi ìkọt okwa iba ibe ekekọt okwa itọn̄ esa ekeje me inyọn̄ mgban ya ekana ama ya. Ebi ọgbọn̄ ge ekije ifo agan̄ ulom, ikifo otunchit Ifin Anam.

³²Osaya melek ìkike iba ebi ibot ido Juda ekekigọọk ema me udun̄,

³³melek Ajariya, mè Ejira, mè Mesulam,

³⁴mè Juda, mè Benjamin, mè Semaya, mè Jerimaya,

³⁵melek usini ebi ngwugwa ebi ìkaan̄ otita me ubọk, melek Jekaraya gwun̄ kè Jonatan, gwun̄ kè Semaya, gwun̄ kè Mataniya, gwun̄ kè Mikaya, gwun̄ kè Jakuru, gwun̄ kè Asafu,

³⁶mè ebi melek kan̄, Semaya, mè Ajaren, mè Milalai, mè Gilalai, mè Mayi, mè Netanen, mè Juda mè Anani, melek nkwukwak kiban̄, ike Debit ene Awaji odọmọbe. Ejira ogwu uti ikpa okije me isi kiban̄ otutuuk ene.

³⁷Mgbọ ema ejebe ire otunchit Ogbuuruk, ema enenene otitop isi agan̄ ama kè Debit me ere ekinene itoon̄ me inyọn̄ mgban ya, mè ije iraka me inyọn̄ uwu kè Debit isi ire otunchit Mudim me agan̄ mbum-ura.

³⁸Òso ọgbọn̄ ebi ìkọt okwa iba eje ifo agan̄ ujit. Emi nkekije igọọk ema me udun̄ me inyọn̄ mgban ama ya, otutuuk ebi Ijeren kechilọ ekekigọọk emi me udun̄. Eji ejeje iraka uwu-oket Orioon̄ Fituru, mè ije isi ire lek Uwele Mgban,

³⁹mè ije isi iraka otunchit Iferem, mè otunchit Jesana,[13] mè otunchit Irin̄, mè uwu-oket Ananeli, mè uwu-oket Efit, mè isa ikeya isi ire otunchit Arọọn̄. Ije kiji oneniyaka me otunchit Ebi M̀bem eyi ekije iraka inin̄ Uwu Mbuban.

⁴⁰Ọgbọn̄ ebi okwa iba ìkikọt okwa itọn̄ cha eneninin̄ Uwu Mbuban Awaji, mè isi isiki ikweek me irek esun̄be inyi ema. Emi melek ìkike iba ebi ibot cha egọgọọk ema inin̄ emen uwu ya si, mè isiki ikweek.

⁴¹Ebi ngwugwa cha, Eliyakim, mè Maseya, mè Miniamin, mè Mikaya, mè Elioyenai, mè Jekaraya, mè Ananiya, eraraka si inin̄, melek otita kiban̄ me ubọk.

⁴²Maseya, mè Semaya, mè Elieja, mè Uji, mè Jeyoyanan, mè Malikija, mè Elam, mè Ejeri eraraka si inin̄. Ebi okwa cha ekekikọt okwa igọọk ubọk Jejiraya otọbe inyi ema.

⁴³Me usen ya, mîgwa owuwa ngwugwa, mè inwọọn̄ unwọọn̄, mije, Awaji îtap ikpele unwọọn̄ ijot ema ejit. Ebibaan̄ mè nsabọn̄ mîgọọk inwọọn̄ si unwọọn̄ enenen. Okput unwọọn̄ kiban̄ me Jeruselem otataan̄ ijọn̄ọ ere enenen.

⁴⁴Me mgbọ ya, mîsan̄a usini ebirieen̄ ibe ekpọ chieen̄ me lek inyinyi geelek, mè adasi mfut, mè irek ge me akọp irek, echi ebi ene esabe inu me uwu isun̄-inu. Inu geelek erọkọbe me uko me ama geelek, ebesasa oke inu Ikan kè Mosis odobe inu initap me emen uwu isun̄-inu. Inyinyi cha ìkup inyi ebi ngwugwa mè ebi otoko kè Libai, mije, otutuuk ebi Juda mîbele ejit me lek ikwaan̄ ema erọbe.

⁴⁵Ema mîrọ ikwaan̄ inyi Awaji kiban̄, mè irọ si ikwaan̄ igwọgwọk lek. Ikeya si, ebi ìkọt okwa mè ebi ìkibem otunchit mîrọ si ikwaan̄ eyi kiban̄ igọọk me ikan Debit mè Solomọn ogwu gwun̄ enyibe.

⁴⁶Bene me karake ukot ogwu ubọọn̄ Debit mè Asafu ogwu òkọt okwa, îre ebi ibot okwa ekidọmọ okwa ebekọt isa ikitọn̄ Awaji, mè okwa ebekisa ibe Awaji onirọ.

⁴⁷Mije keyi, me ukot kè Jerubaben mè Neyemaya, otutuuk ebi Ijeren ekinyi ebi ìkọt okwa mè ebi ìkibem otunchit Uwu Mbuban inyinyi òboso ema me usen me usen. Mîkiche si inu inyi ebi otoko kè Libai kechilọ. Ebi otoko kè Libai isibọkọ inyinyi cha, ema mîra inifele si me lek inyi ebi owot iman kè Erọn, ebi ngwugwa.