Read obolo Neyem 13 Bible Online

Neyem 13 - obolo bible

Neyem 13

¹Me usen ya, mîfuk Ikpa kè Mosis isibi me utọn̄ otutuuk ene. Enenimun̄ egebe me emen Ikpa ya ibe mè ogwu Amọn mè ìre ogwu Mowabu geege ikanin̄ emen ntitiin̄ ebi eyi Awaji mege ire mgbọ ikakaan̄ge itata,

²mije, mgbọ ebi Ijeren ekinan̄a me Ijipiti isibi, ema kpesa inorie mè mudim ijet ema me oniin̄. Kpan̄asi ikeya, ema esisi igwen Balam me ọkọ ibe inifieek otu inyi ebi Ijeren. Ubọk geelek si, Awaji kiji onenigwu ufieek-otu ya ikana ugbana.

³Mgbọ ebi ene enọbe ikan keyi, ema esasan̄a otutuuk ebi ichen isibi me etete ebi Ijeren.

⁴Sabum mgbọ ya, mîra itoto Eliasibu ogwu ngwugwa ibe ikikpọ chieen̄ me lek uwu isun̄-inu òkup me emen uwu Awaji kiji. Ọmọ melek Tobaya ebekigbaan̄ ikwaan̄ isi.

⁵Eliasibu onyinyi Tobaya irek me emen agwut ile ge ere ewuukbe lek ikisun̄ akpa ebi ene esabe inu, melek nsensi, mè owuwa nroon̄ Uwu Mbuban, melek irek ge me akọp irek eyi akpa, mè eyi aya miin̄, mè eyi aran̄ olifu. Inyinyi chi ìkup inyi ebi otoko kè Libai, mè ebi ìkọt okwa, mè ebi ìkibem otunchit, mè ikup si inyi ebi ngwugwa.

⁶Mgbọ inu yi okimọnọ irek, emi ǹkakup me Jeruselem, mije, me emen òso akọp acha ita mè iba me lek mkpulu kè Atejakisis ogwu ubọọn̄ Babilọn, ngwu ikom igọọk ogwu ubọọn̄ isi ikup. Sọntiik mgbọ iraraka, mbọbọkọ unye me ubọk ogwu ubọọn̄,

⁷mè igwu ikom ika inu Jeruselem. Îre mgbọ ya ke nnọ inu ofolek ijo inu ya, eyi Eliasibu orọbe, eyi îsan̄abe agwut ge me oyet egep uwu Awaji isa inyi Tobaya ibe inin̄ iluk.

⁸Inu yi ofefieek emi me lek enenen, mè inaan̄ emi ejit, mkpukpulu nroon̄ uwu kè Tobaya itọọn̄ isibi me emen agwut ya igwook me oyet.

⁹Nneninyi ida ibe egbama lek agwut ya. Mgbọ egbamabe isan̄a, nnenikpulu nroon̄ uwu Awaji melek inyinyi akpa mè nsensi cha itap me emen.

¹⁰Nnọ si ibe ke kpeyaka ikinyi ebi otoko kè Libai uche inu òkup inyi ema, mije keya, ke otutuuk ebi otoko kè Libai, mè ebi ìkọt okwa cha ebi ìkikpọ chieen̄ me lek ikwaan̄ me Uwu Mbuban, mîtele ikwaan̄ kiban̄, mè igwu ikom isi ikiwop uko kiban̄.

¹¹Nnenigana ere inyi ebi ibot mkpulu, mè ido ema ibe, “Keke orọ mè enyi ejuuk uwu Awaji etele ikeyi?” Nnenigwen ema ititiin̄, mè inito ema me irek ikwaan̄ kiban̄.

¹²Otutuuk ebi Juda esasa irek ge me akọp irek echi akpa, mè echi aya miin̄, mè echi aran̄ olifu inu initap me emen uwu isun̄-inu cha.

¹³Nnenito Selemeya ogwu ngwugwa, mè Jadọk ogwu uti ikpa, mè ogwu otoko kè Libai ge ekigwen Pedaya me ibot ebi ìkikpọ chieen̄ me lek otutuuk uwu isun̄-inu cha, mè inisa Yanan gwun̄ kè Jakuru, gwun̄ kè Mataniya, irọ ogwu òkitap ubọk inyi ema, mije, ebirieen̄ chi ìre ebi ìkirọ atikọ. Ema ere ebi ìbekiche inyinyi chi inyi ebi ngwan̄ kiban̄.

¹⁴Jei Awaji n̄a, keek emi mije inu yi, mè kachieek ibe ikwaan̄ nsabe otutuuk ejit n̄a isi, mè otutuuk kwulukwulu nkwukwulube me uwu kwun̄, ichep me ikike.

¹⁵Me mgbọ ya, nnenimun̄ ibe ke ebi Juda ekichimi miin̄, mè ikibeen̄ owuwa akpa akpa, mè miin̄, mè gerep, mè figi, mè owuwa ofifi chieen̄ akpan itoon̄ me inyọn̄ udun̄ owuwa inyinya akpan isa ikije inin̄ emen ama Jeruselem me Usen Mbuban. Ntataba ema ubọk me utọn̄ ibe ekayaka ìkpọk ìnyam inorie me Usen Mbuban.

¹⁶Ebi Taya ìluk me emen ama Jeruselem ekekisa irin̄, mè kpa chieen̄ inu mbit ewe geelek inin̄ emen ama Jeruselem ininyam inyi ebi Juda me Usen Mbuban.

¹⁷Nnenikan̄ inu inyi ebi ibot Juda, mè ibe ema, “Enyi ba mêkichaka ikan Usen Mbuban! Ìre kpasi ikpak ikpak inu ke enyi ekirọ ikeyi?

¹⁸Ìre ìkafat ìre inu chi geelek ke ebi nte nte kinyi erọ, eyi Awaji osabe otutuuk ufialek kechi inikeme eji, mè ikeme si ama yi? Mgbọ keyi, eyi enyi ekichaka ikan Usen Mbuban, enyi ba mêkirọ inu òbosa ofifi unaan̄-ejit Awaji inu me Ijeren.”

¹⁹Eya orọ, nnyinyi ida ibe, bene me mgbọ yi nyi isi, me usen òbowele Usen Mbuban, sabum egwe obofit, egon otutuuk otunchit ama, mè ekagwuku geege mege Usen Mbuban môrakabe. Ntoto si usini ebi ikwaan̄ n̄a me otunchit geelek, inyi ene geege ìkabeme akpan ìsa ìraka ìnin̄ emen ama me Usen Mbuban.

²⁰Ebi mbit mè ebi ìkinyam kpa chieen̄ nroon̄ ewe ebabia me udun̄ ama Jeruselem usen inen mè inen me mgbọ ya.

²¹Nnenisi igana inyi ema ibe, “Keke ke enyi ekup me udun̄ mgban ama yi ikirọ me eririeen̄? Ire mkpọk imun̄ enyi me ere yi ofifi, mâtet enyi ire ubọk.” Bene me mgbọ ya, ema kpeyaka ikinu me Usen Mbuban.

²²Nneninyi ebi otoko kè Libai ida ibe egwọk lek, mè esi ebem otunchit geelek, inyi Usen Mbuban ikup me mbuban. Jei Awaji, nye lek keek emi mije ata inu keyi si, mè rọ emi nsan sa me ikpele imumechieen̄ kwun̄.

²³Ògak ge, me mgbọ ya, mmun̄ owuwa ebirieen̄ ebi Juda ebi ìdodo ebibaan̄ Asidọdu, mè Amọn, mè Mowabu me lek nwa.

²⁴Inu òso ìkike iba me lek nsabọn kiban̄ ekitumu usem Asidọdu, mè ìre ge me lek usem ebi ofifi ife, ire, kperiọọn̄ itumu usem Juda.

²⁵Nkakan̄ inu inyi ema, mè ifieek otu inyi ema. Nsulu usini kiban̄, mè ijibi ijeek me ibot kiban̄, mè itet ema ibe esa erieen̄ Awaji enyan̄a ibot, mè itumu inyi ema ibe, “Ikayaka ìsa bọn ebibaan̄ kinyi ìche olom ìnyi bọn ebirieen̄ kiban̄, ikayaka ìdo si bọn ebibaan̄ kiban̄ ìnyi bọn ebirieen̄ kinyi me lek nwa, enyi me lek kinyi si, ikado ema me lek nwa.

²⁶Ìre ìkafat ìre mbet ido-nwa òkup ikeyi ke Solomọn ogwu ubọọn̄ osa irọ ijo inu? Me etete owuwa ido, kpunu ogwu ubọọn̄ òbet lek kan̄, ogwu Awaji omun̄be me chieen̄, mè isa ọmọ irọ ogwu ubọọn̄ òkikpulu otutuuk Ijeren. Ikerere Solomọn me lek kan̄, ebibaan̄ ofifi ido mîrọ inyi irọn̄ inin̄ me ijo inu.

²⁷Ìre enyi ekiweek ibe eji enọ si ibe ke enyi si mîsi ido ebibaan̄ ofifi ido me lek nwa, mè isa me ikeya irọ ikpele ijọ inu keyi, mè ikpaka ibot inyi Awaji kiji?”

²⁸Mgbọ mmun̄be ibe ke ene ge me lek bọn ebirieen̄ kè Jeyoyada, gwun̄ kè Eliasibu ogwu òban Awaji ìre ugot kè Sambalat ogwu Orọn, nrerieen̄ Jeyoyada isan̄a me agba lek n̄a.

²⁹Jei Awaji n̄a, keek ema, mije ema echakabe ikan owot ebi ngwugwa, mè ifiat si inyan̄a-ibot ebi ngwugwa mè eyi ebi otoko kè Libai.

³⁰Nnenigwọk lek ebi ngwugwa mè ebi otoko kè Libai, inyi mbuban òchaka ema me lek bak me lek ebi ofifi ido ita ema me lek, mè inidọmọ ikwaan̄ inyi ema, mè iniria ema ito me irek ikwaan̄ kiban̄.

³¹Ndọmọ si ibe ebi ene ekesa otitip iye mè adasi mfut kiban̄ enu enenyi me mgbọ mgbọ kiban̄ isire. Jei Awaji n̄a, soso, keek emi, mè rọ emi jaan̄!