Read obolo Neyem 2 Bible Online

Neyem 2 - obolo bible

Neyem 2

¹Me emen onyan̄ Nisan,[2] me òso akọp acha iba me lek mkpulu ogwu ubọọn̄ Atejakisis, ogwu ubọọn̄ onenikweek irek me lek ikasi. Mgbọ esabe miin̄ inu, emi mbeben miin̄ ya itọkọ inyi ogwu ubọọn̄. Ǹkawuwuuk lek ìkitaka isi me isi ogwu ubọọn̄ mgbọ geelek nkisi ikwaan̄ inyi.

²Eya orọ, ogwu ubọọn̄ ododo emi ibe, “Keke orọ okitaka isi ikeyi, me ere òkafafiak orukan̄ geege? Ìkalọlọ owu ora ikaan̄ uga ufieejit me ejit.” Owot îfieek emi enenen mgbọ ogwu ubọọn̄ odobe emi ikọ ya.

³Ire, nnenitumu inyi ogwu ubọọn̄ ibe, “Ogwu ubọọn̄, luk ugwem jọn̄ọ! Keke orọ m̀kpatakabe isi? Ama kiji ere efuun̄be ebi nte nte n̄a îkana ǹrioon̄, ukan̄ îtaka otutuuk otunchit kan̄ ikọọk.”

⁴Ogwu ubọọn̄ onenibe emi, “Keke ke oweek?” Nrariaak uriaak inyi Awaji òkup me inyọn̄,

⁵mè inifọọk ogwu ubọọn̄ ibe, “Ire ineme owu ogwu ubọọn̄, ire emi ogwu usun̄ kwun̄ nkaan̄ nnwọn-isi me isi kwun̄, nye lek ria emi si ama ere efuun̄be ebi nte nte n̄a me ido Juda, inyi ǹsi m̀kpọk ǹnama.”

⁶Nwa ogwu ubọọn̄ òwa si me ere ya osikibe ikweek irek me agba lek ogwu olom. Ogwu ubọọn̄ onenido emi ibe, “Ikwaan̄ ya ìboben owu ire mgbọ owa? Mgbọ owa ke oboyaka ika?” Ike înemebe ogwu ubọọn̄ ibebe emi ǹsi ije ya, mfefieek si mgbọ inyi.

⁷Nnenibeek ogwu ubọọn̄ ibe, “Ire ineme owu, ogwu ubọọn̄, nye lek ge ikpa nyi emi ǹsa ǹnyi ebi mkpulu ìkup me agan̄ usaba okwaan̄ Yuferetis, inyi ema etele mè ǹraka me oniin̄ agan̄ kiban̄ me utelelek mege ǹsi ǹre Juda.

⁸Soso, ge si ikpa nyi emi ǹsa ǹnyi Asafu ogwu òkikpọ chieen̄ me lek oron ogwu ubọọn̄, ibe inyi emi uti ile, inyi mâsabe irọ ogbugboon̄ mêsabe inama otunchit uwu mgban akọn̄ ya, eyi òkup me agba lek Uwu Mbuban, mè isa si inama mgban ama, melek uwu ere mbaluk.” Mije Awaji okekebe melek n̄a, ogwu ubọọn̄ orọrọ otutuuk inu cha mbeekbe inyi emi.

⁹Nneninan̄a ije isi imun̄ ebi ibot mkpulu agan̄ usaba okwaan̄ Yuferetis cha, mè isa ikpa ogwu ubọọn̄ cha inyi ema. Ogwu ubọọn̄ îria si ebi ibot akọn̄ mè ebi akọn̄ inyọn̄ inyinya ibe egọọk emi eje.

¹⁰Mgbọ Sambalat ogwu Orọn mè Tobaya ogwu ibot mkpulu me agan̄ Amọn enọbe ibe ke îkaan̄ ogwu ònunu ibonitap ubọk inyi ebi Ijeren, ema ekekaan̄ uduk enenen, kpebele ejit.

¹¹Nnenire Jeruselem, mè ikup usen ita,

¹²mè inisa ene inen mè inen igbaalek n̄a ije me eririeen̄ isi ikpọ ike Jeruselem okupbe. Ǹkatumu inu Awaji n̄a otapbe emi me ejit ibe emi ǹrọ me Jeruselem ìnyi ene geege. Eji kpesa anam ije geege igbaalek ije, ilọ me lek eyi emi nkikọp gaalek.

¹³Me eririeen̄ ya, njeje itibi otunchit Iteke, mè isa ikeya ikije ifo Udọn̄ Mun̄ Ijijinu Òkaan̄ Ukot, mè iraka isi ire otunchit Ifin Anam, mè ikikpọ mgban Jeruselem egbugbọbe igwook, mè otutuuk otunchit etapbe ukan̄ iwọp.

¹⁴Nsasa ikeya ije isi ire otunchit Ogbuuruk melek Òkpuku Mun̄ Ogwu Ubọọn̄. Me ere keyi, anam ije n̄a ìkayaka ìkọt ìraka, mije okpọkọ mgban cha ògbugbugbọ igwook ojotbe ere.

¹⁵Nnenije me eririeen̄ ya inene me agba iteke Kidọrọn, mè ikikpọ oke mgban cha egbugbọbe igwook. Mgbọ mkpọbe agan̄ ya isan̄a, nnenigwu ikom isi ije me otunchit Iteke ikpọk inin̄ emen ama.

¹⁶Ebi ibot mkpulu ama kperiọọn̄ ere nsibe, kperọriọọn̄ si inu nkirọ, mije, ǹkakpa-nu inu geege ìnyi ebi Ju, mè ebi ngwugwa, mè ebi ibot ama, mè ebi mkpulu, mè ìre ebi ofifi ene ebi ìberọ ikwaan̄ ya.

¹⁷Mgbọ mkpọbe isan̄a, nnenitumu inyi ema ibe, “Mgbọ keyi, ke enyi mîmun̄ ufialek eji ekupbe me emen: Mîgbugbọ mgban ama Jeruselem igwook, mîtap ukan̄ iwọp otutuuk otunchit ama ikpukpuku. Mgbọ keyi, ìna mè eji egbaan̄ ubọk ekpọk enama mgban ama Jeruselem, mè esan̄a esip me isi.”

¹⁸Mkpakpa inyi ema ike Awaji n̄a osabe ikeke melek n̄a, mè ikpa si otutuuk inu ogwu ubọọn̄ otumube inyi emi inyi ema.

¹⁹Ire, mgbọ Sambalat ogwu Orọn, mè Tobaya ogwu ibot mkpulu me agan̄ Amọn, mè Gesem ogwu Arabu enọbe ukpatu yi, ema echachak eji, mè ikisa eji ito mbele, mè ikibe, “Ìre keke ke enyi ekirọ ikeyi? Ìre enyi ekikpaka ibot inyi ogwu ubọọn̄ ni?”

²⁰Nnenifọọk ema otu ibe, “Îre Awaji òkup me inyọn̄ oborọ inyi inu geelek eji mêchakbe ubọk me lek ije ijaan̄ inyi eji. Eji ebi usun̄ kan̄ mêbene ikpọk inama mgban ama yi. Ire enyi, enyi kpekaan̄ ubọk geege me lek ama Jeruselem. Enyi kpekaan̄ unen me lek ama yi, kpekakaan̄ si ìrot geege me lek ama Jeruselem.”