Read obolo Neyem 5 Bible Online

Neyem 5 - obolo bible

Neyem 5

¹Sọnja mgbọ, ebirieen̄ mè ebi nwa ebebene ikitaan̄ ukpo me ibot ebi ngwan̄ kiban̄ ebi Ju.

²Usini ene ekibe, “Eji melek bọn ebirieen̄ kiji mè bọn ebibaan̄ kiji, eji mîwa me uwu. Îgbe ibe eji ekaan̄ inorie òboso eji, inyi eji ekakwaan̄.”

³Usini ekekibe, “Eji ekisasa ijọn̄ uko kiji mè uko gerep kiji mè uwu kiji inyi ene me nsọọn̄, sabum eji ènemun̄ inorie èrie.”

⁴Usini si ekekibe, “Eji ekifọfọọk ikpoko isa ikikpe otitip ibot ijọn̄ kiji inyi ogwu ubọọn̄ me ibot uko kiji mè uko gerep kiji.

⁵Eji melek ebi ngwan̄ kiji ìre akpalek ge mè eje ge, kpunu si unwene geege me etete bọn kiban̄ mè bọn kiji. Ire, eji ekinyanyam bọn ebirieen̄ kiji mè bọn ebibaan̄ kiji itap me usun̄ mije ijọn̄ kiji. Usini bọn ebibaan̄ kiji mîwuwuuk lek inin̄ usun̄. Ire, eji kpekaan̄ unye geege, mije, ijọn̄ uko kiji mè uko gerep kiji îkana echi ebi ofifi ene.”

⁶Mgbọ nnọbe ida ito kiban̄, mè inọ si otutuuk inu chi òkirọ, ejit onanaan̄ emi enenen.

⁷Inu ya otatap emi ekiket ijot ejit. Nnenikan̄ inu inyi ebi ibot ama mè ebi ibot mkpulu, mè itumu inyi ema ibe, “Ìkpọ-nu ike enyi ekitet ebi ngwan̄ kinyi ibọkọ urot me ibot ikpoko geelek ema ekifọọk me ubọk kinyi!” Ngwegwen uga ntitiin̄, inyi mâsa irek ya inen̄e inu ya itap me irek.

⁸Me emen ntitiin̄ ya, nnenitumu inyi ema ibe, “Me oke ubọk kiji osoon̄be, eji mîkpọk ilep ebi ngwan̄ kiji ebi Ju ebi enyambe itap me usun̄ inyi ebi ofifi ido isan̄a me ubọk ebi ìlep ema. Ìre îgbe ibe enyi ekpọk enyam ebi ngwan̄ kinyi etap me usun̄, inyi eji eyaka ekpọk esi elep si ema esa eka enu ofifi?” Otu obubuk ema, kpeyaka iriọọn̄ inu ebetumu.

⁹Ntutumu inyi ema ibe, “Inu ya enyi ekirọ ìkanwọn. Ìre keke orọ enyi kpekirọ inu me ukpook Awaji kiji, inyi ebi ofifi ido ebi oriara kiji ekayaka ìkaan̄ inu ebesa itap eji esip igak isi?

¹⁰Emi mè ebi ngwan̄ n̄a mè ebi ikwaan̄ n̄a, eji si ekifọfọọk ikpoko melek akpa inyi ebi kiji. Mgbọ keyi, eji etele ibọbọkọ urot ibot ikpoko yi. Ekayaka ìrọ!

¹¹Me cherekeyi, ìyaka ijọn̄ uko, mè uko gerep, mè uko olifu, mè uwu ene cha, echi enyi ebọkọbe, ìnyi ebi geelek enyi ebọkọbe me ubọk. Oruru irek ge me efit irek cha, echi enyi ebọkọbe me ibot ikpoko, melek akpa, melek aya miin̄, melek aya aran̄, ìyaka inyi ebi geelek enyi ebọkọbe me ubọk.”

¹²Ema efọfọọk ibe, “Eji mêyaka inu cha inyi ebi eji ebọkọbe me ubọk, eji kpebeyaka ibọkọ ofifi inu geege. Ike owu otumube, ikeya ke eji eberọ.” Nnenigwen ebi ngwugwa ibe enekup me ijọn̄, mè irọ inyi ebi ibot ama mè ebi ibot mkpulu cha enyan̄a ibot enyi emi ibe ke ema mêrọ otu use kiban̄ iso.

¹³Mfafan̄a otu utọn̄ ofọnti n̄a me isi kiban̄, mè igen̄ ifiin̄, mè itumu inyi ema ibe, “Ene geelek òjijit irọrọ otu use yi iso, ikeyi ke Awaji obogen̄ uwu ene ya ifiin̄, mè igen̄ si otutuuk inu ene ya okaan̄be ifiin̄ isan̄a, inyi ene ya ikana ikup ukpọk ubọk.” Otutuuk ebi ìtititiin̄ me ere ya echechieek igwook ibe, “Ikup ikeya.” Ema etọtọn̄ Okumugwem. Otutuuk ene erọrọ si otutuuk inu cha ike ema echieekbe use.

¹⁴Ofifi si, me otutuuk akọp mè acha iba nrebe ogwu ibot mkpulu me ido Juda, bene me òso akọp acha iba me lek mkpulu ogwu ubọọn̄ Atejakisis, acha etobe emi, mege inire òso akọp acha ita mè iba me lek mkpulu kan̄, inorie geelek ogwu ubọọn̄ odọmọbe inyi ogwu ibot mkpulu ido Juda, emi mè ebi ngwan̄ n̄a, eji kpekirie.

¹⁵Ebi ìdadasi ikup me irek mkpulu yi me isi n̄a mîtoon̄ ebi kiji ikpele akpan me ibot. Ema ekibọkọ inorie mè miin̄ mè akọp ikpoko alata okuket ini me usen me ubọk ebi Juda. Ebi ibot ikwaan̄ kiban̄ si ekisa si ikpele akpan ikeme ebi ene. Eyi n̄a, mije nkaan̄be ukpook Awaji me emen, ǹkarọ inu òkup ikeya.

¹⁶Kpan̄asi ikeya, ǹsasa lek n̄a itap me lek ikwaan̄ inanama mgban ama yi. Ijọn̄ geege, eji kpelep. Otutuuk ebi ikwaan̄ n̄a esoso isi me lek ikwaan̄ mgban ama ya.

¹⁷Ofifi si, efit mè akọp ene go, ebi Ju mè ebi ibot kiban̄ ekinirie inorie me lek ikasi inorie n̄a, kpefuk ofifi ebi ìkinan̄a me ido òkukup ikana eji ìkinirie si inorie me ubọk n̄a.

¹⁸Usen geelek ǹkikpan̄ orie eriembuuk ge esan̄abe òsok, mè arọọn̄ gweregwen òjajaan̄ lek, igbaalek owuwa unọn isa item inu. Me òso akọp usen geelek, ǹkigwogwook esese isi miin̄ ijot ere inyi ebi ene enwọ. Otutuuk kechi ìkinan̄a me akpa n̄a. Me otutuuk chi, kpunu mgbọ geege ndobe ibe enyi emi uche inorie mè miin̄ òkup inyi ogwu ibot mkpulu, mije, ikwaan̄ esabe ikeme ebi kiji chi îmin enenen.

¹⁹Awaji n̄a, nye lek keek emi, mè gbana emi, mije ata inu chi geelek nrọbe inyi ebi n̄a.