Read obolo Neyem 6 Bible Online

Neyem 6 - obolo bible

Neyem 6

¹Sambalat mè Tobaya mè Gesem ogwu Arabu mè ebi oriara kiji kechilọ eneninọ ibe ke emi mkpọk inama mgban ama Jeruselem ichit, ke kpunu agbagba geege òsisik. Mege inire mgbọ ya, ǹkajeen̄-nu afọn̄ ìso lek otutuuk otunchit.

²Sambalat mè Gesem eneniria etip ijet emi ibe emi ǹnu ǹnenchichini melek kiban̄ me ama ge me etete bọn ama òkup me òla ijọn̄ Ono. Ire, ema ekitọt irọrọ emi ijo inu.

³Mije keya, nneniria ebi osat ibe esi elook ema ibe: “Nkaan̄ ulobo ikwaan̄ nkirọ me ubọk. M̀kpakọt itele, mè isibi inu me lek kinyi. M̀bajeje itele ibe ikwaan̄ yi ikeke ni?”

⁴Ema eraria chieen̄ etip yaage ijet emi mgbọ ini, emi nyayaka iria si chieen̄ ufọọk-otu yaage ijet si ema.

⁵Sambalat oneniria ogwu ikwaan̄ kan̄ inu ibe isa etip yaage inilook emi òso mgbọ go. Ogwu ikwaan̄ kan̄ ya ìnu melek ikpa kpechit otu me ubọk.

⁶Ege me emen ikpa ya ibe ikeyi: “Etip òkitaan̄ ikana ido geelek, Gesem[9] îtumu si ikọ yaage, ibe ke owu melek ebi Ju ekitọt ikpakpaka ibot, ke îre eya orọ owu okinama mgban ama kinyi. Ògak ge, ebe ke owu òkiweek ikakana ogwu ubọọn̄ inyi ebi kinyi.

⁷Ekitumu si ibe ke owu ora igobo ebi nriran ebi ìbetumu isibi me Jeruselem ibe ke owu ore ogwu ubọọn̄ me ido Juda. Ikọ yi ìkpolọlọ irere utọn̄ ogwu ubọọn̄ Pesia. Eya orọ, na, inyi eji egbaan̄ ibot esọk òfo me lek ikọ yi.”

⁸Nneniria ufọọk-otu keyi ijet ọmọ ibe: “Kpunu inu geege òkup ikeya òmọmọnọ irek. Îre owu gaalek osan̄a inu yi isibi me ejit kwun̄.”

⁹Ema otutuuk ekiweek itatap eji ukpook me emen, inyi lek kiji iwọ me lek ikwaan̄ ya, mè eji ekayaka ìkọt ìrọ ìnyi isi. Ire, emi nrariaak Awaji ibe, “Soso tap emi efuuk me emen.”

¹⁰Usen ge, nnenisi uwu kè Semaya gwun̄ kè Delaya, gwun̄ kè Meyetaben ogwu ikakọtge ìnan̄a me uwu kan̄ ìsibi. Semaya obebe emi, “Eji enesi emen Uwu Mbuban Awaji, mè egon afọn̄ Uwu Mbuban ekwek lek kiji me ere keya, mije, ebi ìbekpan̄ owu mêkinu me oniin̄, ebenu me ejit eririeen̄ inikpan̄ owu.”

¹¹Mbebe ọmọ, “Ìre ene òbet lek n̄a môlibi ilet ni? Sà ìre ogwu òbet lek n̄a môlibi isi inin̄ emen Uwu Mbuban ilet lek, inyi igat ugwem ni? M̀kpasi!”

¹²Nnenitet ibot ibe ke ìkare Awaji onyi ọmọ etip ya, ke ìben nriran ataak ya ikeme emi, mije, îre Tobaya melek Sambalat egwen ọmọ me ọkọ isa iria ikwaan̄.

¹³Egwen ọmọ me ọkọ inyi initap emi ukpook me emen, mè ǹsa me ikeyi ǹrọ inu ikatatge, mè ebi ene enyi emi ijo erieen̄, mè efiat emi.

¹⁴Nneniriaak uriaak ibe, “Awaji n̄a, keek inu Tobaya mè Sambalat erọbe emi, keek si ogwu enenwaan̄ nriran Nowadia, mè ofifi ebi nriran cha ìkpọkpọ inikiweek itatap emi ukpook me emen.”

¹⁵Akọp usen go mè iba ke esa ikpọk inama mgban ama Jeruselem isan̄a. Ikwaan̄ ya ìta me akọp usen iba mè go me onyan̄ Elulu.[10]

¹⁶Mgbọ otutuuk ebi oriara kiji enọbe ibe ke eji mînama mgban ama Jeruselem isan̄a, ukpook otetet otutuuk ido ìluluk ikana eji, lek kiban̄ owọwọ mè itọọk, kpeyaka iriọọn̄ inu eberọ. Ema eneniriọọn̄ ibe ke îre mije Awaji kiji otapbe ubọk inyi eji ke eji ekọt irọ ikwaan̄ yi isan̄a.

¹⁷Me otutuuk mgbọ eji ekinama mgban ama ya, ebi ibot Juda mîge owuwa ikpa ijet Tobaya, mè ibọkọ si owuwa ufọọk-otu inan̄a me ubọk kan̄.

¹⁸Me ike mgbọ ya, owuwa ebi Juda mînyan̄a ibot melek kè Tobaya. Mije, Tobaya odo gwun̄ enenwaan̄ kè Sekanaya gwun̄ kè Ara me lek nwa. Jeyoyanan, gwun̄ kè Tobaya, ododo si gwun̄ enenwaan̄ kè Mesulam gwun̄ kè Berekaya me lek nwa.

¹⁹Ebi Ju cha mîra inikikpa ata inu Tobaya orọbe inyi emi, mè ikisa ikọ geelek ntumube isi ikikpa inyi ọmọ. Tobaya îra ikige owuwa ikpa isa ikiweek itatap emi ukpook me emen.