Read obolo Neyem 7 Bible Online

Neyem 7 - obolo bible

Neyem 7

¹Mgbọ enamabe mgban ama ya isan̄a, nnenijeen̄ afọn̄ iso lek otutuuk otunchit isan̄a, enenigobo ebi ìkibem otunchit, mè ebi ìkọt okwa, mè ebi otoko kè Libai ito me irek ikwaan̄ kiban̄.

²Nnenimọnọ ngwan̄ n̄a Anani ito, mè inisa Ananiya ogwu ibot ebi ìkibem uwu mgban akọn̄ ito igbaalek, ibe ekpulu Jeruselem, mije, Ananiya ìre ogwu atikọ, ogwu òkakaan̄ ukpook Awaji me emen igak owuwa ene.

³Nneninyi ema ida ibe ekachili otunchit Jeruselem geege me otu ewelegwe usen geelek îtata ura ìbubum inye. Egwe isifit, ema emun̄ ibe ke ebi ìkibem otunchit mîchit otutuuk otunchit geelek, mè isa olọkọrọ igon ikam, sabum ema ènechit ikwaan̄ usen keya. Nnyi si ema ida ibe egobo ebi ìluk me emen ama Jeruselem eto ekana lek mgban ama, inyi ekebem, kpa ogwu mè mgbọ mbem eyi kan̄, ogwu ikup obem me isi ere uwu kan̄.

⁴Jeruselem îmin enenen, mè iwele isaak. Ire, ebi ìluk me emen kan̄ ìre ene inen mè inen gaalek. Uwu inen mè inen gaalek si ke ekpọk inama.

⁵Awaji n̄a onenitap emi me ejit ibe emi ǹtitiin̄ ebi ugane ama, mè ebi ibot mkpulu, mè otutuuk ebi ene, inyi enetap erieen̄ me ikpa, me otoko me otoko. Nneniweek ikpa egebe erieen̄ ebi ìdadasi inan̄a me usun̄ akọn̄ ya ika. Inu egebe me emen ikpa ya ire ikeyi:

⁶Ebibi ìre ebi ìnan̄a me usun̄ akọn̄ me ido Babilọn, ebi Nebukadineja ogwu ubọọn̄ Babilọn okpulube me akọn̄, ebi ìyayaka ika inu ama Jeruselem mè ido Juda, ogwu ikup ofo ama kiban̄.

⁷Ema eje ukot ge melek kè Jerubaben, mè Jesuwa, mè Neyemaya, mè Ajariya, mè Rayamaya, mè Nayamani, mè Mọdikai, mè Bilisan, mè Misiperet, mè Bigibai, mè Neyum, mè Bayana ika. Erieen̄ ebi Ijeren ìnanan̄a ika ire echi:

⁸Ebi owot iman kè Paros, obop iba mè efit mè akọp jaaba mè iba,

⁹ebi owot iman kè Sefatiya, efit ita mè akọp jaaba mè iba,

¹⁰ebi owot iman kè Ara, efit gweregwen mè akọp go mè iba,

¹¹ebi owot iman kè Payat-Mowabu (ebi ìnan̄a me owot iman kè Jesuwa mè Jowabu), obop iba mè efit jeeta mè akọp mè jeeta,

¹²ebi owot iman kè Elam, obop mè efit iba mè akọp go mè ini,

¹³ebi owot iman kè Jatu, efit jeeta mè akọp ini mè go,

¹⁴ebi owot iman kè Jakai ore efit jaaba mè akọp gweregwen,

¹⁵ebi owot iman kè Binuwi, efit gweregwen mè akọp ini mè jeeta,

¹⁶ebi owot iman kè Bebai, efit gweregwen mè akọp iba mè jeeta,

¹⁷ebi owot iman kè Ajigadi, obop iba mè efit ita mè akọp iba mè iba,

¹⁸ebi owot iman kè Adonikam, efit gweregwen mè akọp gweregwen mè jaaba,

¹⁹ebi owot iman kè Bigibai, obop iba mè akọp gweregwen mè jaaba,

²⁰ebi owot iman kè Adin, efit gweregwen mè akọp go mè go,

²¹ebi owot iman kè Ateri (ebi ìnan̄a me owot iman kè Ejikaya), akọp onaan̄ge mè jeeta,

²²ebi owot iman kè Asum, efit ita mè akọp iba mè jeeta,

²³ebi owot iman kè Bejai, efit ita mè akọp iba mè ini,

²⁴ebi owot iman kè Arifu, efit mè akọp mè iba,

²⁵ebi owot iman kè Gibiọn, akọp onaan̄ge mè go.

²⁶Ebi ama Beteleyem mè ebi ama Netofa, efit mè akọp jeeta mè jeeta,

²⁷ebi ama Anatọt, efit mè akọp iba mè jeeta,

²⁸ebi ama Bet Ajimabet, akọp ini mè iba,

²⁹ebi ama Kiriat Jiarim mè ebi ama Kefira mè ebi ama Bierot, efit jaaba mè akọp ini mè ita,

³⁰ebi ama Rama mè ebi ama Geba, efit gweregwen mè akọp iba mè ge,

³¹ebi ama Mikimas, efit mè akọp iba mè iba,

³²ebi ama Beten mè ebi ama Ai, efit mè akọp iba mè iba

³³ebi ama Nebo keyilọ, akọp go mè iba,

³⁴ebi ama Elam keyilọ, obop mè efit iba mè akọp go mè ini,

³⁵ebi ama Arim, efit ita mè akọp iba,

³⁶ebi ama Jeriko, efit ita mè akọp ini mè go,

³⁷ebi ama Lodi mè ebi ama Adidi mè ebi ama Ono, efit jaaba mè akọp iba mè ge,

³⁸ebi ama Senaya, obop ita mè efit onaan̄ge mè akọp ita.

³⁹Owot iman ebi ngwugwa: ebi owot iman kè Jedaya (ebi ìnan̄a me owot iman kè Jesuwa), efit onaan̄ge mè akọp jaaba mè ita,

⁴⁰ebi owot iman kè Imeri, obop mè akọp go mè iba,

⁴¹ebi owot iman kè Pasuru, obop mè efit iba mè akọp ini mè jaaba,

⁴²ebi owot iman kè Arim, obop mè akọp mè jaaba.

⁴³Owot iman ebi otoko kè Libai: Ebi owot iman kè Jesuwa (ebi ìnan̄a me owot iman kè Kadimien inan̄a me owot iman kè Odabia), akọp jaaba mè ini.

⁴⁴Owot iman ebi ìkọt okwa: Ebi owot iman kè Asafu, efit mè akọp ini mè jeeta.

⁴⁵Owot iman ebi ìkibem otunchit: Ebi owot iman kè Salum, mè Ateri, mè Talimon, mè Akubu, mè Atita, mè Sobai, efit mè akọp ita mè jeeta.

⁴⁶Owot iman ebi bọn ikwaan̄ Uwu Mbuban: Ebi owot iman kè Jiya, mè Asufa, mè Tabayot,

⁴⁷mè Kerọs, mè Siya, mè Padọn,

⁴⁸mè Lebana, mè Agaba, mè Salimai,

⁴⁹mè Yanan, mè Giden, mè Gayari,

⁵⁰mè Reyaya, mè Rejin, mè Nekoda,

⁵¹mè Gajam, mè Uja, mè Paseya,

⁵²mè Besayi, mè Meyunim, mè Nefusim,

⁵³mè Bakibuk, mè Akufa, mè Ariyuri,

⁵⁴mè Bajilut, mè Meyida, mè Arasa,

⁵⁵mè Bakọs, mè Sisera, mè Tema,

⁵⁶mè Nejia, mè Atifa.

⁵⁷Ebi owot iman ebi usun̄ kè Solomọn: Ebi owot iman kè Sotai, mè Soferet, mè Perida,

⁵⁸mè Jala, mè Darikon, mè Giden,

⁵⁹mè Sefatiya, mè Atin, mè Pokeret-Ajebayim, mè Amọn.

⁶⁰Ebi bọn ikwaan̄ Uwu Mbuban mè ebi owot iman ebi usun̄ kè Solomọn, efit ita mè akọp onaan̄ge mè iba.

⁶¹Ebibi enan̄a me ido Babilọn me ama Teli Mela, mè Teli Arasa, mè Kerubu, mè Adọn, mè Imeri, ire, ema kpeyaka ikọt iriọọn̄ mè ìre ebi uwu nte kiban̄ mè ebi owot iman kiban̄ ìre ebi Ijeren, mè ìre kpere:

⁶²Ebi owot iman kè Delaya, mè Tobaya, mè Nekoda, efit gweregwen mè akọp ini mè iba.

⁶³Ebi owot iman ebi ngwugwa: Ebi owot iman kè Obaya, mè Akoji, mè Bajilai (ogwu òdo gwun̄ enenwaan̄ kè Bajilai ogwu Giliadi, mè inikichieek erieen̄ nte ogwu nwa.)

⁶⁴Ebibi mîwọlọ emen ikpa ikpọ, kpemun̄ erieen̄ ebi owot iman kiban̄. Mije keyi, kpeyaka imọnọ ema kubọk ebi ngwugwa, emun̄ ema kubọk ebi ìchaka mbuban.

⁶⁵Ogwu ibot mkpulu oneninyi ida ibe ema ekarie inorie geege òkup mbuban ichit mege ire mgbọ geelek ogwu ngwugwa ge mônube, mè inisa Urim mè Tumim iweek iriọọn̄ mè ema ìre ebi ngwugwa me atikọ.

⁶⁶Otu ifuk otutuuk kiban̄ ebi ìkaka ìre akọp obop ini mè obop iba mè efit ita mè akọp gweregwen.

⁶⁷Kpefuk ebi usun̄ ebirieen̄ mè ebi usun̄ ebibaan̄ kiban̄ igbaalek, otu ifuk ebi usun̄ ìre obop jaaba mè efit ita mè akọp ita mè jaaba. Kpefuk si efit ene iba, ebirieen̄ mè ebibaan̄ ebi ìkọt okwa, igbaalek.

⁶⁸Ema mîkaan̄ inyinya, efit jaaba mè akọp ita mè gweregwen, mè ikaan̄ si inyinya mgbidim ukot, efit iba mè akọp ini mè go,[11]

⁶⁹mè ikaan̄ aligọ, efit ini mè akọp ita mè go; mè inyinya akpan, obop gweregwen mè efit jaaba mè akọp iba.

⁷⁰Usini ebi ibot uwu mînyi inyinyi ibe esa etap ubọk erọ ikwaan̄ ya. Ogwu ibot mkpulu ìkpe obop ikpoko alata araran̄ itap me emen uwu isun̄-ikpoko ikwaan̄, mè inyi si akọp ngigọ go, mè ofọnti ikwaan̄ ebi ngwugwa, efit go mè akọp ita.

⁷¹Ebi ibot uwu kechilọ ekpe akọp obop ikpoko alata araran̄ iba, mè alata okuket, obop kilo mè efit kilo iba mè akọp kilo go.

⁷²Otu ifuk inu otutuuk ebi ene enyibe ìre akọp obop ikpoko alata araran̄ iba, mè efit kilo alata okuket mè kilo ini, igbaalek ofọnti ikwaan̄ ebi ngwugwa akọp gweregwen mè jaaba.

⁷³Otutuuk ebi ngwugwa, mè ebi otoko kè Libai, mè ebi ìkibem otunchit, mè ebi ìkọt okwa, mè bọn ikwaan̄ Uwu Mbuban, igbaalek usini ebi ikike, mè otutuuk ebi Ijeren efofon ama kiban̄ isi iluk. Me emen onyan̄ jaaba me acha ya, otutuuk ebi Ijeren ekekiluk me ama kiban̄ geelek me ido Juda.