Read obolo Neyem 9 Bible Online

Neyem 9 - obolo bible

Neyem 9

¹Me òso akọp usen iba mè ini me emen onyan̄ yaage, otutuuk ebi Ijeren enenititiin̄, mè ijin otu, mè itap ofọnti ufieejit, mè iken ntọn̄ me ibot.

²Bọn owot Ijeren echeche lek kiban̄ isan̄a me lek otutuuk ebi ichen, mè ikeke esese, ema gaalek, mè ifuk ijo kiban̄, mè ifuk si ijo echi ebi nte nte kiban̄ erọbe.

³Ema ekekeke me ere yaage ema ekekebe, esasa otuuk kè mbubak mgbọ ita ifuk ikpa Ikan Okumugwem Awaji kiban̄ inyi ema. Ema enenisa otuuk kè mbubak mgbọ ita si ifuk ijo kiban̄, mè ikitọbọ ebum inyi Okumugwem Awaji kiban̄.

⁴Jesuwa, mè Bani, mè Kadimien, mè Sebaniya, mè Buni, mè Serebiya, mè Bani, mè Kenani, ema otutuuk ebi otoko kè Libai, eneninene ikeke me inyọn̄ otitop, mè itaan̄ nga ukpo ile iriaak uriaak inyi Okumugwem Awaji kiban̄.

⁵Jesuwa, mè Kadimien, mè Bani, mè Asabineya, mè Serebiya, mè Odiya, mè Sebaniya, mè Petaya, ebi otoko kè Libai, enenitumu inyi ebi ene ibe, “Ìnan̄a ìkeke me ukot kinyi, mè ìtọn̄ Okumugwem Awaji kinyi, ogwu òkup bene me mgbọ geelek isi ire mgbọ geelek.” Ema ekekitumu ibe, “Itọn̄ ikup inyi erieen̄ kwun̄ òkakaan̄ umin! Me atikọ, erieen̄ kwun̄ îbene isaba iraka otutuuk itọn̄ mè umin geelek.

⁶Owu gaalek ore Okumugwem. Owu orom akpabin inyọn̄, udọk udọk emen inyọn̄ ere òbebene ichit, mè irom si otutuuk ntoronyan̄ geelek òkup me emen kiban̄. Owu orom linyọn̄ mè otutuuk inu geelek òkup me emen kan̄, mè irom otutuuk okwaan̄ geelek mè otutuuk inu geelek òkup me emen kiban̄. Îre owu okinyi otutuuk inu geelek ugwem. Otutuuk inu geelek òkup me emen inyọn̄ mè akpa isinyọn̄ ekitọbọ ebum inyi owu gaalek.

⁷“Owu ore Okumugwem Awaji ogwu ògogobo Eberam, mè igwen ọmọ isibi inan̄a me Uru me ido Kalidia, mè inwene ọmọ erieen̄ ikigwen Ebereyam.

⁸Owu omun̄ ibe ke ọmọ îgbe utoon̄-ejit me isi kwun̄, mè inyan̄a ibot inyi ọmọ ibe ke owu môsa ijọn̄ ebi Kenan, mè ebi Et, mè ebi Amọ, mè ebi Pereji, mè ebi Jebus, mè ebi Girigas inyi ebi owot iman kan̄. Owu orọ si otu use kwun̄ ya iso, mije, owu ìre ogwu ata irọrọ.

⁹“Owu omun̄ ufialek ebi nte nte kiji me Ijipiti, mè inọ ida ito kiban̄ me agba okwaan̄ Anyiaan̄,

¹⁰mè irọ owuwa ikpele uyeke uyeke inu, mè inu ukechieen̄, isa ijeen̄ ogwu Fero mè ebi ibot ikwaan̄ kan̄ mè otutuuk ebi ido kan̄ ikpele unye kwun̄. Mije, owu oriọọn̄ ugumulek kiban̄ me emen tukutuku ema etutukube ebi kwun̄. Erieen̄ kwun̄ otataan̄ etip mije inu cha owu orọbe, mè itaan̄ si mege inire cherekeyi.

¹¹Owu otọbọ mun̄ okwaan̄ ibum iba inyi ebi kwun̄, ema ejeje ukot ukot me nchat ijọn̄ isaba ejit okwaan̄. Owu otọtọọn̄ ebi oriara ìkilibi igọọk ema itap me emen irem okwaan̄, ema egegen ibia me ejit mun̄ uga okwaan̄ kubọk ewuuk.

¹²Owu osa ujọn̄ọ efit oduku inyọn̄ ijeen̄ ebi kwun̄ oniin̄ me ikarek, mè isa ujọn̄ọ efit ukan̄ inyi ema utoon̄ me eririeen̄, mè isa me ikeya ijeen̄ ema oniin̄ ema ebeje.

¹³“Owu ogele isibi inan̄a me emen inyọn̄ inikeke me inyọn̄ ogoon̄ Saina itumu ikọ inyi ema. Owu onyi ema Ikan òtatat, mè inyi ema ijejeen̄ eyi atikọ, mè itọ ikọ ònenen inyi ema, mè inyi ema orọmijọn̄ ònwọnwọn. Me ere ya ke owu ojeen̄ ema onineen̄ iluk ugwem, mè inyi ema ikan ofolek ugwem ata irọrọ, mè ubọk ekisa irọ inu òtatat mè inen.

¹⁴Owu ojeen̄ ema ibe ekesun̄ Usen Mbuban kwun̄, mè inyi ema Ikan, mè inyi ema ikọ kwun̄ otọbe, mè ijeen̄ ema orọmijọn̄ kwun̄, otutuuk cha ìje me ubọk kè Mosis ogwu ikwaan̄ kwun̄.

¹⁵Mgbọ uraafiọọn̄ otakabe ema, owu onyi ema inorie ònan̄a me emen inyọn̄; mgbọ ebek orakbe ema, owu onyi ema mudim ònan̄a me lek ewuuk. Owu otumu inyi ema ibe esi ebọkọ ijọn̄ ya eyi owu obenebe ubọk ifo inyọn̄ inyan̄a ibot ichieek use ibe ke owu môsa inyi ema me ìrot.

¹⁶“Ire, ema, ebi nte nte kiji, enenisa me ìnan-utọn̄ mè ugumulek ijit irọrọ ikọ ya owu otọbe inyi ema.

¹⁷Ema ejijit igbagban̄ ida kwun̄, kpeyaka ikeek inu ukechieen̄ cha owu orọbe me etete kiban̄. Ema etetet ejit inye, mè ikpaka ibot inyi owu, mè igobo ogwu òbosa ema igwu ikom ifo emen usun̄ kiban̄ ya ema enan̄abe isibi. Ire, owu ìre Awaji òkitele ijo inyi ene, mè ire si ogwu ata ejit, mè ogwu ejit nsan, ogwu ìkakigwat lek ìnaan̄ ejit, mè ogwu imumechieen̄ kan̄ okibia ire mgbọ geelek. Mije keya, owu òkajit ema ìtele,

¹⁸ubọk geelek ema ejitbe owu itele, mè isi itọkọ mkpọmfaka eriembuuk inyi lek kiban̄, mè ikibe, ‘Kpọ awaji kinyi ire eyi, îre ọmọ osa enyi inan̄a me Ijipiti isibi,’ mè ikitumu ikpele mbuban ikọ inyi owu.

¹⁹“Mije ikpele ejit njijin okaan̄be me lek kiban̄, owu òkafiin̄ ema ìtele me emen èwê. Ikarek geelek, ujọn̄ọ efit oduku inyọn̄ ya ìkakilọlọ ijeje me isi kiban̄. Ikeya si, eririeen̄ geelek, ujọn̄ọ efit ukan̄ ya ìkakilọlọ ijeje me isi kiban̄ ikinyi ema utoon̄, mè ikijeen̄ ema oniin̄ ema ebeje.

²⁰Owu onyi ema ata Ekwukwu kwun̄ ibe inikiteme ema nteme. Owu òkatele inyinyi ema mana kwun̄ mgbọ geege, òkatele si inyinyi ema mudim, inyi enwọ esa esiki ebek.

²¹Otuuk kè akọp acha ini ke owu okpukpo ema me emen èwê, inu geege ìkanan ema. Ofọnti kiban̄ ìkagwak, ukot kiban̄ si ìkayiki.

²²“Owu orọ ema etim ekpan̄ owuwa ama ubọọn̄ mè owuwa ido, mè inyi ema otutuuk ntutun̄ ere geelek me inyọn̄ ijọn̄ yi. Ema mîbọkọ otutuuk ijọn̄ kè Siyon, ogwu ubọọn̄ ebi Esibon, mè ijọn̄ kè Ôgu, ogwu ubọọn̄ ebi Basan, me ìrot.

²³Owu orọ bọn kiban̄ emumana, mè ewa kubọk ntoronyan̄ akpabin inyọn̄. Owu osasa ema initap me inyọn̄ ijọn̄ ya eyi ochieekbe ebi nte nte kiban̄ use ibe ke owu môsa inyi ema enin̄ eluk me ìrot.

²⁴Bọn kiban̄ eninin̄ inyọn̄ ijọn̄ ya, mè ibọkọ isak me ìrot. Owu otim akọn̄ ikpan̄ ebi Kenan ebi ìluk me inyọn̄ ijọn̄ ya inyi ebi kwun̄, mè iyaka ema mè ebi ubọọn̄ kiban̄, mè otutuuk ebi geelek ìluk me inyọn̄ ijọn̄ ya itap ebi kwun̄ me ubọk, inyi ebi kwun̄ erọ ife cha inu òneme ema.

²⁵Ema etitim akọn̄ ibọkọ owuwa ama mgban akọn̄, mè ijọn̄ òkitibi mfut, mè ibọkọ owuwa uwu otutuuk ata inu geelek ojotbe emen, mè owuwa udọn̄ mudim erọkọbe itele, mè owuwa uko gerep, mè uko olifu melek owuwa uti ata mfut ojotbe ideke me lek. Ema ererie ijot owot, mè imiin̄ ufuk, akpa lek kiban̄ okekijeen̄ ikpele ata inu kwun̄.

²⁶“Ire, ema enyenye ibot inyi owu, mè ijit owu itele, mè igba udun̄ ifit Ikan kwun̄. Ebi nriran kwun̄ ìnunu initaba ema ubọk me utọn̄ ibe egwu ekom enu me lek kwun̄, ema etetet ikpan̄, mè ikitumu ikpele ijo otu ikọ inyi owu.

²⁷Mije keya, owu okakana ema itap me ubọk ebi oriara kiban̄, ife cha etututuku ema. Ire, me emen tukutuku kiban̄, ema etoto ito igwen owu, owu okukup me emen inyọn̄ inọ ida ito kiban̄. Mije ikpele ejit njijin kwun̄, owu oraria ebi unyan̄a ijet ema, ife cha enunu initaba ema isibi me ubọk ebi ochicha kiban̄.

²⁸“Ire, mgbọ yaage ema ekaan̄be utelelek, ema ekpọkpọk ibene ikirọ ijo inu me isi kwun̄. Owu oyayaka ema itap me ubọk ebi ochicha kiban̄ ibe ekpulu ema. Me emen tukutuku kiban̄, ema etoto si ito igwen owu, owu okukup me emen inyọn̄ inọ ida ito kiban̄, mè itaba ema isibi si, mije ikpele ejit njijin kwun̄. Ikeya ke owu okirọ mgbọ geelek.

²⁹“Owu otataba ema ubọk me utọn̄ ibe egwu ekom enu lek Ikan kwun̄, ire, ema egugumu lek, mè ikpaka si ibot inyi ida kwun̄. Ema mîrọ ijo inu, mije, ema ejitbe irọrọ ikọ cha otọbe, mè isusun̄ ikan kwun̄ echi òkinyi ene geelek òsusun̄ ema ugwem. Ema mîsa me unye-ibot igba udun̄ ifit owu, mè ijit igbagban̄ utọn̄ inyi owu.

³⁰Me owuwa acha chi, owu ome ijo ugwem kiban̄, mè ikiria ebi nriran kwun̄ ibe eteme ema nteme sa me unye eyi Ekwukwu kwun̄. Ire, ema ejijit igbagban̄. Eya orọ, owu okakana ema itap me ubọk ido ebi ife cha ìluluk ikana ema.

³¹Ire, mije ikpele ejit nsan kwun̄, owu òkajijaka ema ìsan̄a, òkajijit si ema ìtele isi ge, mije, owu ìre Awaji ata ejit mè ejit nsan.

³²“Mgbọ keyi, jei ikpele Awaji kiji, ogwu òkaan̄ unye, mè ikaan̄ ukpook, owu ogwu òkirọ inyan̄a-ibot eyi imumechieen̄ kwun̄ iso, kakpọkpọ ìmọnọ otutuuk ukwook kiji kubọk inu ifit. Ukwook yi îre lek ebi ubọọn̄ kiji, mè ebi ibot mkpulu kiji, mè ebi ngwugwa kiji, mè ebi nriran kiji, mè ebi nte nte kiji, mè otutuuk ebi kwun̄, bene me mgbọ ebi ubọọn̄ Asiria etimbe ikpan̄ eji mege inire cherekeyi.

³³Osusut geelek osulube eji îtat. Owu ore ogwu atikọ, eji mîrọ ijo inu.

³⁴Ebi ubọọn̄ kiji, mè ebi ibot mkpulu kiji, mè ebi ngwugwa kiji, mè ebi nte nte kiji kpesun̄ Ikan kwun̄. Ema kpegban̄ utọn̄ me lek ikọ owu otọbe, kpesa si itaba ubọk me utọn̄ geelek owu otababe ema igwen inu geege.

³⁵Ikerere mgbọ ebi ubọọn̄ kiban̄ ekikpulu ema, owu osasa me ikpele ata ejit kwun̄ inyi ema ijọn̄ òwowook ema me lek, mè ikisibi mfut, ema kpesi ikwaan̄ inyi owu, kpetetele si ijo ugwem kiban̄.

³⁶“Ire, me cherekeyi, eji ìre ebi usun̄. Iin̄, eji ìre ebi usun̄ me inyọn̄ ijọn̄ ya eyi owu onyibe ebi nte nte kiji ibe erie mfut kan̄ mè ata inu geelek òtitibi isibi me ijọn̄.

³⁷Mgbọ keyi, mije ijo inu kiji, otutuuk ogbogbo mfut geelek òsibi me ijọn̄ kiji ìyaka ikinin̄ ubọk ebi ubọọn̄ owu otobe ibe ekekpulu eji. Ema ekimimian̄a eji melek anam kiji ubọk geelek òneme ema. Mgbọ keyi, eji ekup me emen ikpele ujaralek.”

³⁸“Mije keyi, eji mîkaan̄ mgbaan̄-nchieek ògbagbaan̄ eji ibọp, mè ige itap me ikpa. Ebi ibot kiji, mè ebi otoko kè Libai kiji, mè ebi ngwugwa kiji mîrọ inye, mè isa iman̄ òriọọn̄ kiban̄ igon me lek.”