Read obolo Esita 2 Bible Online

Esita 2 - obolo bible

Esita 2

¹Mgbọ otutuuk inu chi orakabe, unaan̄-ejit eyi ogwu ubọọn̄ Ayaserọs onaan̄be inyi Basiti ogwu nwa onenisiki. Ogwu ubọọn̄ onenikikeek Basiti ogwu nwa, mè inu îrọbe, mè ikan ọmọ otapbe ikeme ogwu nwa ya.

²Ebi ikwaan̄ ebi ìkisi ikwaan̄ inyi ogwu ubọọn̄ me lek kan̄ enenitumu inyi ogwu ubọọn̄ ibe, “Ogwu ubọọn̄, owu mônyi ida ibe eweek ujuja obaak nsabọn ibaan̄ ebi kperiọọn̄ ebirieen̄ enyi owu.

³Owu môgobo ebi ikwaan̄ me ido geelek me mkpulu kwun̄, mè inyi ema unye ibe etitiin̄ ujuja obaak ebibaan̄ geelek ebi kperiọọn̄ ebirieen̄ esa enu me uwu ere ebibaan̄ ekikup me uwu ogwu ubọọn̄ me ama Susa, mè ekana ema etap me ubọk kè Egayi ogwu ikwaan̄ ogwu ubọọn̄ ogwu esan̄abe òsok, òrere ogwu òkikpọ chieen̄ me lek ebibaan̄, mè enyi ebibaan̄ cha aran̄ eken me lek, mè egwook ema okọbọm.

⁴Gwun̄ enenwaan̄ geelek mônemebe owu ogwu ubọọn̄, ogwugwa mônenikikpulu kubọk nwa ogwu ubọọn̄ me irek kè Basiti.” Nteme yi oneninwọn me lek ogwu ubọọn̄. Irọrọ si ikeya.

⁵Me Susa, ama ibot ere ogwu ubọọn̄ olukbe, îkaan̄ ogwu enerieen̄ ge ogwu Ju òluluk si me ama ya. Erieen̄ kan̄ ìre Mọdikai gwun̄ kè Jairi òrere gwun̄ kè Simei ogwu òrere gwun̄ kè Kis ogwu otoko kè Benjamin.

⁶Kis ìre ene ge me etete ebi Ju ebi ebi akọn̄ kè Nebukadineja ogwu ubọọn̄ Babilọn ekpulube me akọn̄ me Jeruselem igbaalek kè Jekonaya[2] ogwu ubọọn̄ Juda isa ifo Babilọn.

⁷Me ike mgbọ ya, Mọdikai okikpọ chieen̄ me lek gwun̄ enenwaan̄ ge òre gwun̄ ngwan̄ ogwu ute. Gwun̄ ya ìkakaan̄ ute, ìkakaan̄ uga. Gwun̄ enenwaan̄ ya ogwu ekigwen Adasa, mè egwen si Esita, îjaan̄ uja enenen, mè ilọkọ lek. Mgbọ ogwu ute mè ogwu uga ekwaan̄be ke Mọdikai omọnọ ọmọ ikpọ isibi kubọk gwun̄ kan̄ gaalek.

⁸Me mgbọ ikan ogwu ubọọn̄ mè ida înyibe okikana ido geelek, ekekititiin̄ ogbogbo obaak nsabọn ibaan̄ me ere geelek iria inu me Susa ama ibot, mè ikisa ema initap me ubọk kè Egayi ogwu òkikpọ chieen̄ me lek ebibaan̄ me uwu ogwu ubọọn̄. Mîsa si Esita igbaalek inu initap me ubọk kè Egayi ogwu òkikpọ chieen̄ me lek ebibaan̄ me uwu ogwu ubọọn̄.

⁹Egayi omama Esita enenen, mè inyi ọmọ aran̄ mè inorie okọbọm kan̄ mgbọ yaage, mè igobo atalek nsabọn ibaan̄ jaaba ìsisibi esese me uwu ogwu ubọọn̄ inyi ọmọ ibe ekekpọ ọmọ chieen̄ me lek, mè isan̄a ọmọ mè nsabọn ibaan̄ kan̄ cha isun̄ esese me ere ònwọnwọn ichit me uwu ebibaan̄ ya.

¹⁰Esita ìkatumu inu geege ofolek ebi ido kiban̄ mè owot iman kan̄ ìnyi ene geege, mije, Mọdikai ìbe ikalululuk ìtumu ìnyi ene geege ibe ke ọmọ ìre ogwu Ju.

¹¹Usen geelek, Mọdikai îra ikinu inikijijen̄e ikana me isi oyet egep ere uwu ebibaan̄ ya, inyi ọmọ iriọọn̄ inu ofolek kè Esita, mè ike ekirọ me lek kan̄ me ere ya.

¹²Sabum obaak enenwaan̄ geelek mônisi isa lek kan̄ ijeen̄ ogwu ubọọn̄ Ayaserọs, enenwaan̄ ya ìbokup me okọbọm iso otuuk kè acha ge igọọk me ike edọmọbe inyi ebibaan̄ cha. Adasi onyan̄ gweregwen, mêsa aran̄ mâa iduuk ọmọ lek, mè iteek. Onyan̄ gweregwen keyilọ, mênisa esese chieen̄ aran̄ utop utop olu mè esese chieen̄ inu ekisa irọ inyi akpalek ebibaan̄ ijaan̄ iken ema. Ogwu isije itibi orirọ chi, mônenisa lek kan̄ isi ijeen̄ ogwu ubọọn̄ me mgbọ mgbọ kan̄ isi ire.

¹³Ikeyi ke obaak enenwaan̄ geelek obosa lek kan̄ isi ijeen̄ ogwu ubọọn̄. Inu geelek îdobe, mênyi, inyi isa igbaalek inan̄a me uwu ebibaan̄ isi uwu ogwu ubọọn̄.

¹⁴Me otu ikakwun̄, obaak enenwaan̄ ya môje isi uwu ogwu ubọọn̄. Isire ewelegwe, îra ika, mè iraka isi uwu ebibaan̄ eyi òso iba isi ikup me ubọk kè Sayasigaji ogwu ikwaan̄ ogwu ubọọn̄ esan̄abe òsok, ogwu òkikpọ chieen̄ me lek ebi ugan ogwu ubọọn̄. Ìkpoyaka isi isi ogwu ubọọn̄ igak ikeya, îtata ogwu ubọọn̄ ìraria ikwaan̄ igwen ọmọ me erieen̄ kan̄.

¹⁵Inenire mgbọ Esita obosi imun̄ ogwu ubọọn̄. Esita ìre gwun̄ kè Abiyali òrere ngwan̄ nte kè Mọdikai. Mọdikai ìmọmọnọ ọmọ ikpukpo isibi kubọk gwun̄ kan̄ enenwaan̄. Mgbọ Esita obonan̄a ije isi imun̄ ogwu ubọọn̄, ìkado inu geege ilọ me lek inu Egayi ogwu ibot ikwaan̄ uwu ebibaan̄ otemebe ọmọ. Esita onenijaan̄ enenen, mè ineme ebi geelek ìrerieen̄ ọmọ chieen̄ me lek.

¹⁶Enenisa Esita isi me isi ogwu ubọọn̄ Ayaserọs me uwu ubọọn̄ kan̄ me emen òso akọp onyan̄, òrere onyan̄ Tebet,[3] me òso acha jaaba me lek mkpulu kè Ayaserọs.

¹⁷Ogwu ubọọn̄ omama Esita igak otutuuk ebibaan̄ kechilọ, mè ibele ejit me lek kan̄ enenen igak me lek otutuuk obaak ebibaan̄ kechilọ. Eya orọ, ibeben okpibot ubọọn̄ eyi nwa ogwu ubọọn̄ ichit me ibot kè Esita. Esita onenikikpulu kubọk nwa ogwu ubọọn̄ me irek kè Basiti.

¹⁸Ogwu ubọọn̄ onenito ikpele ijọk inyi otutuuk ebi ibot mkpulu kan̄ mè ebi ibot ikwaan̄ kan̄ geelek isa inyi Esita umin mije îkanabe nwa ogwu ubọọn̄. Ogwu ubọọn̄ orọrọ usen ya usen iwọ-ifi me otutuuk ido geelek ọmọ okikpulu, inyi ebi ene ekasi ikwaan̄ me usen ya. Me usen ya, ogwu ubọọn̄ îche ogbogbo uche inyi ebi ene ike ògbegbe ibe ogwu ubọọn̄ inyi.

¹⁹Me òso mgbọ iba ebi obaak ebibaan̄ ekariọọn̄ge ebirieen̄ cha etitiin̄be, Mọdikai ọmọ òwa okweekbe irek me otunchit ogwu ubọọn̄ ya.

²⁰Ire, me ike mgbọ ya, igọọk me ida Mọdikai onyibe Esita, Esita ìkakpa ogwu ọmọ orebe mè ebi ido kiban̄ mè owot iman kan̄ ìnyi ene geege. Esita ìkirọ ida ikọ kè Mọdikai kubọk îrọbe mgbọ îlukbe melek kan̄ ikimin isibi.

²¹Me emen mgbọ ya, mgbọ Mọdikai okikweek isi ikwaan̄ me otunchit uwu ogwu ubọọn̄, Bigitana me Teres, ebi ibot ikwaan̄ ogwu ubọọn̄ ebi esan̄abe òsok eneninaan̄ ejit, mè itọt ikpakpan̄ ogwu ubọọn̄ Ayaserọs. Ife chi ene iba ìre ebi ìkibem otunchit uwu ogwu ubọọn̄.

²²Otitọt ya orere utọn̄ kè Mọdikai, Mọdikai oneniben otitọt ya ikpa inyi Esita nwa ogwu ubọọn̄. Esita obeben otitọt ya isi ikpa inyi ogwu ubọọn̄, mè itumu inyi ibe ke îre Mọdikai okpọk mbum otitọt ya.

²³Mgbọ enin̄be emen ikọ ya iweek, mè imun̄ ibe ke inu ya ìre atikọ, etatap ebi ikwaan̄ iba cha olik me ebek, mè itaba ema ikpan̄. Ogwu ubọọn̄ onyinyi ida, egege inu ya itap me emen ikpa mfufuk usen me usen òkikup me isi ogwu ubọọn̄.