Read obolo Esita 4 Bible Online

Esita 4 - obolo bible

Esita 4

¹Mgbọ Mọdikai omun̄be otutuuk inu ya òkirọ, itataba ofọnti òkup ọmọ me lek igwak, mè iyaka inimọnọ ekwut ufieejit itap, mè ikpulu ntọn̄ igwook me lek, mè ije inin̄ emen ama Susa, mè ikitaan̄ ukpo ito ito ujat ujat ikana ama,

²mè ije ikeya mege igbet isi otunchit uwu ogwu ubọọn̄, mè ikeke, ìkaje ìre otunchit ya, mije, kpekisa ekwut ufieejit me lek ije inire otunchit uwu ogwu ubọọn̄.

³Ere geelek etip ogwu ubọọn̄ ya mè ikan kan̄ ya orebe me otutuuk ido geelek, otutuuk ebi Ju ìkup me ere ya mîra inin̄ me uga ufieejit, mè èjin otu, mè ènin̄ uwu ito, mè edimi ito. Owuwa kiban̄ mîra itap ekwut ufieejit, mè ekpulu ntọn̄ egwook èchit lek.

⁴Mgbọ ebibaan̄ ebi ìkisi ikwaan̄ inyi Esita, mè ebi esan̄abe òsok ebi ìrere ebi ibot ikwaan̄ me uwu ebibaan̄, emun̄be Mọdikai melek ekwut ufieejit mè ntọn̄ me lek, ema esisi isi ikpa inyi Esita. Ejit osisisaak Esita enenen, iweweek ofọnti inyi ibe esa ejet Mọdikai isa inwene lek. Ire, Mọdikai ìkachieek ibọbọkọ ofọnti cha isa inwene lek.

⁵Esita ogwegwen Atak, ene ge me lek ebi ibot ikwaan̄ ogwu ubọọn̄ ebi esan̄abe òsok, ogwu òkikpọ ọmọ chieen̄ me lek, iria isi lek kè Mọdikai, ibe isi iweek iriọọn̄ inu òrọrọ mè ubọk inu ya ojebe.

⁶Atak onenije isi lek kè Mọdikai me oyet ile ama me isi otunchit uwu ogwu ubọọn̄.

⁷Mọdikai oneniben otutuuk inu cha òrọrọ ikpa inyi Atak, mè ibak otu ifuk ikpoko Aman ochieekbe use ikpekpe itap me uwu ikpoko ogwu ubọọn̄, inyi ekpan̄ otutuuk ebi Ju esan̄a kpai.

⁸Mọdikai îsan̄a si ikpa ikan ya isibi, eyi egebe igon ikana me ama Susa ibe ekpan̄ otutuuk ebi Ju esan̄a, mè isa inyi Atak ibe isa isi ijeen̄ Esita, mè ikpa otutuuk inu cha iwele inyi Esita. Mọdikai îtumu si inye inyi Atak ibe itumu inyi Esita ibe isi me isi ogwu ubọọn̄ isi ibeek mbeek me ibot ebi Ju, inyi ogwu ubọọn̄ ikaan̄ ejit nsan me lek ebi kan̄, ìrere ebi Ju.

⁹Atak onenigwu ikom, mè iniben otutuuk inu Mọdikai otumube inyi ọmọ ikpa inyi Esita.

¹⁰Esita oyayaka iria Atak ibe igwu ikom isi ilook Mọdikai ibe,

¹¹“Otutuuk ebi ikwaan̄ ogwu ubọọn̄ mè otutuuk ebi ido geelek ìkup me irak mkpulu ogwu ubọọn̄ mîriọọn̄ ibe ke kpunu enerieen̄ mè ìre enenwaan̄ geege ogwu òkikpọkpọ ije iraka inin̄ oyet egep eyi emen emen isi imun̄ ogwu ubọọn̄, me mgbọ ogwu ubọọn̄ ikagwenge ene ya. Ikan ge gaalek ogwu ubọọn̄ okaan̄be inyi ene ya ìre ikpakpan̄ ene ya. Îtata mè ogwu ubọọn̄ ìbebene okuba alata araran̄ kan̄ inyana ida ene ya, sabum ene ya môninwọnọ mkpa. Eyi n̄a, îra iso akọp usen ita, kpegwen emi ibe emi ǹnu me isi ogwu ubọọn̄.”

¹²Ubọk yaage si, Atak obeben etip kè Esita isi ilook Mọdikai.

¹³Mọdikai otutumu inyi Atak ibe isi ilook Esita ibe, “Kakeek me ejit kwun̄ ibe, mije owu okupbe me uwu ogwu ubọọn̄, ke owu gaalek me etete otutuuk ebi Ju mônwọnọ mkpa, ire ikpan̄ otutuuk ebi Ju isan̄a.

¹⁴Ire owu okpọkpọ iriaan̄ otu, me ike mgbọ òkup ikeyi, mè òkarọ inu geege, ntap-ubọk mè unyan̄a môkọt inan̄a me ofifi ere inu inyi ebi Ju. Ire, owu melek ebi uwu nte kwun̄ mêkwaan̄ ita. Usini mgbọ si, ekene oriọọn̄! Môkọt ire ibe ke îre mije ojelek mgbọ òkup ikeyi ke irek osibi inyi owu ònonin̄ emen uwu ogwu ubọọn̄.”

¹⁵Esita oyayaka iria ufọọk-otu ijet Mọdikai ibe,

¹⁶“Gwu kom fo, mè si titiin̄ otutuuk ebi Ju ìkup me Susa, mè ìjin otu ìriaak uriaak me ibot n̄a. Ikanwọ mudim, ikarie inorie mege usen ita, egwe mè eririeen̄. Emi si melek ebibaan̄ ebi ìkisi ikwaan̄ inyi emi, eji mêgọọk enyi ijin otu. Eji isijin otu iso usen, emi mânenisi isi ogwu ubọọn̄, ubọk geelek ibe ke îre ichachaka ikan. Ire isibi mkpa, mâkwu.”

¹⁷Mọdikai oneninan̄a ije ifo, mè isi irọ otutuuk inu ike Esita onyibe ida ibe erọ.