Read obolo Esita 5 Bible Online

Esita 5 - obolo bible

Esita 5

¹Me òso usen ita me lek ijin-otu ya, Esita onenisa ofọnti ubọọn̄ ibala lek isan̄a kubọk nwa ogwu ubọọn̄, mè itibi inin̄ emen oyet egep uwu ogwu ubọọn̄ eyi emen emen, mè ikeke ikeya me ere ya ikiyaka isi ida uwu-ile ogwu ubọọn̄. Me ike mgbọ ya, ogwu ubọọn̄ ọmọ òwa osikibe ikweek irek me inyọn̄ ogboon̄ ubọọn̄ kan̄ me emen uwu-ile ya ikiyaka isi ida isotu uwu-ile ya.

²Mgbọ ogwu ubọọn̄ obenebe chieen̄ imun̄ Esita ogwu nwa okekebe me emen oyet egep ya, ejit kan̄ obebele me lek kè Esita. Ibebene okuba alata araran̄ kan̄ inyana inyi Esita. Esita ojeje inu, mè initet ubọk me otu okuba ya.

³Ogwu ubọọn̄ onenido Esita ibe, “Esita nwa ogwu ubọọn̄, keke ore mbeek kwun̄? Kpa nyi emi, ke mârọ inyi owu. Ikerere ìkike iba ama ubọọn̄ n̄a ke oweek, mânyi owu.”

⁴Esita onenifọọk ibe, “Soso ogwu ubọọn̄, ire môneme owu, ǹkigwen owu melek kè Aman ibe enyi egbaan̄ enu ijọk inorie mè miin̄ me cherekeyi, mije, mbem lek iban owu.”

⁵Ogwu ubọọn̄ oraria etip mgbọ yaage igwen Aman ibe igwat lek inu, inyi ema erọ inu Esita otumube. Me usen yaage, ogwu ubọọn̄ melek Aman enunu ijọk ya Esita otobe inyi ogwu ubọọn̄.

⁶Mgbọ ema ekirie ijọk ya, ogwu ubọọn̄ onenido Esita ibe, “Ìre keke ke oweek? Tumu, ke mênyi owu. Ìre keke ore mbeek kwun̄? Tumu nyi emi, ke mânyi owu. Ikerere ìkike iba ama ubọọn̄ n̄a ke oweek, mânyi owu.”

⁷Esita onenifọọk ibe, “Mbeek n̄a mè inu nkiweek ìre ikeyi:

⁸Ire owu ogwu ubọọn̄ obele ejit me lek n̄a, mè ire ineme owu ogwu ubọọn̄ inyinyi emi inu nkiweek, mè irọrọ mbeek n̄a inyi emi, môneme emi ire owu ogwu ubọọn̄ melek Aman inye lek igwu ikom inu ofifi ijọk mbato inyi enyi me iyakwut. Enyi isinu me iyakwut, mânenifọọk owu ogwu ubọọn̄ ikọ ya odobe emi.”

⁹Usen ya, mgbọ Aman okinan̄a me uwu ogwu ubọọn̄ ikije isibi, ejit îbele ọmọ enenen. Ekwukwu kan̄ si îbene enenen mije unwọọn̄. Ire, mgbọ îjebe ire otunchit uwu ogwu ubọọn̄ iboraka isibi, mè imun̄ Mọdikai okupbe me ere ya, mè imun̄ ibe ke Mọdikai ìkanan̄a ìkeke ìtọp ọmọ amọn, ìkanyinyi si ọmọ ulibi geege me mgbọ îmun̄be ọmọ okije iraka, Aman onanaan̄ ejit enenen, mè ijọ ejit me lek kè Mọdikai.

¹⁰Ire, itetet lek kan̄, mè ije iraka ifo uwu kan̄. Irere uwu, iraria ikwaan̄ igwen ebi unene kan̄ mè Jeres ogwu nwa.

¹¹Mgbọ ebi îgwenbe cha enube, Aman obebene igugo lek ubọk ọmọ obọọn̄be ubọọn̄ enenen, mè ikaan̄ bọn iwa, mè ubọk ogwu ubọọn̄ otobe ọmọ me irek umin, mè ibene ọmọ igak otutuuk ebi ibot mkpulu mè ebi ibot ikwaan̄ ogwu ubọọn̄ geelek.

¹²Aman obebe si, “Ògak ge, Esita nwa ogwu ubọọn̄ ìkagwen ene geege ilọ emi gaalek ibe igọọk ogwu ubọọn̄ inu inirie inorie ijọk îtembe. Ìkata me ikeya, îkpọk igwen si emi melek ogwu ubọọn̄ ibe eji enu si ijọk inorie mè miin̄ me iyakwut òbowele!

¹³Ire, otutuuk inu chi ìkayaka ìkikup emi me lek kubọk inu geege nsikimumun̄ Mọdikai ogwu Ju okikweek irek me otunchit uwu ogwu ubọọn̄.”

¹⁴Jeres ogwu nwa mè otutuuk ebi unene kan̄ cha enenitumu inyi ọmọ ibe, “Egwuun̄ ọfọkọ eyi ubene kan̄ môrebe akọp mè ejit iba mè ìkike iba. Isigwuun̄ isan̄a, ewelegwe, tumu nyi ogwu ubọọn̄ ibe isa Mọdikai inyi esa esi etap olik me ebek ejeen̄ ekpan̄ me otu ọfọkọ ya. Mgbọ ya, owu mônenije me ubelejit igọọk ogwu ubọọn̄ isi irie inorie ijọk ya.” Nteme ya onenineme Aman enenen, inyinyi ida, egwugwuun̄ ọfọkọ ya.