Read obolo Esita 8 Bible Online

Esita 8 - obolo bible

Esita 8

¹Me usen yaage, ogwu ubọọn̄ Ayaserọs onenisa uwu kè Aman, ogwu oriara ebi Ju ya, inyi Esita nwa ogwu ubọọn̄. Mọdikai onenikinu me isi ogwu ubọọn̄, mije, Esita îkpa ubọk Mọdikai melek kan̄ erebe ulọk inyi ogwu ubọọn̄.

²Ogwu ubọọn̄ owọwọọk mkpọtubọk iman̄ òriọọn̄ òkup me ubọk kan̄, eyi îbọkọbe isan̄a me ubọk kè Aman, mè isa itap Mọdikai me ubọk. Esita onenisa Mọdikai ito me otuchieen̄ uwu kè Aman.

³Ofifi kan̄, Esita onenirọn̄ me ijọn̄ me ukot ogwu ubọọn̄, mè ikito ito ibeek ibe ikput ijo ntọt eyi Aman ogwu Agagi otọtbe ibak ebi Ju mè otutuuk inu geelek îrọbe ikeme ema.

⁴Ogwu ubọọn̄ onyanyana okuba alata araran̄ kan̄ inyi Esita, Esita onenibene lek igwuun̄ mè ikeke me isi ogwu ubọọn̄,

⁵mè ibe, “Ire ineme owu ogwu ubọọn̄, mè ire owu obele ejit me lek n̄a, mè ire omun̄ ibe ke îre inu ònenen mè itat ibe owu òrọ, soso, nyi ida ibe ege ikpa echon ekana esa efaan̄ ikpa echi Aman gwun̄ kè Amedata ogwu owot iman kè Agagi, okupbe me lek kan̄ itọt, mè ige ibosa ikpan̄ ebi Ju ìkup me ido geelek òkup me irak kwun̄ ogwu ubọọn̄ isan̄a kpai.

⁶Ìre kpa ubọk ke emi mâkọt isa chieen̄ imun̄ ijo inu òborọ ebi n̄a, mè ikọt ime? Sà ìre kpa ubọk ke emi mâmun̄ ubọk ekikpan̄ ebi owot iman n̄a otutuuk isan̄a, mè idaan̄ chieen̄?”

⁷Ogwu ubọọn̄ Ayaserọs ofọfọọk Esita nwa ogwu ubọọn̄ melek Mọdikai ogwu Ju ibe, “Nra isa uwu kè Aman inyi Esita. Aman me lek kan̄ si, mîjeen̄ ikpan̄ me otu ọfọkọ mije îyakabe isi kan̄ ida ebi Ju ikpakpan̄ ema isan̄a.

⁸Mgbọ yi, ìsa ubọk kinyi gaalek ìge ofifi ikan me erieen̄ ogwu ubọọn̄, ike înemebe enyi ofolek ebi Ju, mè ìsa mkpọtubọk ogwu ubọọn̄ ìgon iman̄ ìkam me lek. Mije, inu geelek egebe me erieen̄ ogwu ubọọn̄, mè isa mkpọtubọk kan̄ igon iman̄ me lek, kpekifaan̄.”

⁹Mgbọ yaage, egwegween̄ otutuuk ebi uti ikpa ogwu ubọọn̄ ititiin̄ me akọp usen ita mè iba me òso onyan̄ ita, òrere onyan̄ Sifan.[6] Ema enenige otutuuk inu Mọdikai onyibe ema ida ibe ege enyi ebi Ju, mè ebi ibot mkpulu ido geelek, mè ebi ibot mkpulu agan̄ geelek, mè ebi ibot mkpulu ebi ife geelek ìkup me efit mè akọp ido iba mè jaaba ogwu ubọọn̄ okikpulu, echi òbene me India inyana isi ire Etiopia. Ege ikan ya me ubọk ige inu eyi ebi ido geelek, me usem otutuuk ebi ife geelek me otutuuk ido geelek, mè isa ubọk ige inu mè usem ebi Ju ige si inyi ebi Ju.

¹⁰Ikeya ke Mọdikai oge ikan cha me erieen̄ ogwu ubọọn̄ Ayaserọs, mè isa mkpọtubọk iman̄ òriọọn̄ ogwu ubọọn̄ igon iman̄ ikam me lek, mè isa inyi ebi osat ìkikọp inyinya, ebi ìkikọp inyinya ogwu ubọọn̄ echi ekpukpobe ọkpọkpọ inyi ogwu ubọọn̄.

¹¹Ikan ogwu ubọọn̄ ya înyi ebi Ju me ama geelek unen ibe egbaan̄ etitiin̄, mè ebem lek kiban̄, mè ibe echep, mè ekpan̄, mè ejijaka urum akọn̄ ebi ido geelek mè ebi ife geelek, ebi mêbenbe akọn̄ inu me lek kiban̄, mè ekpan̄ ebibaan̄ mè nsabọn ebi ife cha, mè efum inu kiban̄.

¹²Usen esun̄be inyi ebi Ju ibe erọ inu yi, me otutuuk ido geelek ogwu ubọọn̄ Ayaserọs okikpulu, ìre òso akọp mè usen ita me òso akọp mè onyan̄ iba, òre onyan̄ Adari.

¹³Enyi ikpa ya ibe esun̄ kubọk ikan me ido geelek, mè efuk esibi enyi otutuuk ebi ife geelek, inyi eriọọn̄, inyi ebi Ju mêbem lek iban usen ya, irọrọ ebi ochicha kiban̄ useen̄ inu etọtbe irọrọ ema.

¹⁴Ebi osat ìkikọp inyinya ogwu ubọọn̄ echi ekpukpobe ọkpọkpọ inyi ogwu ubọọn̄ cha, esasa me ida ogwu ubọọn̄ ikọp isi ge isi ge ije. Mînyi si ikan yi me Susa, ama ibot.

¹⁵Mọdikai oneninan̄a me isi ogwu ubọọn̄ isibi, mè ofọnti ubọọn̄ eyi oluku oluku mè okuket me lek, mè ikpele okpibot ubọọn̄ eyi alata araran̄ me ibot, mè uga ofọnti inyọn̄ irio irio eyi atalek ekwut lilin̄. Ebi ama Susa edidimi igwook me ubelejit mè unwọọn̄.

¹⁶Me lek ebi Ju, mgbọ ya onenire mgbọ utoon̄[7] mè unwọọn̄ mè ubelejit, mè ire si mgbọ ebi ene ekinyi ema umin me ere geelek.

¹⁷Me ido geelek, me ama geelek, mè ere geelek etip ogwu ubọọn̄ mè ikan kan̄ orebe, ebi Ju ekikup me unwọọn̄ mè ubelejit mè ijọk melek irerie mè inwọnwọ. Owuwa ebi ofifi ido ekekikana ebi Ju, mije, ukpook ebi Ju înin̄ igak ema emen.