Read obolo Esita 9 Bible Online

Esita 9 - obolo bible

Esita 9

¹Òso akọp mè usen ita me òso akọp mè onyan̄ iba, òrere onyan̄ Adari, ore usen ya eyi eberọ inu etip ogwu ubọọn̄ mè ikan kan̄ obe erọ. Usen ya ke ebi ochicha ebi Ju ekikup ikpọ, inyi ema etim egak ebi Ju. Ire, inenitọbọ ema ilọ, mije, ubọk ebi Ju oyaka inibene igak eyi ebi ìchacha ema.

²Ebi Ju enenititiin̄ lek me ama kiban̄ geelek me otutuuk ido geelek ogwu ubọọn̄ Ayaserọs okikpulu, mè ibem lek ititim akọn̄ me lek ebi ìkiweek ijijijaka ema. Ene geege ìkakọt ikeke ìda ema, mije, ukpook kiban̄ înin̄ imin enenen me emen otutuuk ebi ofifi ido geelek.

³Otutuuk ebi ibot mkpulu ebi ife geelek, mè ebi ibot mkpulu ido geelek, mè ebi ibot mkpulu agan̄ geelek, mè ebi otuchieen̄ ikwaan̄ ogwu ubọọn̄ ekekitap ubọk inyi ebi Ju, mije, ukpook kè Mọdikai înin̄ ijot ema me emen.

⁴Mije, Mọdikai îsibi isi ene me uwu ogwu ubọọn̄, etip kan̄ otataan̄ ikana otutuuk ido geelek, ọmọ si okpọkpọ ikikaan̄ unye isọkọ unye.

⁵Ebi Ju esasa oge akọn̄ isọp otutuuk ebi ochicha kiban̄ igwook, mè ikpan̄ ema, mè ijijaka ema, mè irọ ebi ìchacha ema inu òneneme ema irọrọ.

⁶Me emen ama Susa òre ama ibot, ebi Ju mîkpan̄ mè ijijaka efit ene go.

⁷Ema mîkpan̄ si Parasandata, mè Dalifọn, mè Asipata,

⁸mè Porata, mè Adalia, mè Aridata,

⁹mè Paramasita, mè Arisai, mè Aridai, mè Fayijata,

¹⁰akọp ibot bọn ebirieen̄ kè Aman gwun̄ kè Amedata, ogwu ochicha ebi Ju. Ire, ema kpechak ubọk me lek inu geege ifum.

¹¹Usen yaage, mîkpa otu ifuk ebi ekpan̄be me Susa ama ibot inyi ogwu ubọọn̄.

¹²Ogwu ubọọn̄ onenitumu inyi Esita nwa ogwu ubọọn̄ ibe, “Ebi Ju mîkpan̄ mè ijijaka efit ene go, mè akọp ibot bọn ebirieen̄ kè Aman me emen ama mgban Susa. Ìre keke ke erọ me ofifi agan̄ ido kechilọ cha echi ogwu ubọọn̄ okikpulu? Mgbọ yi, ìre keke ke oweek? Mânyi owu. Ìre keke ore mbeek kwun̄? Mânyi owu.”

¹³Esita onenifọọk ibe, “Ire ineme owu ogwu ubọọn̄, nyi ebi Ju ìkup me Susa unye ibe esi erọ si me iyakwut òbowele ubọk ikan chereyi okupbe, mè ejeen̄ nkwukwu akọp ibot bọn ebirieen̄ kè Aman cha me otu ọfọkọ.”

¹⁴Ogwu ubọọn̄ onyinyi si ida ibe erọ si ikeya ekpọ me lek. Ikeya si ke înyi ikan me Susa, ejejeen̄ nkwukwu akọp ibot bọn ebirieen̄ kè Aman me otu ọfọkọ.

¹⁵Ebi Ju ìkup me Susa egbagbaan̄ lek itọbọ me òso akọp mè usen ini me onyan̄ Adari, me ìkpan̄ efit ene ita me emen ama Susa. Ire, ema kpechak ubọk me lek inu geege ifum.

¹⁶Ike mgbọ ya, ebi Ju kechilọ ìkukup me agan̄ kechilọ, echi òkup me irak mkpulu ogwu ubọọn̄, egbagbaan̄ lek kiban̄ itọbọ, inyi ema ebem lek, mè enyan̄a lek me ubọk ebi ochicha kiban̄. Ema mîkpan̄ akọp obop ene jaaba mè obop go me lek ebi ochicha. Ire, ema kpechak ubọk me lek inu geege ifum.

¹⁷Inu yi ìrọ me òso akọp mè usen ita me onyan̄ Adari. Me òso akọp mè usen ini, ema ewọwọ ifi, mè isa usen keya irọ usen ijọk mè unwọọn̄.

¹⁸Ebi Ju ebi ìkup me Susa etitiin̄ lek me òso akọp mè usen ita mè òso akọp mè usen ini itim akọn̄ me lek ebi ochicha kiban̄. Ire, me òso akọp mè usen go, ema ewọwọ ifi, mè isa usen keya irọ usen ijọk mè ubelejit.

¹⁹Eya orọ, ebi Ju ebi ìluk me asabọn ama, echi kpenama mgban ikana, ekisun̄ akọp mè usen ini me onyan̄ Adari kubọk usen unwọọn̄ mè ijọk, mè usen ema ekichiche uche inyi lek kiban̄, me ene me ene.

²⁰Mọdikai onenige inu chi geelek itap me ikpa, mè iniria ikpa ijet otutuuk ebi Ju ìkup me mgbet ere, mè ebi ìkup me ujọn̄ọ ere me ido geelek ogwu ubọọn̄ Ayaserọs okikpulu,

²¹ibe ema egobo òso akọp mè usen ini mè òso akọp mè usen go me onyan̄ Adari me acha geelek

²²kubọk usen ebi Ju enwọnọbe me ubọk ebi ochicha kiban̄ mè isiki efuuk, mè emọnọ onyan̄ ya kubọk onyan̄ eyi ufieejit kiban̄ okanabe unwọọn̄, ito kiban̄ onenikana ubelejit. Îge si ibe ema esun̄ usen chi kubọk usen ijọk mè ubelejit, mè usen ebekiche inorie inyi lek kiban̄, me ene me ene, mè ikiche uche inyi si ebi ugbọọn̄.

²³Ebi Ju ebọbọkọ itap ibe ke ema mêkirọ orirọ ya ema ebenebe, kubọk Mọdikai ogebe me ikpa ijet ema.

²⁴Mije, Aman gwun̄ kè Amedata, ogwu owot iman kè Agagi, ogwu oriara ebi Ju, îtọt ijijijaka ebi Ju, mè itọp puru, eyi òrere nriroon̄, ibosa ijijaka ema mè ichep ema isan̄a.

²⁵Ire, mgbọ Esita onube me isi ogwu ubọọn̄ inikpa inu ya inyi, ogwu ubọọn̄ ogege ikpa inyi ida, ijo otitọt Aman otọtbe inyi ebi Ju okakana itoon̄ ọmọ me ibot. Ejejeen̄ ọmọ mè ebi bọn ikpan̄ me otu ọfọkọ kan̄.

²⁶Eya orọ egwenbe usen ijọk chi Purim inan̄a me lek erieen̄ puru ya. Mije inu egebe me ikpa kè Mọdikai, mè inu echi ema emun̄be, mè inu echi òrọrọn̄ ikeme ema,

²⁷ebi Ju emọmọnọ itoon̄ me ibot kiban̄ mè ibot ebi owot iman kiban̄, mè ibot ebi geelek ìgọgọbọ me lek kiban̄, ibe ke ema mêkisun̄ orọmijọn̄ ya, ke ema kpebelọlọ ikekisun̄ usen iba chi me acha geelek ubọk egebe ibe erọ, me ibot mgbọ ebe ekerọ.

²⁸Ema mîtumu si ifieek ibe ke ema mêkikeek usen chi, mè ikisun̄ me ukot me ukot, me ototun̄ ukan̄ me ototun̄ ukan̄, me ido me ido, me ama me ama, mè itumu si ifieek ibe ke ema ebi Ju kpebetele ibe usen Purim chi ichep me etete kiban̄, ke ikekeek usen chi ìkpochep me etete ebi owot iman kiban̄ mege ire mgbọ geelek.

²⁹Esita nwa ogwu ubọọn̄, òrere gwun̄ enenwaan̄ kè Abiyali, melek kè Mọdikai ogwu Ju, enenisa unye kiban̄ òjot òjot ige ikpa isa ibieen̄ adasi ikpa eyi Mọdikai ogebe òfo me lek Purim inye.

³⁰Mọdikai oneniria ikpa eyi esuuk mè atikọ ijet otutuuk ebi Ju me efit mè akọp ido iba mè jaaba òkup me ìrak mkpulu kè Ayaserọs,

³¹ibe ema ekesun̄ usen Purim chi me mgbọ edọmọbe itap, kubọk Mọdikai ogwu Ju mè Esita nwa ogwu ubọọn̄ enyibe ema ida, kubọk ema esun̄be inyi lek kiban̄ mè owot iman kiban̄, igọọk me lek ibot mgbọ ijin-otu mè ufieejit kiban̄.

³²Ida Esita onyibe onenirọ inu edọmọbe òfo me lek Purim inye, egege si itap me ikpa.