Read obolo Isis 10 Bible Online

Isis 10 - obolo bible

Isis 10

¹Okumugwem onenitumu inyi Mosis ibe, “Je si mun̄ ogwu Fero, ke nra irọ inyi ejit kan̄ mè ejit ebi ibot ikwaan̄ kan̄ inye, mè ǹsa me ikeya ǹrọ owuwa inu ukechieen̄ chi mweekbe irọrọ isa ijeen̄ unye n̄a me etete ebi Ijipiti.

²Ǹkiweek si irọrọ inu chi, inyi enyi ebi Ijeren esa ekekpa enyi bọn kinyi mè bọn bọn kinyi ibe ke emi nrọ ebi Ijipiti ekana inu ochak, ke emi nrọ owuwa ikpele inu ukechieen̄ me etete kiban̄. Enyi me lek kinyi si mêsa mije keyi iriọọn̄ ibe ke emi nre Okumugwem.”

³Mosis mè Erọn enenije isi ichichini melek ogwu Fero, mè itumu inyi ibe ke Okumugwem Awaji ebi Iburu ìkido owu ibe, “Ìre si re kpasi mgbọ ke owu obojit isisiki lek kwun̄ me isi n̄a? Tele ebi n̄a eje, inyi esi efaka mfaka enyi emi.

⁴Ire owu ojit itetele ibe ebi n̄a enan̄a efon, kpọ emi gwa ǹkiria akaka ituuk itap me inyọn̄ ijọn̄ ido kwun̄ me iyakwut òbowele.

⁵Akaka ituuk cha môchit otutuuk inyọn̄ ijọn̄ ke bùk, ire lek chieen̄ ene ìkpoyaka imun̄ achiaan̄ òkup me ijọn̄. Inu geelek ibot mgbọlọ ojijakabe isik me ijọn̄ kinyi, akaka ituuk cha môtaka isan̄a kpai, mè itaka si inwan̄ isan̄a me lek otutuuk inu geelek òkitibi me uko.

⁶Ògak otuuk, akaka ituuk cha mônin̄ ijot otutuuk uwu kwun̄, mè inin̄ si ijot otutuuk uwu ebi ibot ikwaan̄ kwun̄, mè inin̄ ijot uwu otutuuk ebi Ijipiti. Eyi ìre inu ebi nte kinyi mè ebi nte nte kinyi kperarak ìmun̄ me ugwem kiban̄, karake ema elukbe me inyọn̄ ijọn̄ keyi mege inire chereyi.” Ikọ ya itata Mosis me otu, igwugwu ikom, mè ije inan̄a isibi itele ogwu Fero.

⁷Ebi ibot ikwaan̄ ogwu Fero enenikido ogwu Fero ibe, “Ìre ene yi ìbokana ufe inyi eji isi ire mgbọ owa? Tele mè ife chi efon esi efaka mfaka enyi Okumugwem Awaji kiban̄! Ìre òkafat ìriọọn̄-nu ibe ke ido Ijipiti îchep isan̄a?”

⁸Enenisi isa Mosis mè Erọn iyaka inu me isi ogwu Fero. Ogwu Fero otutumu inyi ema ibe, “Ngwa, ìsibi ìfon ìsi ìfaka mfaka ìnyi Okumugwem Awaji kinyi. Ire, ìtumu-nu, ìre ebi owa mè ebi owa ebesi?”

⁹Mosis ofọfọọk ọmọ ibe, “Îre eji otutuuk ene ebesi, eji ugane mè nsabọn. Eji mêsa otutuuk nsabọn kiji ebirieen̄ mè ebibaan̄ igbaalek ije, mè isa si otutuuk anam kiji, eriembuuk mè arọọn̄ mè ebot igbaalek, kpunu geege òbosik. Mije, eyi îre mfaka eji otutuuk ebefaka inyi Okumugwem.”

¹⁰Ogwu Fero orọrọ ema inu ochak, mè ibe ema, “M̀mm̀! Kè Okumugwem ikup melek kinyi! Ìre enyi ekikeek ibe ke mâtele ibe enyi esa nsabọn kinyi egbaalek eje? Me atikọ, îkaan̄ ijo otitọt enyi ebenbe me ejit!

¹¹Ire ekiket kinyi ire eya, ǹkachieek! Enyi, ebirieen̄ gaalek, ìje ìsi ìfaka mfaka ìnyi Okumugwem, mije, îre inu enyi ekibeek karake mgbọ ire eya.” Ikọ yi itata me otu ogwu Fero, elalap Mosis mè Erọn isibi me isi ogwu Fero.

¹²Okumugwem onenitumu inyi Mosis ibe, “Nyana ubọk kwun̄ fo inyọn̄ nyi agan̄ ido Ijipiti, inyi akaka ituuk inin̄ ijot, mè ichit otutuuk inyọn̄ ijọn̄ Ijipiti, mè itaka mbubet mè otutuuk inu geelek ibot mgbọlọ ya ofiatbe isik isan̄a kpai.”

¹³Mosis obebene mkpat kan̄ ifo inyọn̄ inyi agan̄ Ijipiti. Okumugwem odada efet agan̄ mbum-ura iyaka ijeen̄ agan̄ ido Ijipiti otutuuk egwe usen ya mè otutuuk eririeen̄. Sabum ewelegwe kan̄, efet ya osasa akaka ituuk initap ijot ido Ijipiti gboi.

¹⁴Akaka ituuk cha oninin̄ ijot otutuuk inyọn̄ ijọn̄ ido Ijipiti bùk, mè igwook ichit otutuuk ere, mè itiik ibene. Kpunu ere geege òsisik. Akaka ituuk ìkararak ìjot ido Ijipiti ikeya karake Ijipiti osibibe, ìkpoyaka ijot si ikeya mgbọ geege.

¹⁵Akaka ituuk cha ìchichit otutuuk inyọn̄ ijọn̄ bùk, mè ifit, kpemọọn̄ achiaan̄ ijọn̄. Otutuuk inu ibot mgbọlọ ojijakabe isik, akaka ituuk cha îtaka isan̄a kpai, bene me lek mbubet re lek otutuuk mfut uti. Kpunu inwan̄ geege, mè ìre mbubet, mè ìre inwan̄ uti òyayaka isik me otutuuk ido Ijipiti.

¹⁶Ogwu Fero imumun̄ inu yi òrọrọ, igwagwat lek iria ikwaan̄ igwen Mosis mè Erọn, mè itumu inyi ema ibe, “Mgbọ keyi, mmun̄ ibe ke nrọ Okumugwem Awaji kinyi ilọ, mè irọ enyi si ilọ.

¹⁷Eya orọ, soso tele ijo n̄a nyi emi mgbọ ge keyi si, mè riaak Okumugwem Awaji kwun̄ ibe iben osusut eyi mkpa keyi isan̄a emi me lek.”

¹⁸Mosis onanan̄a me isi ogwu Fero isibi ifo, mè isi iriaak Okumugwem me ibot ebi Ijipiti.

¹⁹Okumugwem onwenwene efet ya, mè iyaka inisa atalek unye efet agan̄ ichep-ura inu. Efet keya owuwut, mè ikpulu otutuuk akaka ituuk cha isan̄a me inyọn̄ ijọn̄ Ijipiti isi igwook me emen okwaan̄ Anyiaan̄. Akaka ituuk geege ìkayaka ìsik me ere geege me otutuuk inyọn̄ ijọn̄ Ijipiti.

²⁰Ire, Okumugwem orọrọ inyi ejit ogwu Fero ikpọkpọ inye. Ìkachieek itetele ibe ebi Ijeren enan̄a efon.

²¹Okumugwem onenitumu inyi Mosis ibe, “Nyana ubọk kwun̄ fo inyọn̄, inyi udun inin̄, mè idun ere geelek me ido Ijipiti. Udun keyi ìbogogon ere ichit bùk.”

²²Mosis obebene ubọk ifo inyọn̄, atalek okpukpuk udun oninin̄, mè ikana otutuuk ido Ijipiti ichit bùk, mè igon ere ichit ikeya otuuk kè usen ita.

²³Ene geege ìkakọt ìmọọn̄ ogwu òkup me agba lek kan̄. Otutuuk ene ekpọkpọ ibia ikeya me ere geelek ema ekupbe, kpunu inanan̄a ikeke ije isi ere geege, mege usen ita. Ire, utoon̄ okekitoon̄ me otutuuk agan̄ ere ebi Ijeren elukbe.

²⁴Ogwu Fero onenigwen Mosis, mè itumu inyi ibe, “Ngwa, ìfon ìsi ìfaka mfaka ìnyi Okumugwem, mè ìsa nsabọn kinyi ìgbaalek ìje. Ire, ìjuuk eriembuuk kinyi mè arọọn̄ mè ebot kinyi ìtele.”

²⁵Ire, Mosis ofọfọọk ọmọ ibe, “Ire ikeya, owu me lek kwun̄ nyi eji anam ma, inyi eji esa esi egwa ngwugwa echi ewọwọp mè echi kpewọwọp enyi Okumugwem Awaji kiji.

²⁶In̄-in̄, ìkpokọt ire ikeya, otutuuk anam kiji ìbogọgọọk eji ije, kpunu geege eji ebetele. Mije, îre me etete kiban̄ ke eji ebegobo anam ògbegbe isa igwa ngwugwa inyi Okumugwem Awaji kiji. Mege ire mgbọ eji mêrebe ere eji ebefaka mfaka ya, eji kpebekọt iriọọn̄ anam echi eji ebesa igwa ngwugwa.”

²⁷Ire, Okumugwem orọrọ inyi ejit ogwu Fero inye, ìkachieek itetele ebi Ijeren enan̄a esibi efon.

²⁸Ogwu Fero otutumu inyi Mosis ibe, “Je nan̄a emi me isi! Mun̄ ibe ke òkayaka ìkpọk ìnu me isi n̄a ofifi! Usen geelek owu môyakabe inu inimun̄ emi isi, usen ya ke owu obokwu.”

²⁹Mosis ofọfọọk ọmọ ibe, “Owu otumu itat. Emi si m̀kpayaka ikpọk imun̄ owu isi ofifi.”