Read obolo Isis 12 Bible Online

Isis 12 - obolo bible

Isis 12

¹Okumugwem onenitumu inyi Mosis melek Erọn me ido Ijipiti ibe,

²“Onyan̄ keyi môkana ire adasi onyan̄[7] isa inyi enyi, môre adasi onyan̄ me ifuk acha eyi kinyi.

³Ìtumu ìnyi otutuuk ebi Ijeren ibe, me òso akọp usen me onyan̄ yi, ogwu enerieen̄ geelek igobo gwun̄ arọọn̄ ge isun̄ inyi ototun̄ ukan̄ kan̄. Ìbore, ototun̄ ukan̄ ge, gwun̄ arọọn̄ ge.

⁴Ire ikaan̄ ototun̄ ukan̄ òsisip enenen ire lek ema kpebekọt itaka ototuuk gwun̄ arọọn̄ ge isan̄a, ema egbaan̄ eche melek ofifi ototun̄ ukan̄ òkup iriaak ema. Ebeche igọọk me otu ifuk ene ìkup me ototun̄ ukan̄ cha, inyi ene geelek ikaan̄ uche eyi môsobe ọmọ, eyi ọmọ môkọtbe itaka isan̄a.

⁵Anam yi enyi mêgobobe môre orie arọọn̄ mè ìre orie ebot òsoso acha ge, mè ire si eyi otutuuk lek osobe ikup, eyi kpunube ìroon̄ geege me lek.

⁶Enyi mêkpọ chieen̄ me lek anam yi mege ire akọp mè usen ini eyi onyan̄ yi. Me òso akọp mè usen ini ya, otutuuk ido ebi Ijeren mêtitiin̄, mè ikpan̄ anam ya me agan̄ ikakwun̄ usen ya.

⁷Ema isikpan̄ anam ya, esa usini eje echiọọk me ebek isotu mè lek ubọk afọn̄ agan̄ iba me lek uwu geelek ere ema mêkupbe itaka anam ya.

⁸Ema mêtaka anam ya me ikakwun̄ yaage. Ebewọwọp anam ya me ukan̄, mè isa inwan̄ òjajat mè fituru kpunube olat me lek igbaalek itaka anam ya.

⁹Ekataka anam ya njijoon̄, ekatatap si mun̄ me lek ìtem. Ire, ewọwọp otutuuk anam ya me ukan̄, bene me ibot mè ukot mè otutuuk okpu mè nkat owot anam ya.

¹⁰Ìtaka otutuuk anam ya ìsan̄a me eririeen̄ yaage, okpọkọ geege ikasik ìwele egwe. Ire ikaan̄ eyi òsisik iwele egwe, ewọwọp otutuuk etaka eriọk me ukan̄.

¹¹Ubọk enyi eberie inorie mfaka yi ìre ikeyi: Ìsa fanti ìtobo ofọnti kinyi ìnye me ebon kinyi, mè ìtap ikpukot me ukot kinyi, mè ìtet mkpat kinyi ìkaan̄ me ubọk, mè ìrie inorie ya ugwat ugwat. Mije, îre mfaka Isasaba Iraka isa inyi emi Okumugwem.[8]

¹²“Me eririeen̄ usen ya, emi mâje itibi otutuuk ido Ijipiti, mè ikpan̄ otutuuk adasi bọn ebirieen̄ geelek ebilene emanbe, mè adasi orie bọn anam geelek. Mâsulu otutuuk awaji ebi Ijipiti osusut. Emi nre Okumugwem.

¹³Eje ya, eyi enyi echiọọkbe me lek uwu geelek enyi elukbe me emen, môre inu òriọọn̄ inyi emi. Mgbọ nsimun̄ eje ya, mâsaba iraka enyi. Ùrioon̄ mkpan̄-ene ya ìkpore enyi lek mgbọ mâkpan̄be adasi bọn ebirieen̄ me Ijipiti.

¹⁴“Usen yi ìbore usen enyi ebekisun̄ isa ikikeek inu yi. Acha geelek, enyi mêkirie ijọk usen yi kubọk mfaka inyi Okumugwem, enyi mè bọn kinyi mè bọn bọn kinyi me ukot geelek. Ikalọlọ ikekifaka mfaka yi acha geelek. Eyi ìre ikan òbokup ire ukot geelek.

¹⁵Mgbọ enyi mêkifaka mfaka yi, enyi mêkitaka fituru ekatapge olat me lek otuuk usen jaaba eyi mfaka ya. Eya orọ, me adasi usen mfaka ya, enyi mêsan̄a otutuuk olat mè inu geelek òkakaan̄ olat me lek isan̄a me uwu kinyi. Mije, bene me adasi usen mege isi ire òso usen jaaba, ogwu geelek òrerie inu geelek olat okupbe me lek, ebesasan̄a ene ya isan̄a me otu ifuk ebi Ijeren.

¹⁶Me adasi usen ya, enyi mênin̄ ntitiin̄ mbuban, mè ikpọk inin̄ ojelek ntitiin̄ yaage si me òso usen jaaba eyi mfaka ya. Ikarọ ikwaan̄ geege me usen iba kechi, îtata ikwaan̄ eyi irọrọ inorie enyi eberie gaalek.

¹⁷“Ìkifaka mfaka ijọk Fituru Kpunu Olat yi acha geelek ìkisa ìkeek usen yi, mije, îre me achubọk usen yi ke nsan̄a enyi, me urum me urum, isibi me ido Ijipiti. Enyi mêkisun̄ usen yi kubọk mfaka me acha geelek, me ukot geelek. Eyi ìre ikan òbokup ire ukot geelek.

¹⁸Me adasi onyan̄, enyi mêkitaka fituru kpunube olat me lek, bene me agan̄ ikakwun̄ eyi òso akọp mè usen ini, mege isi ire agan̄ ikakwun̄ eyi òso akọp usen iba mè ge.

¹⁹Ekamun̄ olat geege me uwu kinyi otutuuk usen jaaba cha. Ogwu geelek òrerie inu geelek olat okupbe me lek, ebesasan̄a ene ya isan̄a me otu ifuk ebi Ijeren, mè ìre ogwu ichen mè ìyaka ire gwun̄ owot ido Ijeren.

²⁰Me ere geelek enyi elukbe, ikarie inorie geege òkaan̄ olat me lek me mgbọ ijọk yi. Fituru kpunube olat me lek gaalek ke enyi ebekitaka.”

²¹Mosis onenigwen ebi ugane Ijeren ititiin̄, mè itumu inyi ema ibe, “Ìgobo anam ìnyi ebi ototun̄ ukan̄ kinyi, mè ìtet ìkpan̄ ìsa ìrie ijọk mfaka Iraraka yi.

²²Ìsa okwa ìrak eje anam ya, mè ìsa efit inwan̄ mbubet isop ìjiin̄ me emen, mè ìsa ìken me ebek isotu kinyi mè ubọk afọn̄ kinyi agan̄ iba. Ene geege ikanan̄a me emen uwu kan̄ ìsibi oyet otuuk eririeen̄ ya, mege egwe môwelebe.

²³Mgbọ Okumugwem isinije itibi ido Ijipiti, mè ikikpan̄ ebi Ijipiti, mômun̄ eje ya me ebek isotu kinyi mè ubọk afọn̄ kinyi agan̄ iba, mè ije iraka isotu kinyi. Ìkpochieek ibe ogwu osat òkikpan̄ ene ya inin̄ uwu kinyi inikpan̄ ene.

²⁴“Ìkisun̄ nteme yi, mè ikana ikan inyi enyi mè bọn kinyi mege ire ukot geelek.

²⁵Mgbọ enyi isire inyọn̄ ijọn̄ ya eyi Okumugwem obonyi enyi kubọk îtumube, ikalọlọ ikekifaka mfaka yi.

²⁶Mgbọ nsabọn kinyi isido enyi ibe, ‘Ìre orirọ yi ìkeke inyi keke?’

²⁷Enyi mêfọọk ema ibe ke îre ngwugwa eyi ekigwa inyi Okumugwem, mije îsababe iraka uwu ebi Ijeren me Ijipiti, ìkakpan̄ ene geege me emen, me mgbọ îkikpan̄ ebi Ijipiti.” Mgbọ ebi Ijeren ebọkọbe nteme chi isan̄a, ema egegele ibot isiki me ijọn̄, mè itọbọ ebum inyi Okumugwem.

²⁸Ebi Ijeren ejeje inan̄a, mè isi irọ otutuuk inu cha Okumugwem otumube inyi Mosis mè Erọn ibe etumu enyi ema.

²⁹Me ejit eririeen̄ usen ya, Okumugwem okpakpan̄ otutuuk adasi bọn ebirieen̄ me ido Ijipiti, ibene me lek adasi gwun̄ enerieen̄ ogwu Fero, ogwu òkup me inyọn̄ ogboon̄ ubọọn̄ kan̄, ire lek adasi gwun̄ enerieen̄ ogwu mkpọn òkup me uwu mkpọn, mè ikpan̄ si ire lek adasi orie bọn anam uwu geelek.

³⁰Me usen ya, ogwu Fero onanan̄a ikeke me ejit eririeen̄, ọmọ mè ebi ibot ikwaan̄ kan̄, mè otutuuk ebi Ijipiti. Uga ito okekidimi me otutuuk uwu geelek me ido Ijipiti, mije, kpunu uwu ebi Ijipiti geege eyi ene ikakwuge me emen.

³¹Me ejit eririeen̄ ya, ogwu Fero oraria etip igwen Mosis mè Erọn, mè ibe ema, “Ngwa! Ìnan̄a! Ìsibi me etete ebi n̄a! Ìfon, enyi mè otutuuk ebi Ijeren. Ìsibi ìsi ìfaka mfaka ìnyi Okumugwem ike enyi etumube.

³²Ìkpulu eriembuuk kinyi, mè arọọn̄ kinyi mè ebot kinyi ike enyi etumube, ìsa ìsibi ìfon, mè ìgbana si emi.”

³³Otutuuk ebi Ijipiti ekekirọ ebi Ijeren me lek unye unye, mè ikibe ema, “Ìgwat lek ìsibi ìfon, ke eji mîkwaan̄ ita.”

³⁴Ebi Ijeren kpeyaka ikaan̄ irek itap olat me emen akpa ekọkọk emian̄abe ibesa irọ fituru. Ekpọkpọ ikpulu akpa cha ikeya owut owut me emen okwa, mè isa ekwut ikat, mè iben ikeya itoon̄ me oguga isa ije isibi me Ijipiti.

³⁵Ebi Ijeren ebebeek inu alata okuket mè echi alata araran̄ mè ekwut mè ofọnti me ubọk ebi Ijipiti, ike Mosis otemebe ema ibe erọ.

³⁶Okumugwem orọrọ inyi ebi Ijipiti ekaan̄ ata ejit me lek ebi Ijeren, mè enyi ema inu geelek edobe. Ebi Ijeren esasa me ikeya ikwọọk ido Ijipiti irak.

³⁷Ebi Ijeren ebebene ije ije ukot ukot inan̄a me ama Rameses ikifo ama Sukot. Otu ifuk ebirieen̄ ebi ìnanan̄a ije yi mîso efit obop ebirieen̄ gweregwen. Kpefuk ebibaan̄ mè nsabọn igbaalek.

³⁸Owuwa ebi kpere ebi Ijeren mîgọọk si ebi Ijeren inan̄a isibi me Ijipiti, melek ogbogbo anam, ebi kè eriembuuk, mè arọọn̄ mè ebot.

³⁹Mgbọ ebi Ijeren erebe oniin̄, ema enenisa njijoon̄ akpa emian̄abe ya irọ fituru kpunube olat me lek. Ema kpekaan̄ mgbọ itap olat me lek njijoon̄ akpa emian̄abe ya mgbọ ema ekupbe me Ijipiti, mije erieen̄be ema isibi me Ijipiti efuuk efuuk. Mije keya si, ema kpekaan̄ mgbọ irọ inorie ema eberie me oniin̄.

⁴⁰Otu ifuk acha ebi Ijeren elukbe me Ijipiti ìre efit acha ini mè akọp ita.

⁴¹Me achubọk mgburudun̄ usen eyi òso efit acha ini mè akọp ita ya ke otutuuk kiban̄, ìrere otoko eyi Okumugwem, enan̄a me Ijipiti isibi ifon.

⁴²Okumugwem ìgwọgwọk chieen̄ me eririeen̄ usen ya imun̄ ibe ke ọmọ îsan̄a ema isibi me Ijipiti. Îre mije keyi ke ebi Ijeren esun̄ eririeen̄ yi esese inyi Okumugwem, inyi ire eririeen̄ eyi otutuuk ebi Ijeren ekitop chieen̄ isa imin Okumugwem, me ukot geelek.

⁴³Okumugwem onenitumu inyi Mosis mè Erọn ibe ke ikan òbokikpulu ijọk Iraraka ìre ikeyi: “Ogwu ichen geege ìkporie inorie ijọk yi.

⁴⁴Ogwu usun̄ geelek elelep môkọt irie, ire enyi ifieek ọmọ afi.

⁴⁵Ogwu ichen ògọgọọk enyi iluk, mè ogwu ichen ogwu egwegwen me ọkọ ibe inisi ikwaan̄, ìkaborie.

⁴⁶“Ebi ototun̄ ukan̄ geelek ebetitiin̄ me uwu ge gaalek ikup irie inorie ijọk yi. Kpebesa anam ya inan̄a me uwu isibi oyet. Ukwuuk anam ya si, kpebefan̄a.

⁴⁷Otutuuk otoko ebi Ijeren mêfaka mfaka yi.

⁴⁸“Ire ogwu ichen òkup me etete kinyi iweek igọgọọk ifaka mfaka Iraraka yi inyi Okumugwem, mêdadasi ifieek otutuuk ebirieen̄ ìkup me uwu kan̄ afi. Isirọ ikeyi isan̄a, ọmọ môkọt irie inorie Iraraka yi. Mije, ọmọ ìyaka inikup kubọk gwun̄ owot ama. Ene geelek ekafieekge afi, ìkporie.

⁴⁹Ikan ge gaalek òkup inyi gwun̄ owot okup si inyi ogwu ichen òluk me etete kinyi.”

⁵⁰Otutuuk ebi Ijeren erọrọ otutuuk inu chi, ike Okumugwem onyibe Mosis mè Erọn ida ibe erọ.

⁵¹Usen yaage ke Okumugwem osan̄a otutuuk ebi Ijeren isibi me Ijipiti, me otoko me otoko.