Read obolo Isis 15 Bible Online

Isis 15 - obolo bible

Isis 15

¹Mosis melek otutuuk ebi Ijeren enenisan̄a okwa ikikọt isa ikitọn̄ Okumugwem ibe ikeyi: “Mâkọt okwa itọn̄ Okumugwem, mije, ọmọ îtim ikpan̄ me ikpele umin. Îtọọn̄ inyinya mè ebi ìkikọkọp ifiin̄ me okwaan̄.

²Okumugwem ore unye n̄a, ọmọ otap emi okwa me otu; ọmọ ore ogwu unyan̄a n̄a. Ọmọ ore Awaji n̄a, emi mâtọn̄ ọmọ; ọmọ ore Awaji kè nte n̄a, emi mâbene ọmọ ifo inyọn̄.

³Okumugwem ìre ogwu usọ akọn̄; Okumugwem ore erieen̄ kan̄.

⁴Uji akọn̄ ogwu Fero mè urum akọn̄ kan̄ ke Okumugwem otọọn̄ ifiin̄ me okwaan̄. Ata ebi ibot akọn̄ ogwu Fero ogogobo isun̄ mîchieen̄ ita me okwaan̄ Anyiaan̄.

⁵Irem okwaan̄ îrie ema; ema mîgen ibia me ejit mun̄ kubọk ewuuk.

⁶“Jei Okumugwem, ubọk agan̄ ulom kwun̄ îkaan̄ unye isaba iraka; jei Okumugwem, ubọk agan̄ ulom kwun̄ îkpukpuku ogwu ochicha!

⁷Ebi ìkije ikeme owu cha, sa me ikpele umin ubọọn̄ kwun̄, owu ogbugbọ ema igwook. Owu oria unaan̄-ejit kwun̄ òkiyok kubọk ukan̄, itataka ema iriọk kubọk nchat mbubet.

⁸Efet ònan̄a me inwọm kwun̄ îwut mun̄ itiik ibene, ògbugbuk mun̄ owuwut ikeke kubọk mgban uwu; mun̄ emen irem onyenye kubọk ewuuk me eden̄ okwaan̄.

⁹“Ogwu ochicha otutumu me ejit kan̄ ibe, ‘Mâlibi igọọk ema, mâsoon̄ ema itet. Mâkpulu inu kiban̄ iche inyi ebi kiji; mârọ ema ubọk ejit n̄a oweekbe. Mâwọọk oge akọn̄ n̄a isibi, mè isa ubọk n̄a ijijaka ema isan̄a.’

¹⁰Ire, owu Okumugwem orọrọ inyi efet kwun̄ iwut, okwaan̄ orerie ema isan̄a kpai. Ema egegen kubọk oporolo, mè ilaak ibia me ejit mun̄ okwaan̄ ile.

¹¹“Jei Okumugwem, ìre ekene obet lek kwun̄, me etete ebi kè awaji geelek? Ekene obet lek kwun̄? Me ikukup me mbuban, owu omin ichit; me ujamgbugbo, owu okaan̄ ukpook; owu ore ogwu òkirọ uyeke uyeke inu.

¹²Owu onyana ubọk agan̄ ulom kwun̄, ijọn̄ omemeen̄ ebi ochicha kiji.

¹³“Sa me imumechieen̄ mgbọ geelek kwun̄, ke owu okikpulu ebi ofakabe isibi isa ije. Sa me unye kwun̄, ke okisa ema ijeen̄ oniin̄, mege ire ere mbuban kwun̄, ere owu olukbe.

¹⁴“Ebi ido geelek mênọ etip kwun̄, mè ijijiin̄; ukpook kwun̄ môgwook ebi ido Filisia mbiribọ me lek.

¹⁵Ebi ubọọn̄ ido Edọm mêfieek owot; ebi ibot ido Mowabu mêriran; ebi ìluk me ido Kenan mêtọk ita.

¹⁶Uga ukpook mè ufieek-owot mônin̄ igak ema me emen; mgbugba ònan̄a me unye ubọk kwun̄ môtet ema inye kubọk ewuuk, mege ire mgbọ ebi kwun̄ mêjebe iraka; ebi kwun̄, ebi owu Okumugwem ofakabe isibi.

¹⁷“Owu môkpulu ebi kwun̄ inu, mè isa ema inigwook me inyọn̄ ogoon̄ kwun̄ okaan̄be me ìrot, ere nluk eyi owu Okumugwem onamabe isun̄ inyi lek kwun̄, Uwu Mbuban owu Okumugwem osabe ubọk kwun̄ inama ikeke.

¹⁸Okumugwem obore ogwu ibot mkpulu, mege ire mgbọ ikakaan̄ge itata!”

¹⁹Otutuuk inyinya ogwu Fero, mè otutuuk uji akọn̄ kan̄ mè otutuuk ebi akọn̄ kan̄ ìkilibi me inyọn̄ inyinya mîgbọọk inin̄ emen okwaan̄. Okumugwem orọrọ inyi mun̄ okwaan̄ ya igwu ikom, mè igbuku imeen̄ ema otutuuk. Ire, ebi Ijeren ejeje me nchat ijọn̄ isaba me etete okwaan̄ ya.

²⁰Miriam ogwu nriran, ngwan̄ kè Erọn, onenimọnọ ekpete ikikwak, mè ikikọt okwa itọn̄ Awaji. Otutuuk ebibaan̄ eteteen̄ ekpete eyi kiban̄ si, mè igọọk Miriam ikikwak, mè ikikọt, mè ikijop.

²¹Miriam okisasan̄a okwa ya, ema ekekibọkọ otu. Okwa ema ekikọt ìre ikeyi: “Ìkọt okwa ìtọn̄ Okumugwem, mije, ọmọ îtim ikpan̄ me ikpele umin; îtọọn̄ inyinya mè ebi ìkikọkọp ifiin̄ me okwaan̄.”

²²Mosis onenisa ebi Ijeren inan̄a me agba okwaan̄ Anyiaan̄ ije inyi isi, mè ije inin̄ emen èwê Suru. Ema mîje ije otuuk kè egwe ita, kpemun̄ mudim inwọ.

²³Ema enenije inire ere ekigwen Mara, mè imun̄ mudim. Ire, ema kpekọt inwọ, mije, mun̄ ya ìjajat. Îre mije ujat mun̄ ya ke egwen ere ya Mara.

²⁴Ife cha enanaan̄ ejit inyi Mosis, mè ikinunuun̄ ibe, “Ìre keke ke eji ebenwọ isa isiki ebek?”

²⁵Mosis otataan̄ ukpo igwen Okumugwem. Okumugwem ojejeen̄ ọmọ uti ge. Mosis ofafan̄a uti ya itọp itap me emen mun̄ ya, mun̄ ya ototolek initop kubọk mudim. Îre me ere ya ke Okumugwem onyi ema ikan òbokikpulu ema, mè iroon̄ ema si ikpọ me ere ya.

²⁶Okumugwem ìtumu inyi ema ibe, “Ire enyi ikigban̄ utọn̄ me ida n̄a, emi Okumugwem Awaji kinyi, mè ikirọ inu òtatat me chieen̄ n̄a, mè ikirọ ikọ ntọbe, mè ikirọ orọmijọn̄ n̄a, orukan̄ cha nsabe isulu ebi Ijipiti osusut, m̀kpasa geege inisut enyi osusut. Mije, emi nre Okumugwem ogwu òkigwa enyi.”

²⁷Ema enanan̄a me Mara ije inire ere ekigwen Elim, ere akọp mè udọn̄ mudim iba mè akọp ebon uti asaak jaaba okekebe. Ema enenigwuun̄ uwu ọfọ kiban̄, mè ikup itap efuuk me agba otu mudim cha.