Read obolo Isis 18 Bible Online

Isis 18 - obolo bible

Isis 18

¹Jeturu ogwu ngwugwa ebi Midian, òrere si nte nwa kè Mosis, oneninọ otutuuk inu Okumugwem orọbe inyi Mosis mè otutuuk ebi Ijeren, ebi eyi Okumugwem, mè ubọk îsabe isan̄a ebi Ijeren isibi me Ijipiti.

²Jeturu onenibosi ikpọ Mosis, mè isa Jipọra nwa kè Mosis igbaalek. Mosis îwuuk lek iria ogwu nwa inu me lek ogwu ute.

³Jeturu îsa si ibot bọn ebirieen̄ iba kè Mosis igbaalek ije. Ogwu adasi ke Mosis ogwen Gesiọm, mije, ìbe ke ọmọ ìre ogwu ichen me ofifi ama.

⁴Sà ogwu òso iba ke îgwen Elieja, mije, ìbe ke Awaji kè nte kan̄ ore ogwu ntap-ubọk kan̄, ogwu ònyanyan̄a ọmọ isibi me otu oge akọn̄ ogwu Fero.

⁵Ikeya ke Jeturu, nte nwa kè Mosis, onisa nwa kè Mosis mè ibot bọn ebirieen̄ iba kè Mosis igbaalek isi ichichini Mosis me emen èwê, me agba lek ogoon̄ eyi Awaji, ere ọmọ melek ebi Ijeren egwugwuun̄be uwu ọfọ kiban̄ ikup ikitap efuuk.

⁶Jeturu onenilook etip ibe etumu enyi Mosis ibe ke ọmọ, nte nwa kè ogwugwu melek nwa kè ogwugwu mè nsabọn ebirieen̄ iba kè ogwugwu, mînu ibenikpọ ogwugwu.

⁷Mosis ibọbọkọ etip ya, inanan̄a isibi isi itọp ogwu ute-nwa amọn, mè igele igwook me ijọn̄ me isi kan̄, mè ikana ogwu ute-nwa ikat, mè ikido ubọk ije okupbe, mè ubọk lek kiban̄ okupbe. Ogwu ute-nwa oyayaka ido ọmọ eyi kan̄ si. Mosis onenibọkọ ema itap me emen uwu ọfọ kan̄.

⁸Mosis oneniben otutuuk inu Okumugwem orọbe ogwu Fero mè ebi Ijipiti mije ebi Ijeren ikpa inyi Jeturu ogwu ute-nwa, mè ikpa si otutuuk ufialek ema emun̄be me oniin̄ ije kiban̄, mè ubọk Okumugwem osabe inyan̄a ema isibi me emen ufialek cha geelek.

⁹Ejit îbele Jeturu enenen mgbọ înọbe otutuuk ata inu geelek Okumugwem orọbe inyi ebi Ijeren, mè ubọk îsan̄abe ema isibi me irak ubọk ebi Ijipiti.

¹⁰Jeturu onenitọn̄ Okumugwem ibe, “Itọn̄ ikup inyi Okumugwem, ogwu òsasan̄a enyi isibi me irak ubọk ebi Ijipiti, mè inyan̄a enyi isibi me ubọk ogwu Fero mè ebi akọn̄ Ijipiti.

¹¹Me mgbọ keyi, mmun̄ me atikọ ibe ke Okumugwem îmin igak otutuuk awaji geelek, sa me lek inu îrọbe ebi Ijipiti mije otutuuk ijo inu geelek ema erọbe ebi Ijeren, mè ikigugo lek.”

¹²Eya iraraka, Jeturu, nte nwa kè Mosis, onenigwa ngwugwa ewọwọp iriọk mè ofifi esese chieen̄ ngwugwa inyi Awaji. Erọn melek otutuuk ebi ugane Ijeren enunu inigọọk nte nwa kè Mosis igbaan̄ ikweek irie inorie ngwugwa ya me isi Awaji.

¹³Ofit iwele kan̄, Mosis onenisiki ikweek ikisibi oyerebet inyi ebi Ijeren ubọk îkiwuuk lek irọ. Ebi Ijeren ekekeke ikana ọmọ ibene me ewelegwe ifit egwe.

¹⁴Mgbọ nte nwa kè Mosis omun̄be otutuuk inu Mosis okirọ inyi ebi Ijeren, inenitumu inyi Mosis ibe, “Ìre kpasi inu ke okirọ ikeyi melek ife chi? Ìre keke orọ owu gaalek okisibi oyerebet me ibot ife chi? Kpọ-nu ubọk ife chi egbanbe ikana owu, ibene me ewelegwe ifit egwe!”

¹⁵Mosis ofọfọọk ogwu ute-nwa ibe, “Mgbọ m̀barọrọ ni? Ife chi ekinu me lek n̄a iniweek irọriọọn̄ nkeek Awaji.

¹⁶Mgbọ geelek ene iba ekaan̄be gọlọgọlọ, mîra iben ijet emi. Nra irọ esuuk inyi ema, mè ikijeen̄ ema orọmijọn̄ Awaji mè ikan kan̄ geelek.”

¹⁷Ogwu ute-nwa onenifọọk ọmọ ibe, “Inu yi owu okirọ ìkanwọn.

¹⁸Ikwaan̄ yi îlobo igak owu enenen. Owu òkpokọt irọ owu gaalek. Me atikọ, môwọ owu lek, mè iwọ si lek ebi ife chi.

¹⁹Mgbọ keyi, gban̄ utọn̄. Mâteme owu nteme. Awaji ikup si melek kwun̄. Kpọ, îre owu obokikeke me otuchieen̄ ife chi me isi Awaji, mè ikisa gọlọgọlọ kiban̄ inu me isi Awaji.

²⁰Owu môkijeen̄ ema orọmijọn̄ Awaji, mè ikan kan̄, mè ikijeen̄ ema si oniin̄ ubọk ema ebekiluk ugwem, mè inu ògbegbe ibe ema ekerọ.

²¹Ire, owu môgobo ebi ene me etete kiban̄, ebi ìkakaan̄ efuuk, mè ikitet ukpook Awaji, ebi ìkirọ atikọ, mè icha ikpoko ngan, mè isa ife chi irọ ebi ibot. Usini kiban̄ ekekpọ chieen̄ me lek obop ene, usini efit ene, usini akọp ene go, usini akọp ene.

²²Ife chi owu môgobobe mêkisibi oyerebet me ibot ebi Ijeren otutuuk mgbọ. Ikaan̄ echi òyọyọt, mêkisa ijet owu, mè ema èkesibi otutuuk asabọn oyerebet geelek. Sa me ikeyi, ema mêkitap ubọk inyi owu, mè irọ mè ikwaan̄ ifet owu me lek.

²³Ire okirọ ikeyi, mè Awaji ichieek, ufialek eyi ikpukpulu ife chi ìkpoyaka ilobo owu me lek. Ebi ife chi si mêkigwat lek ifo uwu kiban̄ me esuuk.”

²⁴Mosis ogbagban̄ utọn̄ me lek nteme ogwu ute-nwa onyibe ọmọ, mè irọ si ikeya.

²⁵Mosis onenigobo ebi ene me etete otutuuk ebi Ijeren, mè isa ema irọ ebi ibot. Usini kiban̄ ekup me ibot obop ene, usini efit ene, usini akọp ene go, sà usini ke îto me ibot akọp ene.

²⁶Ebi ife chi ekekisibi oyerebet inyi ebi Ijeren mgbọ geelek. Oyerebet isinye, mîra isa ijet Mosis. Echi òfefet, ema mîra ikisibi me lek kiban̄ gaalek.

²⁷Mgbọ nte nwa kè Mosis obofo onenire. Mosis onenitutuun̄ ọmọ itap me oniin̄, ifofo ido kiban̄.