Read obolo Isis 2 Bible Online

Isis 2 - obolo bible

Isis 2

¹Me ike mgbọ ya, îkaan̄ ogwu enerieen̄ ge, ogwu otoko kè Libai, òmọmọnọ gwun̄ enenwaan̄ ge si me otoko kè Libai ido me lek nwa.

²Ogwu enenwaan̄ ya oneninin̄ owot, mè iman gwun̄ enerieen̄. Mgbọ ogwu enenwaan̄ ya omun̄be ibe ke gwun̄ ya îjaan̄ enenen, ilelet gwun̄ ya onyan̄ ita, ìkachieek ibe ebi ene emun̄.

³Mgbọ ìkayaka ìkọt ìlet gwun̄ ya ìgak ikeya, imọmọnọ okwun esabe osùkut ilọk, mè inisa abọt mè agba ichọkọ ichit chieen̄ okwun ya, mè iniben gwun̄ ya imaan̄ me emen, mè iben isi irieen̄ me etete anyiaan̄ me agba okwaan̄ Nali.

⁴Ngwan̄ gwun̄ ya ogwu enenwaan̄ okekeke me ujọn̄ọ ere ikikpọ inu òborọ gwun̄ ya.

⁵Gwun̄ enenwaan̄ ogwu Fero onenije inu agba okwaan̄ Nali ya iboniken mun̄. Ebibaan̄ ìkisi ikwaan̄ inyi ọmọ ekekije ikana me agba okwaan̄ ya. Gwun̄ ogwu Fero onenibene chieen̄ imun̄ okwun ya me etete anyiaan̄ cha, mè iria ogwu usun̄ enenwaan̄ kan̄ ibe isi iben okwun ya ijet ọmọ.

⁶Mgbọ ogwu usun̄ ya osabe okwun ya inu, gwun̄ ogwu Fero ya ochichili, mè imun̄ ayaya gwun̄ enerieen̄ ya me emen. Gwun̄ ya okekito ito. Njijin gwun̄ ya otetet ogwu enenwaan̄ yi, itutumu ibe ke gwun̄ ya ìkpolọlọ irere ge me lek asa nsabọn ebi Iburu.

⁷Me ike mgbọ ya ngwan̄ gwun̄ ya onanan̄a isibi inu, mè inido gwun̄ ogwu Fero ya ibe, “Ìre ǹsi ǹgwen enenwaan̄ Iburu ge, inyi inikpukpo gwun̄ yi inyi owu?”

⁸Gwun̄ ogwu Fero obebe, “Iin̄, si gwen jet emi.” Gwun̄ enenwaan̄ ya osisi igwen nga gwun̄ ya inu.

⁹Gwun̄ ogwu Fero ya otutumu inyi ogwu enenwaan̄ ya ibe, “Bọkọ gwun̄ yi sa si kpukpo nyi emi, ke mâkpe owu mkpukpe ubọk ikwaan̄ kwun̄.” Ogwu enenwaan̄ ya obọbọkọ gwun̄ ya, mè isa isi ikpukpo.

¹⁰Mgbọ gwun̄ ya ominbe isibi, ogwu enenwaan̄ ya osasa ijet gwun̄ ogwu Fero ya. Gwun̄ ogwu Fero osasa gwun̄ ya irọ eyi kan̄, mè inyi erieen̄ Mosis,[1] mije etataba ọmọ isibi me emen mun̄.

¹¹Mgbọ Mosis ominbe inin̄ ene, ineninan̄a ije usen ge ibe ọmọ isi ikpọ ebi kiban̄, mè isi imun̄ ema me emen kwulukwulu kiban̄. Me ere ya, inenimun̄ ogwu Ijipiti ge okisulu ogwu Iburu, ene ge me lek ebi kiban̄.

¹²Iraraan̄ chieen̄ ikpọ agan̄ ulom, mè ikpọ agan̄ ujit, ìkamun̄ ene geege. Isusulu ogwu Ijipiti ya ikpan̄, mè iben irọkọ ijọn̄ ifuun̄.

¹³Ofit iwele kan̄, ijeje si isibi, mè imun̄ ebirieen̄ iba ebi Iburu ekitim etim. Idodo ogwu òrọrọ inu ilọ me etete kiban̄ ibe, “Ìre keke orọ okisulu ogwu Iburu ogbo kwun̄ ikeyi?”

¹⁴Ogwu enerieen̄ ya ofọfọọk ọmọ ibe, “Ìre ekene orọ owu ogwu ibot mkpulu mè ogwu ibot oyerebet me etete kiji? Ìre òkiweek ikpakpan̄ emi ike okpan̄be ogwu Ijipiti me iyakwut?” Ukpook otetet Mosis. Itutumu ibe, “Ìin̄-iin̄-ìin̄, berebet ke inu yi îkpọk mbum.”

¹⁵Mgbọ ogwu Fero onọbe inu ya òrọrọ, iweweek ikpakpan̄ Mosis. Mosis olilibi ifo ido Midian, mè isi isiki ikweek irek me otu udọn̄ mun̄ ge me ido ya.

¹⁶Me ike mgbọ ya, îkaan̄ ogwu òban yọk ge me ido Midian ya òkakaan̄ nsabọn ebibaan̄ jaaba. Nsabọn ibaan̄ cha enunu otu udọn̄ mun̄ ya ibenichibi mun̄ igwook ijot emen okwa inyi anam nte kiban̄ inwọ.

¹⁷Ofifi ebi ìkikpukpo arọọn̄ enunu si me ere ya, mè ilap ema isan̄a me otu mun̄ ya. Mosis onanan̄a ikeke, mè isi itap ubọk inyi nsabọn ibaan̄ cha, mè ichibi mun̄ igwook me emen okwa inyi anam kiban̄ cha inwọ.

¹⁸Mgbọ ema efonbe isi ire uwu, nte kiban̄, Rewen, ododo ema ibe, “Enyi ejeje igwat lek ika ikeyi chereyi?”

¹⁹Ema efọfọọk nte kiban̄ ibe, ke îre ogwu enerieen̄ Ijipiti ge otap ubọk inyi ema, mè inyan̄a ema isibi me ubọk ebi òkpukpo arọọn̄, mè ichibi si mun̄ igwook inyi anam kiban̄ inwọ.

²⁰Nte kiban̄ onenido ema ibe, “Sà ogwu enerieen̄ ya ye? Ìre enyi ejeje ijuuk itele me otu udọn̄ mun̄? Ìsi ìgwen ibe inu inigọọk eji irie inorie.”

²¹Ema esisi igwen Mosis ibe inu me uwu kiban̄. Mosis ochechieek, mè igọọk ema ika inu uwu kiban̄, mè inigọọk ema iluk ibia. Ogwu òban yọk ya onenisa gwun̄ enenwaan̄ kan̄ ge, ogwu ekigwen Jipọra, inyi Mosis me lek nwa.

²²Ìkafiin̄, ogwu enenwaan̄ ya oninin̄ owot, mè iman gwun̄ enerieen̄ ge inyi Mosis. Mosis ogwegwen gwun̄ ya Gesiọm,[2] mije ke ọmọ ìre ogwu ichen me ofifi ido.

²³Me etete ujọn̄ọ mgbọ ya, ogwu ubọọn̄ ido Ijipiti ya okwukwu. Ire, ebi Ijeren ekekito mfi si me irak kwulukwulu kiban̄, mè ikito ito iweek ntap-ubọk. Ida ito kiban̄ onenire utọn̄ Awaji.

²⁴Awaji onọnọ mfi kiban̄, mè inikeek inyan̄a-ibot kan̄ eyi înyan̄abe inyi Ebereyam mè Ajiki mè Jekọp,

²⁵mè imun̄ si irek usun̄ eyi ebi Ijeren ekupbe, mè ikaan̄ ejit nsan me lek kiban̄.