Read obolo Isis 21 Bible Online

Isis 21 - obolo bible

Isis 21

¹Okumugwem otutumu si inyi Mosis ibe, “Echichi ore Ikan obonyi ebi Ijeren:

²Ire owu olep ogwu Iburu me lek usun̄, ogwu usun̄ ya môsi ikwaan̄ inyi owu acha gweregwen. Me òso acha jaaba, owu môtele ibe ifo me ikike isi ikaan̄ lek kan̄, ìkabokpe mkpukpe geege isasa inwene ibot kan̄.

³Ire ogwu usun̄ ya inu ọmọ gaalek mgbọ elepbe ọmọ, ìboje ọmọ gaalek si ifo me mgbọ ìbofo. Ire ije melek ogwu nwa inu, ìboje si melek ogwu nwa ifo me mgbọ ìbofo.

⁴Ire ogwu usun̄ ya ije ọmọ gaalek inu, mè ogwu nte uwu kan̄ ininyi ọmọ nwa, ibobon bọn me owot ogwu enenwaan̄ ya, mgbọ ìbofo, môjuuk ogwu enenwaan̄ ya mè bọn cha itele inyi ogwu nte uwu kan̄, mè ije ọmọ gaalek ifo.

⁵Ire, ire ogwu usun̄ ya itumu, me atikọ, ibe ke ọmọ îma ogwu nte uwu kan̄, mè ima si ogwu nwa mè ebi bọn, eya orọ, ke ọmọ ìkaweek ifofo isi ikaan̄ lek kan̄,

⁶ogwu nte uwu kan̄ ya môsa ogwu usun̄ ya isi me isi ebi oyerebet,[14] mè isa utọn̄ kan̄ itoon̄ me lek afọn̄ mè ìre ubọk isotu, mè isa nkọm-ochichim itibi ọmọ utọn̄ me isi otutuuk ene. Sa me ikeyi, ene ya mônenikana usun̄ inyi ogwu nte uwu kan̄ isi ire mgbọ geelek.

⁷“Ire ene inyam gwun̄ kan̄ enenwaan̄ kubọk usun̄, gwun̄ enenwaan̄ ya ìkpofo isi ikaan̄ lek kan̄, kubọk ogwu usun̄ enerieen̄ môkọtbe irọ.

⁸Ire, ire inu ogwu enenwaan̄ ya ìkayaka ìneme ogwu nte uwu kan̄ ogwu ògogobo ọmọ inyi lek kan̄, ogwu enerieen̄ ya môtele inyi ofifi ene inifaka gwun̄ enenwaan̄ ya isibi. Ìkakaan̄ unen inyanyam ogwu enenwaan̄ ya inyi ogwu ofifi ido, mije, îfiaan̄ ogwu enenwaan̄ ya ofiaan̄.

⁹Ire ke ìgobo gwun̄ enenwaan̄ ya inyi ogwu gwun̄ enerieen̄, ọmọ mômọnọ gwun̄ ya kubọk gwun̄ kan̄ enenwaan̄, ike orọmijọn̄ odobe.

¹⁰Ire isun̄ ogwu usun̄ ya inyi lek kan̄, mè isi ido ofifi nwa, ìkposan̄a inu igele me lek inorie mè ekwut îkinyi ogwu usun̄ ya. Ìkpojit si ọmọ ilaak.

¹¹Ire ogwu enerieen̄ ya ìkakinyi ogwu usun̄ ya inu ita kechi, ogwu enenwaan̄ ya mônan̄a ifo me ikike, ìkpokpe ikpoko geege inyi ogwu enerieen̄ ya.”

¹²“Ogwu isulu ene ikpan̄, ekpakpan̄ ene ya me useen̄.

¹³Ire, ire ìkagegen ibak ìrọ, mè ire Awaji itele ibe irọ ikeya, ogwu òkpan̄ ene ya môlibi isi ikup me ere mâjeen̄be owu.

¹⁴Ire, ire ene itumu ifieek me ejit kan̄, mè igen ibak ikpan̄ ofifi ene isan̄a, mè ilibi isi itap ibot me lek ntook n̄a, ìtaba ene ya ìsibi me agba lek ntook ya, mè ìsa ìsi ìkpan̄.

¹⁵“Ene geelek òsusulu ogwu ute mè ìre ogwu uga, ekpakpan̄.

¹⁶“Ene geelek òchichiin̄ ene, mè isa isi inyam, mè ìre ìchichiin̄ ene ya mè itet ikaan̄, eneniweek iriọọn̄, ekpakpan̄ ogwu òchiin̄ ene ya.

¹⁷“Ene geelek ògbogbo ogwu ute mè ìre ogwu uga, ekpakpan̄.

¹⁸“Ire ebirieen̄ iba ikibaak ibaak, ene ge onenisa ewuuk mè ìre akpọ isulu ogwu melek kan̄ itap unan me lek ire lek ene ya olaakbe me ijọn̄ ufiak, ire, ìkakwu,

¹⁹mè ire ene ya inan̄a ikeke, mè ikisa mkpat ibieen̄ ijọn̄ ije ikana me oyet, itip-oyerebet ìkakup ìnyi ogwu òsusulu ene ya. Ire, ọmọ môkpe mkpukpe ògbegbe inyi ogwu orukan̄ ya, mije, îfiat mgbọ kan̄ me inyọn̄ mkpilaak orukan̄. Môkpọ si ene ya chieen̄ me lek mege ire mgbọ lek mônyebe isan̄a kpai.

²⁰“Ire ene isa uti isulu ogwu usun̄ kan̄ enerieen̄ mè ìre enenwaan̄, ikwukwu, eberọrọ ene ya useen̄.

²¹Ire, ire ogwu usun̄ ya inan̄a ikeke me usen ya mè ìre òso usen iba, kpeberọ ene ya useen̄. Mije, ogwu usun̄ ya ìre ikpoko kan̄.

²²“Ire ebirieen̄ iba ikitim etim, mè initọbọ nwa-owot, owot osisibi, ire, unan geege ìkasak me lek ìgak ikeya, ogwu enerieen̄ inu ya ojebe me ubọk môkpe inu geelek ogwu olom odobe, igọọk me inu ebi oyerebet mêtumube ifieek.

²³Ire, ire unan isak me lek nwa-owot ya, ikan ìre, ogwu ikpan̄ ene, ekpan̄,

²⁴ogwu itibi ene chieen̄, etibi ọmọ chieen̄ si, ogwu iwaka ene ejeek me otu, ewaka ọmọ ejeek si, ogwu ifan̄a ene ubọk, efan̄a si ọmọ ubọk, ogwu ifan̄a ene ukot, efan̄a ọmọ si ukot,

²⁵ogwu isa ukan̄ itaka ene, esa ukan̄ etaka ọmọ si, ogwu isak ene unan me lek, esak si ọmọ unan me lek, ogwu igwaka ene lek, egwaka si ọmọ lek.

²⁶“Ire ene isulu ogwu usun̄ kan̄ enerieen̄ mè ìre enenwaan̄ chieen̄ ichit, ogwukaan̄ usun̄ ya môtele inyi ogwu usun̄ ya ifo me ikike isi ikaan̄ lek kan̄, mije chieen̄ kan̄ îsulube ichit.

²⁷Ire ke îre ejeek owaka me otu ogwu usun̄ kan̄ enerieen̄ mè ìre enenwaan̄, ene ya môtele inyi ogwu usun̄ ya ifo me ikike isi ikaan̄ lek kan̄, mije ejeek kan̄ îsulube iwaka.

²⁸“Ire orie eriembuuk igon enerieen̄ mè ìre enenwaan̄ ikpan̄, mêsa ewuuk itọbọ eriembuuk ya ikpan̄. Kpebetaka anam kan̄. Ogwukaan̄ si ìkpokpe mkpukpe geege.

²⁹Ire, ire eriembuuk ya iwuuk lek ikigoon̄ ene me mgbọ òraraka, etutumu inyi ogwukaan̄, ire, ìkakọt ìkpọ chieen̄ me lek, eriembuuk ya osisi igon enerieen̄ mè ìre enenwaan̄ ikpan̄, esa ewuuk etọọn̄ eriembuuk ya ekpan̄, mè ekpan̄ si ogwukaan̄ egbaalek.

³⁰Ire, ire itet ogwukaan̄ eriembuuk ya ibe ikpe mkpukpe me ibot ogwu òkwukwu ya, ogwukaan̄ eriembuuk ya môkpe otutuuk mkpukpe cha geelek edobe isa inwene ibot kan̄, mè iluk ugwem.

³¹Ikerere sọn̄ gwun̄ enerieen̄ mè ìre sọn̄ gwun̄ enenwaan̄ ke eriembuuk ya ogon ikpan̄, ikan yaage si otet eriembuuk ya mè ogwukaan̄.

³²Ire eriembuuk ya igon usun̄ enerieen̄ mè ìre usun̄ enenwaan̄ ikpan̄, mêkpan̄ eriembuuk ya. Ogwukaan̄ si môkpekpe akọp ikpoko alata okuket ita inyi ogwukaan̄ usun̄ ya.

³³“Ire ene ichili otu udọn̄ ibook itele, mè ìyaka ire, irọkọ udọn̄, mè itele ichichit otu, eriembuuk mè ìre inyinya akpan onenirọn̄ inin̄ emen udọn̄ ya,

³⁴ogwu òchichili udọn̄ ya môkpe ikpoko ibot anam ya inyi ogwukaan̄, mè iben nkwukwu anam ya isak.

³⁵“Ire orie eriembuuk ene ge igon orie eriembuuk ofifi ene ikpan̄, mênyam eriembuuk eyi òkup me ugwem, mè iche ikpoko ibot kan̄ ìkike iba inyi ema ene iba, mè iche si nkwukwu anam ya ìkike iba inyi si ema ene iba.

³⁶Ire, ire orie eriembuuk ya iwuuk lek ikigoon̄ ofifi anam, erọrọ inyi ogwukaan̄ iriọọn̄, ire, ìkakọt ìkpọ chieen̄ me lek, eriembuuk ya onenigon eyi ofifi ene ikpan̄, ogwukaan̄ mônyi orie eriembuuk me useen̄, mè iben eyi nkwukwu ya isak.