Read obolo Isis 25 Bible Online

Isis 25 - obolo bible

Isis 25

¹Okumugwem onenitumu inyi Mosis ibe,

²“Tumu nyi ebi Ijeren ibe enyi emi inyinyi. Enyi mêbọkọ inyinyi me ubọk ene geelek ejit kan̄ onemebe isa ijet emi.

³Inyinyi enyi mêbọkọbe me ubọk kiban̄ ìre alata araran̄, mè alata okuket, mè ekwe,

⁴mè eri oluku oluku, mè echi irio irio, mè echi eje eje, mè ekwut lilin̄, mè inwọọn̄ ebot,

⁵mè ikpa orie arọọn̄ ekpan̄be chieen̄ ikana araran̄, mè ikpa ima, mè uwot uti akasia,

⁶mè aran̄ olifu eyi mêkisa imin mkpukan̄, mè inu òkidun̄u utop olu echi mêsabe igbaalek irom aran̄ eyi mêkisa igbama me lek inu òkup mbuban, mè echi mêsabe igbaalek irom nsensi òkidun̄u utop olu.

⁷Bọkọ si ewuuk unye otu ewe eyi ekigwen onikisi, mè esese chieen̄ ewuuk echi mêsabe inwunwan̄ me lek mgbidim ofọnti ikwaan̄ ebi ngwugwa ekitap, eyi ekigwen efọdu, melek ekwut isi ejit kiban̄.

⁸“Tumu nyi ebi Ijeren ibe enama Uwu Mbuban enyi emi, inyi ǹnenluk me etete kiban̄.

⁹Enyi ebenama Akpatan̄ Mbuban ya mè otutuuk inu òbokup me emen kan̄ igọọk mbet eyi mâjeen̄be owu.

¹⁰“Ìsa uwot uti akasia ìgon okop ge. Ujọn̄ọ kan̄ môre agbagba otubọk go, uwele kan̄ môrere agbagba otubọk ita, ubene kan̄ mônenire si agbagba otubọk ita.

¹¹Mêsa alata araran̄ eyi kpewọlọ ichọkọ ichit otutuuk emen melek udun̄ okop ya, mè isa si alata araran̄ ya ibot obubot òjajaan̄ ikat ikana me inyọn̄ ukpọk otu okop ya.

¹²Mêsa alata araran̄ itọkọ ògbọ ini, mè isa itọkọ ikam me otu utọn̄ agba owot okop ya agan̄ iba, iba me agan̄ ge, iba me agan̄ keyilọ.

¹³Mêsa si uti akasia irọ ogbugboon̄ iba, mè isa alata araran̄ ichọkọ ichit lek,

¹⁴mè isa ogbugboon̄ cha itap itibi chieen̄ ògbọ cha òkup me agba owot okop ya agan̄ iba, inyi esa ogbugboon̄ cha ekeben okop ya.

¹⁵Ogbugboon̄ cha ìbobia me chieen̄ ògbọ cha me lek okop ya mgbọ geelek, kpebewọọk isan̄a mgbọ geege.

¹⁶Emen okop ya ke obotap Akọp Ikan n̄a, echi mâgebe isibi mè isa inyi owu.

¹⁷Mêsa si alata araran̄ eyi kpewọlọ irọ ogboon̄ nsan[19] eyi mêkisa ichit okop ya kubọk ochichit kan̄. Ujọn̄ọ ogboon̄ nsan ya môre agbagba otubọk go, uwele kan̄ môrere agbagba otubọk ita.

¹⁸Mêsa alata araran̄ irom ebi mbem emen inyọn̄ iba me ibot ogboon̄ nsan ya agan̄ iba. Kpebetọtọkọ ebi mbem emen inyọn̄ cha, ebesa abaracha ibọn̄.

¹⁹Mêrọ ema ge me ibot okop ya agan̄ ge, ge me ibot agan̄ keyilọ. Mêsa okpukpuk alata araran̄ ge yaage igbaan̄ ebi mbem iba cha melek ogboon̄ nsan ya irom lek ge. Kpebedadasi irom ema esese, mè iniben itọkọ ikam me ibot ogboon̄ nsan ya agan̄ iba.

²⁰Mêsun̄ ema inyi ge iyaka isi ikweek ge. Uwop kiban̄ ìbobebene ifo inyọn̄ kubọk ema ebewuwulu. Sa me ikeya, uwop cha môkakana ichit inyọn̄ ogboon̄ nsan ya. Isi kiban̄ môkakana isiki ikikpọ inyọn̄ ogboon̄ nsan ya.

²¹Owu môtap Akọp Ikan n̄a cha mânyibe owu me emen okop ya, mè iniben ogboon̄ nsan ya itoon̄ me inyọn̄ otu okop ya.

²²Îre me inyọn̄ ogboon̄ nsan ya, me etete ebi mbem iba cha, ke mâkikup ichichini melek kwun̄. Ere ya ke mâkikup ikitọ ikọ inyi owu òfo me lek ebi Ijeren.

²³“Mêsa uti akasia irọ ikasi itoon̄-inu ge. Ujọn̄ọ kan̄ môre agbagba otubọk ini, uwele kan̄ môrere agbagba otubọk iba, sà ubene kan̄ obore agbagba otubọk ita.

²⁴Mêsa alata araran̄ eyi kpewọlọ ichọkọ ichit otutuuk lek, mè isa si alata araran̄ ibot obubot òjajaan̄ ikat ikana otu utọn̄ ikasi ya.

²⁵Mêsa uwot òwele ikup kubọk akajit ubọk ene igon ikana me irak ukpọk otu ikasi ya agan̄ ini, mè isa alata araran̄ irom obubot òjajaan̄ itoon̄ ikana me inyọn̄ uwot ya.

²⁶Mêsa alata araran̄ irom ògbọ ini, mè isa itọkọ ikam me otu utọn̄ ukot ini eyi ikasi ya.

²⁷Ògbọ ini cha ìbokup me irak ukpọk otu ikasi ya, me agba lek uwot òkaan̄ obubot me lek ya. Me chieen̄ ògbọ ini chi ke ebetap ogbugboon̄ iba echi mêsabe ikiben ikasi ya.

²⁸Ebesa uti akasia irọ ogbugboon̄ iba cha, mè isa alata araran̄ ichọkọ ichit lek. Ogbugboon̄ chi ke ebekisa iben ikasi ya.

²⁹Mêsa alata araran̄ eyi kpewọlọ irom ebi kè alala kan̄, mè nkọm kan̄, mè ugọn̄ kan̄, mè ekpen̄ kan̄ echi mêkisa igwook miin̄ ngwugwa.

³⁰Mêkitoon̄ Fituru Isi Awaji me inyọn̄ ikasi ya mgbọ geelek inyi emi.

³¹“Mêsa alata araran̄ eyi kpewọlọ irom ngugọọn̄ mkpukan̄ ge. Kpebetọtọkọ ngugọọn̄ ya, ebesa abaracha ibọn̄. Mêsa okpukpuk alata araran̄ ge yaage irom ototuuk ngugọọn̄ ya, bene me ebon kan̄, mè ukut kan̄, si re lek ngigọ ajakajak, mè nkwa ajakajak, mè ajakajak kan̄, lek ge.

³²Ngugọọn̄ ya môkaan̄ agọọk gweregwen me lek, ita me agan̄ ge, ita me agan̄ keyilọ.

³³Me lek agọọk gweregwen cha geelek, mêrom ngigọ ajakajak ita òbet lek ngigọ ajakajak uti alimọn, mè irom si nkwa ajakajak mè ajakajak kan̄ itoon̄ me inyọn̄.

³⁴Ngigọ ajakajak alimọn ini mè nkwa ajakajak mè ajakajak kan̄ obokup me akparalek ngugọọn̄ ya.

³⁵Mêrom nkwa ajakajak ge me akparalek ngugọọn̄ ya, me irak agọọk iba iba geelek ònyana isibi me agba agan̄ iba eyi ngugọọn̄ ya, mege iso lek ukpa agọọk ita cha, òrere agọọk gweregwen òkup me lek ngugọọn̄ ya.

³⁶Okpukpuk alata araran̄ ge gaalek ke ebesa irom ototuuk ngugọọn̄ ya, mè agọọk cha mè nkwa ajakajak cha. Kpebetọtọkọ, ebesa abaracha ibọn̄. Alata araran̄ ebesa irom ngugọọn̄ ya ìbore eyi kpewọlọ.

³⁷“Mêrọ otitọn̄ jaaba itoon̄ me inyọn̄ ngugọọn̄ ya, inyi ikinyi utoon̄ me agan̄ isi ngugọọn̄ ya.

³⁸Sisini ebekisa ikpaan̄ ekwut mkpukan̄ cha mè okwa ebekisa itap ntọn̄ kan̄, ìbore si alata araran̄ eyi kpewọlọ ke ebesa irom.

³⁹Îre alata araran̄ eyi kpewọlọ, eyi ulobo kan̄ orebe akọp kilo ita mè ini ke ebesa irom ngugọọn̄ ya melek otutuuk nroon̄ ikwaan̄ òje me lek.

⁴⁰Gbala chieen̄ mè mun̄ ibe ke mîrọ otutuuk inu chi geelek igọọk me lek ngugwat eyi njeen̄be owu me inyọn̄ ogoon̄ ya.”