Read obolo Isis 26 Bible Online

Isis 26 - obolo bible

Isis 26

¹Okumugwem îtumu si inyi Mosis ibe, “Enyi isibenama Akpatan̄ Mbuban ya me lek kan̄, ebesa akọp mgbidim ekwut ukwek esabe atalek lilin̄ eyakabe ijaan̄ irọ igbaka ichit inyọn̄ mè akpalek. Eri mêsabe ilọk ekwut cha ìbore eri oluku oluku, mè echi irio irio, mè echi eje eje. Mêlọk si ogugo ebi mbem emen inyọn̄ me lek ekwut cha. Atalek ogwu usọ ikwaan̄ obolọk ebi mbem cha me lek ekwut cha.

²Ekwut ukwek cha otutuuk môre ìkike. Ujọn̄ọ ge kan̄ môre ejit jaaba, sà uwele kan̄ obore ejit ge.

³Mêgbaan̄ mgbidim go isọk, ge me irak ge, inyi ire ge, mè iyaka igbaan̄ si mgbidim go kechilọ isọk si, inyi ire ge.

⁴Mêsa eri oluku oluku itap ògbọ me utọn̄ ekwut agan̄ ujọn̄ọ ujọn̄ọ me lek mgbidim go ge me agan̄ ibot, mè isa si eri oluku oluku itap si ògbọ me utọn̄ ekwut agan̄ ujọn̄ọ ujọn̄ọ me lek mgbidim go keyilọ me agan̄ eyi oyet.

⁵Ògbọ cha ebetap akọp go me utọn̄ mgbidim ekwut go egbaan̄be isọk me agan̄ ge, mè itap si akọp go me utọn̄ mgbidim ekwut go keyilọ. Mêtap ògbọ cha inyi echi utọn̄ ekwut agan̄ ge ikikpọ echi utọn̄ ekwut agan̄ keyilọ.

⁶Mêsa alata araran̄ irọ akọp ugọbọ go echi mêsabe itap itibi chieen̄ ògbọ cha òkup me lek ekwut ukwek cha, mè igọbọ ikam, ògbọ iba me otu ugọbọ ge, inyi akpatan̄ ya ikana ge, mè ikakup okpọkọ okpọkọ.

⁷“Mêsa inwọọn̄ ebot ilọk akọp mè mgbidim ekwut ukwek ge echi mêsabe ikana ichit akpatan̄ ya.

⁸Akọp mè mgbidim ekwut ukwek ge cha môre ìkike. Ujọn̄ọ ge môre ejit jaaba mè ìkike iba, sà uwele kan̄ obore ejit ge.

⁹Mêgbaan̄ ekwut cha mgbidim go ichim isun̄ ge, mè igbaan̄ mgbidim gweregwen ichim si isun̄ ge. Ire, òso mgbidim ekwut gweregwen ya, ebefafan̄a mgbugbak iba me agan̄ isi akpatan̄ ya.

¹⁰Mêtap akọp ògbọ go me utọn̄ agan̄ ibot ukpa ekwut ge, mè itap si akọp ògbọ go me utọn̄ agan̄ ibot ukpa ekwut keyilọ.

¹¹Mêsa ekwe irọ akọp ugọbọ go, echi mêsabe itap itibi chieen̄ ògbọ cha, mè igọbọ akpatan̄ ya ikam, inyi ikana ge, mè ikakup okpọkọ okpọkọ.

¹²Ekwut ukwek ya môchit akpatan̄ ya, mè ida igwook. Me lek agan̄ òdada igwook cha, okpọkọ mgbidim ekwut ge môkana ichit agan̄ udun̄ akpatan̄ ya.

¹³Me ibot agan̄ ge ge me lek mgbidim ekwut ukwek iba cha, ekwut òwewele iso agbagba otubọk iba môsik, mè ida igwook, mè ichit agan̄ iba eyi akpatan̄ ya ire ijọn̄.”

¹⁴Mêsa ikpa orie arọọn̄ eyi ekpan̄be chieen̄ inyi ikana araran̄ iwele ichit akpatan̄ ya, mè isa si ikpa ima iwele ichit inyọn̄ ikpa orie arọọn̄ ya.

¹⁵“Mêsa uwot uti akasia igon agbasi ìkeke ìkeke echi mêsabe inama akpatan̄ ya.

¹⁶Ujọn̄ọ agbasi cha ge môre ejit iba mè ìkike iba, uwele kan̄ môrere agbagba otubọk ita.

¹⁷Mêtap ukot iba me irak atà agbasi cha geelek. Mêgbagbaan̄ ukot iba cha isọk. Ikeya ke ebetap iso me irak otutuuk atà cha òkup me lek akpatan̄ ya.

¹⁸Akọp agbasi iba obokup me lek akpatan̄ ya me agan̄ osiki.

¹⁹Mêsa alata okuket irom akọp urak ini, inyi esa enwaan̄ me ebon uwot agbasi cha geelek. Mênwaan̄ urak alata okuket iba iba me irak agbasi ge, iso otutuuk akọp agbasi iba cha.

²⁰Akọp agbasi iba si obokup me lek akpatan̄ ya me agan̄ inyọn̄, ubọk îkupbe me agan̄ osiki.

²¹Mêsa si akọp urak alata okuket ini inwaan̄ me ebon uwot agbasi cha. Mênwaan̄ urak iba iba me irak agbasi ge.

²²Mêtap si agbasi gweregwen me agan̄ udun̄ akpatan̄ ya, òrere agan̄ ichep-ura.

²³Mêrọ si agbasi iba echi mêsabe itap me ibot usọk iba òkup me agan̄ udun̄ akpatan̄ ya.

²⁴Mêgbaan̄ agbasi iba cha òkup me ibot usọk ge ge isọk ibene me agan̄ ijọn̄ isi ire agan̄ inyọn̄, inyi ije lek ge, mè inisa ògbọ ge igọbọ ema ikam. Ikeya ke eberọ me ibot usọk agan̄ iba cha.

²⁵Sa me ikeya, agbasi jeeta obokup me udun̄ akpatan̄ ya. Otutuuk kiban̄ mêkaan̄ urak alata okuket iba iba me ebon. Otutuuk urak ebenwaan̄ me ebon uwot agbasi cha ìbosibi akọp mè gweregwen.

²⁶Mêsa uti akasia si irọ mgbugban echi mêsabe igban me lek agbasi cha. Mêsa mgbugban go igban isaba agbasi echi òkup me agan̄ ge me lek akpatan̄ ya,

²⁷mè isa go si igban isaba agbasi echi agan̄ keyilọ, mè isa si go igban isaba agbasi echi agan̄ udun̄ akpatan̄ ya, òrere agan̄ ichep-ura.

²⁸Mgbugban eyi òbokup me etete môje me ìkike iba agbasi agan̄ iba cha, mè inyana inan̄a me ibot akpatan̄ ya agan̄ ge isi ire ibot agan̄ keyilọ.

²⁹Mêsa alata araran̄ ichọkọ ichit lek otutuuk agbasi cha, mè lek otutuuk mgbugban cha si. Mêsa alata araran̄ irọ ògbọ echi òbogọbọ mgbugban cha ikam me lek agbasi cha.

³⁰Mênama akpatan̄ ya igọọk mbet eyi njeen̄be owu me inyọn̄ ogoon̄ yi.”

³¹Mêsa eri oluku oluku mè echi irio irio mè echi eje eje mè atalek lilin̄ eyakabe ijaan̄ irọ ekwut mgban. Ata ogwu usọ ikwaan̄ mônenilọk ogugo ebi mbem emen inyọn̄ me lek ekwut mgban ya.

³²Mêben ekwut mgban ya ijeen̄ me otu atà ini esabe uti akasia irọ, mè isa alata araran̄ ichọkọ ichit lek, mè isa ugọbọ alata araran̄ igọbọ ekwut ya ikaan̄. Atà ini cha geelek môkaan̄ urak esabe alata okuket irom.

³³Mêjeen̄ ekwut mgban ya mè ije me irak ugọbọ alata araran̄ echi esabe igọbọ adasi ochichit akpatan̄ ya, mè iben okop ata-ikọ[20] ya iyik me udun̄ ekwut mgban ya. Ekwut ya môneniche Ere Mbuban isan̄a me lek Ere Òkup Mbuban Ichit inyi enyi.

³⁴Mêben ogboon̄ nsan ya itoon̄ me inyọn̄ otu okop ata-ikọ ya me emen Ere Òkup Mbuban Ichit.

³⁵Mêyik ikasi Fituru Isi Awaji ya me isi ekwut mgban ya me uwu-ile akpatan̄ ya, me Ere Mbuban, ifo agba uwu ntut agan̄ inyọn̄ me emen akpatan̄ ya, mè iniyik ngugọọn̄ mkpukan̄ ya me usaba kan̄ ifo agba uwu me ntut agan̄ osiki me emen akpatan̄ ya.

³⁶Mêsa eri oluku oluku mè echi irio irio mè echi eje eje mè atalek lilin̄ eyakabe ijaan̄ ilọk ekwut isotu mêsabe igbaka ikwek otu isotu ekije iraka inin̄ emen akpatan̄ ya. Ogwu òbolọk ekwut isotu yi ìbore ogwu usọ ikwaan̄ ekwut òkilọk ekwut me owuwa chieen̄.

³⁷Mêsa uti akasia irọ atà go mêsabe ikijeen̄ ekwut isotu ya, mè isa alata araran̄ ichọkọ ichit lek. Mêsa alata araran̄ si irọ ugọbọ go, mè isa itọkọ ikam me lek atà go cha. Atà go chi geelek môkaan̄ urak esabe ekwe irom.