Read obolo Isis 28 Bible Online

Isis 28 - obolo bible

Isis 28

¹Okumugwem onenitumu inyi Mosis ibe, “San̄a ngwan̄ kwun̄ Erọn melek ebi bọn ebirieen̄, Nadabu mè Abiyu mè Elieja mè Itama, sibi me etete ebi Ijeren sun̄ esese gbaalek kwun̄, inyi ema enesi ikwaan̄ enyi emi kubọk ebi ngwugwa.

²Mêchim ofọnti mbuban inyi Erọn ngwan̄ kwun̄, inyi ikaan̄ umin mè ikup òrirọ òrirọ.

³Tumu nyi otutuuk ebi usọ ikwaan̄, ebi ntapbe ekwukwu eyi iriọọn̄-inu me emen, ibe erọ ofọnti enyi Erọn echi òbosan̄a ọmọ isun̄ esese kubọk ogwu òkisi ikwaan̄ inyi emi kubọk ogwu ngwugwa.

⁴Ofọnti ife chi eberọ ìre ekwut isi ejit, mè mgbidim ofọnti ikwaan̄ eyi ekigwen efọdu, mè àwurukù inyọn̄, mè àwurukù irak eyi elọlọk, mè okpibot, mè fanti. Ofọnti mbuban chi ke mêrọ inyi Erọn ngwan̄ kwun̄ melek ebi bọn ebirieen̄, inyi ema eketap esa ekesi ikwaan̄ enyi emi kubọk ebi ngwugwa.

⁵“Ife cha mêsa ekwut echi òkaan̄ chieen̄ alata araran̄, mè echi oluku oluku, mè echi irio irio, mè echi eje eje, mè atalek lilin̄, irọ ofọnti cha.

⁶Ekwut ebesa irọ mgbidim ofọnti ikwaan̄ ya ìbore echi chieen̄ alata araran̄ mè echi oluku oluku, mè echi irio irio, mè echi esabe atalek lilin̄ eyakabe ijaan̄ irọ. Ogwu òborọ ofọnti ya ìbore atalek ogwu usọ ikwaan̄.

⁷Mgbidim ofọnti ikwaan̄ ya môkaan̄ ubọk iba echi mêchimbe igọm me utọn̄ kan̄ agan̄ iba inyi mêkisa ijeen̄ me oguga.

⁸Mêgbaan̄ mgbidim ofọnti ya mè fanti òje me lek irọ, kpeberọ ema esese esese. Fanti ya ìbore si chieen̄ yaage melek ofọnti ya. Mêsa alata araran̄ mè eri oluku oluku mè echi irio irio mè echi eje eje mè atalek lilin̄ eyakabe ijaan̄ irọ.

⁹Mêmọnọ okpọkọ ewuuk unye otu ewe onikisi iba, mè itibi erieen̄ bọn ebirieen̄ kè Ijeren me lek.

¹⁰Mêge erieen̄ cha igọọk me ike emanbe ema, ibene me lek ogwu adasi isi ire lek ogwu mgburudun̄. Mêge erieen̄ gweregwen me lek ewuuk ge, mè ige si erieen̄ gweregwen kechilọ me lek ewuuk keyilọ.

¹¹Ike ogwu usọ ikwaan̄ ewuuk okirọkọ iman̄ òriọọn̄ me lek ewuuk, ikeya ke eberọkọ erieen̄ ebi Ijeren cha me lek ewuuk iba cha, mè ènesa alata araran̄ ekpa ekana otu utọn̄ ewuuk cha, inyi itet inye.

¹²Mêsa okpọkọ ewuuk iba cha igọbọ ikam me inyọn̄ oguga mgbidim ofọnti ikwaan̄ ya, inyi ire inu ǹkeek eyi akọp mè bọn ebirieen̄ iba kè Ijeren. Sa me ikeyi, Erọn môkibeme erieen̄ kiban̄ me oguga iba kan̄ kubọk inu ǹkeek me isi Okumugwem.

¹³Mêsa alata araran̄ ikpa ikana me utọn̄ ewuuk iba cha,

¹⁴mè isa si alata araran̄ eyi kpewọlọ irọ mkpọn iba ekpakpa kubọk olik, mè inisa igọbọ me lek alata araran̄ ekpabe ikana me utọn̄ ewuuk iba cha.

¹⁵“Mêrọ ekwut isi ejit eyi ogwu òban Awaji obokisa ido nkeek Okumugwem. Ubọk erọbe mgbidim ofọnti ikwaan̄ ya ke eberọ si ekwut isi ejit yi. Mêsa alata araran̄ mè eri oluku oluku mè echi irio irio mè echi eje eje mè atalek lilin̄ eyakabe ijaan̄ irọ.

¹⁶Ekwut isi ejit yi môre ìkike me agba ini kan̄. Ujọn̄ọ kan̄ mè uwele kan̄ môre agbagba otubọk ge. Mêfafan̄a ekwut kan̄ mgbugbak iba.

¹⁷Mêgban ewuuk unye otu ewe ugban ini me inyọn̄ ekwut isi ejit ya. Ewuuk òbokup me adasi ugban ìbore echi ekigwen rubi mè topaji mè berin.

¹⁸Ewuuk òbokup me ugban òso iba ìbore tọkwọyis mè safaya mè emeran.

¹⁹Ewuuk òbokup me ugban òso ita ìbore jasinti mè aget mè ametis,

²⁰sà echi òbokup me ugban òso ini obore karasolet mè onikisi mè jasipa. Mêsa alata araran̄ ikpa ikana me utọn̄ ewuuk cha isa itet ema igọm me lek ekwut isi ejit ya.

²¹Ewuuk cha ìbore akọp mè iba, igọọk me otu ifuk bọn ebirieen̄ kè Ijeren. Mêtibi erieen̄ kiban̄ ge ge kubọk iman̄ òriọọn̄ me inyọn̄ ewuuk cha, kpa erieen̄ kpa ewuuk eyi kan̄, mege iso akọp mè otoko iba kiban̄.

²²Mêsa alata araran̄ eyi kpewọlọ ikpa mkpọn ekpakpa kubọk olik isa igbaka me utọn̄ ekwut isi ejit ya.

²³Mêsa alata araran̄ irom ògbọ iba echi mêjeen̄be me ibot usọk agan̄ iba me lek ekwut isi ejit ya,

²⁴mè inisa ibot mkpọn alata araran̄ iba cha igọbọ me lek ògbọ cha me ibot usọk iba eyi ekwut isi ejit ya.

²⁵Mêsa ibot mkpọn iba agan̄ kechilọ cha igọbọ me lek alata araran̄ ekpabe ikana me utọn̄ ewuuk iba echi inu ǹkeek cha, mè isa me ikeya igọbọ ewuuk cha ikam me inyọn̄ oguga mgbidim ofọnti ikwaan̄ ya agan̄ iba me agan̄ isi ofọnti ya.

²⁶Mêsa alata araran̄ irọ ògbọ iba, mè isa igọbọ me ibot usọk iba kechilọ me lek ekwut isi ejit ya, me utọn̄ agan̄ emen echi òkup iriaak me lek mgbidim ofọnti ikwaan̄ ya.

²⁷Mêsa alata araran̄ irọ ofifi ògbọ iba, mè isa ichim itoon̄ me lek oguga iba eyi mgbidim ofọnti ikwaan̄ ya me ntut ijọn̄ kan̄ me agan̄ isi. Mêchim ògbọ cha igbet lek usọk ofọnti ikwaan̄ ya, inyi ibene sọnja inan̄a me lek fanti eyi ofọnti ya.

²⁸Mêsa eri oluku oluku itobo ògbọ òkup me lek ekwut isi ejit ya ikam me lek echi òkup me lek mgbidim ofọnti ikwaan̄ ya, inyi ekwut isi ejit ya ire ge melek fanti ofọnti ikwaan̄ ya, mè ekwut isi ejit ya ikajene ìnan̄a me lek ofọnti ikwaan̄ ya.

²⁹“Sa me ikeyi, mgbọ geelek Erọn mônin̄be Ere Mbuban, môkiben erieen̄ otoko ebi Ijeren me isi ejit kan̄ me lek ekwut isi ejit eyi ekisa iriọọn̄ nkeek Okumugwem. Eyiyi môre inu ǹkeek me isi Okumugwem mgbọ geelek.

³⁰Owu môtap si inu iba ekisa iroon̄ nriroon̄, echi ekigwen Urim mè Tumim, me emen ekwut isi ejit ya eyi ekisa iriọọn̄ nkeek Okumugwem, inyi itoon̄ me isi ejit kè Erọn mgbọ geelek môkije inu me isi Okumugwem. Sa me ikeya, Erọn môkiben inu mêsabe ikiriọọn̄ nkeek Okumugwem me ibot ebi Ijeren me isi ejit kan̄ mgbọ geelek.

³¹“Mêsa ekwut oluku oluku ichim uga àwurukù inyọn̄ eyi môjebe me lek mgbidim ofọnti ikwaan̄ ya.

³²Mêsan̄a ere ebekitap ibot itibi me eden̄ eden̄ ofọnti inyọn̄ ya. Ebelọlọk ebek ofọnti ya, mè ifan̄a igwook ikat ikana ere ebekitap ibot ya, inyi ikagwak. Atalek ogwu usọ ikwaan̄ ilọk-ekwut obolọk ebek ofọnti inyọn̄ ya.

³³Mêsa eri oluku oluku, mè echi irio irio, mè echi eje eje ilọk mfut uti pomegaranet ijijen ikana me utọn̄ àwurukù inyọn̄ ya, mè isa alata araran̄ irọ egiriga ijijen si me etete mfut pomegaranet cha me utọn̄ ofọnti ya.

³⁴Mêjijen egiriga alata araran̄ ge mè mfut pomegaranet ge, mè egiriga alata araran̄ ge mè mfut pomegaranet ge, ikeya ikana me utọn̄ àwurukù inyọn̄ ya.

³⁵Erọn ìbokitap ofọnti yi mgbọ geelek ìbokirọ ikwaan̄ kan̄ me isi Okumugwem. Ebi ene mêkinọ ida egiriga cha bene me mgbọ înin̄be emen Ere Mbuban inu me isi Okumugwem re mgbọ înan̄abe isibi, inyi ikakwu.

³⁶Mêsa alata araran̄ eyi kpewọlọ irom sọntiik akpakpa uwot ge, mè itibi iman̄ òriọọn̄ me lek ibe: ÌKUP MBUBAN INYI OKUMUGWEM.

³⁷Mêsa olik oluku oluku itobo me ibot akpakpa uwot alata araran̄ ya agan̄ iba, mè isa initobo ikam me lek okpibot kè Erọn me agan̄ isi.

³⁸Iman̄ òriọọn̄ yi môkup me inyọn̄ okwut isi kè Erọn, inyi Erọn ikiben awọ òje me lek inu mbuban geelek echi ebi Ijeren mêchebe inyi Okumugwem. Ikeyi ke ìbokup me lek otutuuk uche mbuban geelek. Iman̄ òriọọn̄ yi môkup me inyọn̄ okwut isi kè Erọn mgbọ geelek, inyi Okumugwem ikisa me ikeya ikibọkọ ebi Ijeren itap me isi kan̄.

³⁹“Mêsa atalek lilin̄ ilọk àwurukù irak, mè isa atalek lilin̄ ilọk si okpibot, inyi Erọn. Mêrọ si fanti inyi ọmọ. Ogwu usọ òkilọk ekwut me chieen̄ me chieen̄ obolọk fanti ya.

⁴⁰Mêrọ si àwurukù irak mè akisi mè fanti inyi bọn ebirieen̄ kè Erọn, echi òbonyi ema umin, mè irọ inyi ema ekup òrirọ òrirọ.

⁴¹Owu môsa ofọnti chi itap Erọn ngwan̄ kwun̄ melek ebi bọn, mè initọkọ ema aran̄ me ibot, mè ifaka ikwaan̄ kiban̄ itap ema me ubọk, mè isan̄a ema isun̄ esese inyi ekesi ikwaan̄ enyi emi kubọk ebi ngwugwa.

⁴²“Mêsa lilin̄ irọ ekwut-edim mgbidim ukot, eyi môjọn̄ọbe inan̄a me ebon isi ire owut-ukot, inyi ema mêkitap me irak.

⁴³Erọn mè ebi bọn mêkitap ekwut-edim cha mgbọ geelek ema mênin̄be Atanga Chinichini, mè ìre mgbọ ema mêjebe isi lek ntook ibesi igwa ngwugwa me Ere Mbuban, inyi awọ ikatet ema, inyi ema ekwaan̄. “Eyiyi môre ikan òkup inyi Erọn melek ebi bọn isi ire ukot geelek.”