Read obolo Isis 29 Bible Online

Isis 29 - obolo bible

Isis 29

¹Ikeyi ke obofaka ikwaan̄ itap me ubọk kè Erọn mè ebi bọn isa isun̄ ema esese, inyi ekesi ikwaan̄ enyi emi kubọk ebi ngwugwa. Owu môtet gwun̄ orie eriembuuk ge, mè bọn orie arọọn̄ iba kpunube ìroon̄ me lek.

²Owu môsa si atalek akpa wit ekọkọk, eyi kpunube olat me lek, irọ ata fituru mè fituru unin̄i unin̄i esabe aran̄ igbaalek irọ, mè nchicha echi egwookbe aran̄ me lek.

³Owu môtap otutuuk fituru chi me emen okwun ge, mè isa si orie eriembuuk ya mè orie arọọn̄ iba cha igbaalek inu me isi n̄a.

⁴Owu môsa Erọn mè ebi bọn inu me otunchit Atanga Chinichini, mè isa mun̄ igwọk ema lek,

⁵mè inikpulu ofọnti ebi ngwugwa cha isibi. Owu môtap Erọn àwurukù irak, mè àwurukù inyọn̄ eyi òje me lek mgbidim ofọnti ikwaan̄ ya, mè itap ọmọ mgbidim ofọnti ikwaan̄ ya me lek kan̄, mè ekwut isi ejit, mè initobo ọmọ fanti òje me lek mgbidim ofọnti ikwaan̄ ya.

⁶Owu môkwuun̄ ọmọ okpibot ya me ibot, mè initobo ọgbọn ubọọn̄ òkup mbuban ya me lek okpibot kan̄ ya,

⁷mè imọnọ aran̄ mbuban isa itọkọ ọmọ me ibot, mè isa me ikeya itọkọ ọmọ aran̄ me ibot.

⁸Owu môsa si bọn ebirieen̄ kan̄ inu, mè itap ema ofọnti irak,

⁹mè ibọp ema akisi me ibot, mè initobo Erọn melek kiban̄ fanti me ebon. Erọn mè ebi bọn gaalek ebekire ebi ngwugwa. Eyi ìre ikan òkup ire mgbọ geelek. Sa me ikeyi ke owu môfaka ikwaan̄ ngwugwa itap me ubọk kè Erọn mè ebi bọn.

¹⁰Owu môsa orie eriembuuk ya inu me isi Atanga Chinichini, inyi Erọn mè ebi bọn ebirieen̄ etoon̄ ubọk kiban̄ me ibot.

¹¹Mênenigwu orie eriembuuk ya me isi Okumugwem, me otunchit Atanga Chinichini.

¹²Owu môsa otubọk kwun̄ ijiin̄ me emen eje eriembuuk ya, mè isa ichiọọk me lek iko ini òkup me lek ntook ngwugwa ya, mè iben eyi òsisik igwook me ijọn̄ me ebon ntook ya.

¹³Mêsan̄a otutuuk okpọn̄ òkakana ichit inu emen owot eriembuuk ya, mè echi òkup me lek ejit, mè isan̄a si ichip iba eriembuuk ya, mè okpọn̄ òkakana ichit ema, mè iwọp ema me inyọn̄ ntook isa igwa ngwugwa, inyi oduku ònan̄a me lek ikifo inyọn̄.

¹⁴Ire, ufuk eriembuuk ya mè akpa kan̄ mè unwan̄ emen okpu kan̄ cha, mêben isa isibi oyet ifo udun̄ ere m̀gba-ǹgwele ukan̄ ya isi itap ukan̄ iwọp itaka iriọk, mije îre ngwugwa ijo inu ke îre.

¹⁵Mêtet orie arọọn̄ cha ge isibi, inyi Erọn mè ebi bọn ebirieen̄ etoon̄ ubọk kiban̄ me ibot,

¹⁶mè inigwu arọọn̄ ya. Owu môsa eje kan̄ igwook ikana me ebon ntook ngwugwa ya okokop.

¹⁷Mêbak anam arọọn̄ ya igọọk ubọk ekibak anam. Mêgwọk inu emen owot kan̄ cha mè ukot kan̄ cha, mè ititiin̄ ema mè ibot kan̄ ya mè ofifi okpọkọ kechilọ igbaan̄ isun̄.

¹⁸Mêwọp otutuuk anam arọọn̄ ya me inyọn̄ ntook, inyi oduku kan̄ ikifo inyọn̄, mije, îre ngwugwa ewọwọp iriọk eyi òkidun̄u utop olu ke îre inyi Okumugwem. Eyiyi ìre ngwugwa ukan̄ òkup inyi Okumugwem.

¹⁹“Mêtet orie arọọn̄ eyi òso iba ya isibi, inyi Erọn mè ebi bọn ebirieen̄ etoon̄ ubọk kiban̄ me ibot,

²⁰mè inigwu arọọn̄ ya. Owu môsa eje kan̄ itọk me inwan̄ utọn̄ agan̄ ulom kè Erọn mè inwan̄ utọn̄ agan̄ ulom ebi bọn, mè itọk si me otubọk ile kiban̄ eyi agan̄ ulom, mè otukot ile agan̄ ulom, mè isa si eje arọọn̄ ya igwook ikat ikana me ebon ntook ngwugwa ya okokop.

²¹Owu môsa usini eje òkup me lek ntook ya igbaan̄ ifuku melek aran̄ mbuban, mè inisa inyan me lek kè Erọn mè lek ofọnti kan̄ cha, mè isa inyan si me lek ebi bọn ebirieen̄ mè lek ofọnti kiban̄ cha. Sa me ikeya, ọmọ, melek otutuuk ofọnti kan̄, mè ebi bọn, ebirieen̄ melek otutuuk ofọnti kiban̄ mêkukup mbuban.

²²“Owu mômọnọ okpọn̄ ònan̄a me lek arọọn̄ ya, eyi òkup me edim kan̄ ere òkup ufuk ufuk, mè okpọn̄ eyi òkakana ichit inu emen owot kan̄, mè eyi òchichit otu utọn̄ ejit kan̄, mè ichip iba kan̄ melek okpọn̄ òkakana ichit ema, mè owut-ukot kan̄ agan̄ ulom. Eyiyi ìre orie arọọn̄ isasa ifaka ikwaan̄ itap ema me ubọk.

²³Me emen okwun fituru kpunube olat me lek eyi òkup me isi Okumugwem, owu mômọnọ owot fituru ge mè fituru unin̄i unin̄i ge esabe aran̄ igbaalek irọ, mè imọnọ si nchicha ge,

²⁴mè isa itap me akajit ubọk kè Erọn mè akajit ubọk ebi bọn ebirieen̄, mè iwuwum inu chi me isi Okumugwem kubọk ngwugwa ewuwuwum.

²⁵Owu mônenibọkọ ema inu cha isan̄a me ubọk, mè isa isi itoon̄ me inyọn̄ ntook ngwugwa, mè iwọp ema melek inu ngwugwa ewọwọp iriọk, inyi oduku kiban̄ ikifo inyọn̄, mè ikidun̄u utop olu me isi Okumugwem. Eyiyi ìre ngwugwa ukan̄ òkup inyi Okumugwem.

²⁶Owu môbene isi ejit arọọn̄ ya esabe ifaka ikwaan̄ itap Erọn me ubọk iwuwum, kubọk ngwugwa ewuwuwum me isi Okumugwem. Osirọ isan̄a, isi ejit arọọn̄ ya mônenikana uche anam ngwugwa eyi kwun̄.

²⁷“Me lek arọọn̄ ya eyi esabe ifaka ikwaan̄ itap me ubọk ebi ngwugwa cha, owu môgbama lek okpọkọ echi òkup inyi Erọn mè echi òkup inyi ebi bọn. Okpọkọ cha echi obosan̄a isun̄ me mbuban ìre isi ejit arọọn̄ ya eyi ewuwumbe, mè owut-ukot eyi enyibe kubọk inyinyi mè ibene ifo inyọn̄ mè iwuwum.

²⁸Okpọkọ kechi me lek anam ngwugwa geelek môkire uche kè Erọn mè ebi bọn inan̄a me ubọk ebi Ijeren, mije, îre inyinyi ebi Ijeren ekisa inyi Okumugwem. Eyi ìre ikan òbokikup me ukot geelek. Okpọkọ kechi môkire inyinyi eyi ebi Ijeren ebekinyi Okumugwem inan̄a me lek ngwugwa esuuk geelek ema ebekigwa.

²⁹Ire Erọn ikwu, otutuuk ofọnti mbuban kan̄ cha môkana inikup inyi bọn kan̄ ebi ìgọọk ọmọ me udun̄. Sa me ikeyi ke mêkitọkọ ema aran̄ me ibot, isasa ifaka ikwaan̄ ngwugwa itap me ubọk ebi bọn.

³⁰Gwun̄ enerieen̄ kè Erọn geelek, ogwu irek isisi ikwaan̄ kubọk ogwu ngwugwa orebe lek, ogwu òbokinin̄ Atanga Chinichini inisi ikwaan̄ me Ere Mbuban, gwun̄ enerieen̄ ya môtap ofọnti ikwaan̄ kè Erọn cha otuuk kè usen jaaba.

³¹“Mêgwu orie arọọn̄ mfaka eyi ifafaka ikwaan̄ itap ene me ubọk ya, mè item anam kan̄ me ere òkup mbuban.

³²Erọn mè ebi bọn mêkup me otunchit Atanga Chinichini itaka anam ya melek fituru òkup me emen okwun ya.

³³Îre ema eberie inorie esabe igwa ngwugwa chi, òrere ngwugwa esabe irọ esuuk me mgbọ etọkọbe ema aran̄ me ibot, mè isan̄a ema isun̄ esese, mè ifaka ikwaan̄ ya itap ema me ubọk. Ilọ me lek kiban̄, ebi ofifi ife kpeberie inorie ya, mije, îre inorie òkup mbuban.

³⁴Ire ikaan̄ echi òsisik me lek anam mfaka ya mè ìre me lek fituru ya ire ewelegwe, ebewọwọp itaka iriọk me ukan̄. Kpeberie, mije, îre inorie òkup mbuban.

³⁵“Owu môrọ otutuuk inu geelek nnyibe owu ida ibe owu òrọ me lek kè Erọn mè lek ebi bọn. Owu môsa usen jaaba ifaka ikwaan̄ itap ema me ubọk.

³⁶Mêkigwu orie eriembuuk ge usen geelek isa ikigwa ngwugwa ijo inu, isasa irọ esuuk. Mêgwa si ngwugwa ijo inu me inyọn̄ ntook ngwugwa ya, isasa irọ esuuk me lek ntook ya, mè initọkọ aran̄ me lek ntook ya, inyi ikup me mbuban.

³⁷Mêsa usen jaaba igwa ngwugwa isasa irọ esuuk me lek ntook ngwugwa ya, inyi ikup mbuban. Sa me ikeya, ntook ya mônenikana inu òkup mbuban ichit, inyi inu geelek òchachak me lek kan̄ môkana inu òkup mbuban.

³⁸“Ngwugwa obokigwa me inyọn̄ ntook ngwugwa ya usen geelek ìre ikeyi: Usen geelek, owu môkigwu bọn arọọn̄ iba òsoso acha ge ge,

³⁹gwun̄ arọọn̄ ge me ewelegwe, gwun̄ arọọn̄ ge me otu ikakwun̄.

⁴⁰Mêsa iko atalek akpa ekọkọk iba eyi esabe aran̄ esan̄abe me lek mfut olifu eyi echichimi igwa me lek, mè isa si iko miin̄ ge eyi ngwugwa miin̄ egwogwook, igbaalek gwun̄ arọọn̄ ge, isa igwa ngwugwa eyi ewelegwe.

⁴¹Mêsa gwun̄ arọọn̄ eyi òso iba igwa ngwugwa eyi otu ikakwun̄, melek si chieen̄ ngwugwa eyi akpa mè eyi miin̄ eyi egwabe me ewelegwe. Eyiyi mônenire ngwugwa òkidun̄u utop olu, mè ire si ngwugwa ukan̄ isa inyi Okumugwem.

⁴²“Ikeyi ke enyi ebekigwa ngwugwa ewọwọp iriọk me otunchit Atanga Chinichini usen geelek me isi Okumugwem me ukot kinyi geelek. Me otunchit Atanga Chinichini ya ke mâkichichini melek kinyi, mè ikitumu ikọ inyi owu.

⁴³Me ere ya si ke mâkichichini melek ebi Ijeren. Ere ya si môkup me mbuban bak me lek ujamgbugbo n̄a.

⁴⁴“Mârọ inyi Atanga Chinichini ya mè ntook ngwugwa ya ikup me mbuban. Mâsan̄a si Erọn mè ebi bọn ebirieen̄ isun̄ esese, inyi ema ekup me mbuban, inyi ekesi ikwaan̄ enyi emi kubọk ebi ngwugwa.

⁴⁵Mânu iniluk me etete ebi Ijeren. Mâre si Awaji inyi ema.

⁴⁶Mgbọ ya, ema mêniriọọn̄ ibe ke emi nre Okumugwem Awaji kiban̄, ogwu òsasan̄a ema isibi me ido Ijipiti, inyi emi ǹnenluk me etete kiban̄. Emi nre Okumugwem Awaji kiban̄.