Read obolo Isis 3 Bible Online

Isis 3 - obolo bible

Isis 3

¹Me ike mgbọ ya Mosis okekikpukpo anam ogwu ute-nwa, òrere ogwu òban yọk ido Midian, ogwu ekigwen Jeturu.[3] Usen ge, Mosis onenisa anam cha ije me agan̄ udun̄ èwê, mè inire lek ogoon̄ Awaji okisibi ikeke me inyọn̄, òrere ogoon̄ Orebu.

²Ogwu osat Okumugwem okakana isibi me isi kè Mosis, me emen alọm ukan̄ me lek gwun̄ uti ge me ere ya. Mosis îmun̄ ike ukan̄ okisak me lek gwun̄ uti ya, ire, ukan̄ ya ìkataka uti ya.

³Mije keya, Mosis obebe, “Mâje igbet-nu isi iriọọn̄ ubọk ikpọ ikpele nke nke inu keyi, ìre keke orọ ukan̄ ìkataka gwun̄ uti yi ìriọk!”

⁴Mgbọ Okumugwem omun̄be ibe ke Mosis îje igbet ere ya ibonikpọ inu ya òkirọ, ikukup me etete inwan̄ gwun̄ uti ya ikigwen ọmọ, “Mosis! Mosis!” Mosis ochechieek, “Iin̄, kpọ emi ire eyi.”

⁵Okumugwem obebe ọmọ, “Kaje ìgbet! Wọọk ikpukot òkup owu me ukot san̄a, mije, ijọn̄ ere okekebe ya, ijọn̄ mbuban ke îre.”

⁶Itutumu inyi ọmọ ibe, “Emi ìre Awaji ebi nte nte kwun̄. Emi ìre Awaji kè Ebereyam, mè Awaji kè Ajiki, mè Awaji kè Jekọp.” Mgbọ Mosis onọbe ida ya, ichichit isi kan̄ mije ukpook, ìkakọt ìbene chieen̄ ìkpọ Awaji.

⁷Okumugwem otutumu inyi ọmọ ibe, “Me atikọ, emi nra imun̄ tukutuku ebi n̄a ekibọkọ me Ijipiti. Nra inọ si ida ito ema ekito me irak ikpele ufialek ebi ìkitọ ikwaan̄ me nnaan̄ cha ekinyi ema. Ukwook ema ekimun̄ îjot emi chieen̄.

⁸Mije keya ke nsibi inu inenisan̄a ema isibi me ubọk ebi Ijipiti, mè ikpulu ema isibi me ijọn̄ Ijipiti isa ifo inyọn̄ ijọn̄ ònwọnwọn, mè ita ema lek, ata ijọn̄ òkisibi anam mè mfut uti, òrere ijọn̄ ebi Kenan, mè ebi Et mè ebi Amọ, mè ebi Pereji, mè ebi Ifi, mè ebi Jebus.

⁹Me mgbọ yi, ida ito ebi Ijeren îre emi utọn̄. Mmun̄ si ubọk ebi Ijipiti ekitutuku ema.

¹⁰Eya orọ, mgbọ keyi, mâniria owu isi lek ogwu Fero. Owu môsi isan̄a ebi n̄a, ebi Ijeren, isibi me ido Ijipiti.”

¹¹Ire, Mosis otutumu inyi Awaji ibe, “Ìre emi ìre ekene, ogwu òbokọt isi lek ogwu Fero, mè isi isan̄a ebi Ijeren isibi me Ijipiti?”

¹²Okumugwem otutumu inyi Mosis ibe, “Emi mâkup melek kwun̄. Mgbọ owu osisa ebi Ijeren isibi me Ijipiti, enyi mêtọbọ ebum inyi Awaji me inyọn̄ ogoon̄ keyi eyi owu okimun̄. Eyi obore inu ijejeen̄ inyi owu ibe ke îre emi nria owu.”

¹³Mosis oneniyaka ido Awaji ibe, “Ire nsi lek ebi Ijeren, mè itumu inyi ibe ke Awaji ebi nte nte kiban̄ oria emi inu me lek kiban̄, ire ema inido emi ibe, ìre keke ire erieen̄ Awaji ya, ìre keke ke mbatumu inyi ema?”

¹⁴Awaji ofọfọọk Mosis ibe, “Emi Ìre Ogwu Nrebe.[4] Tumu nyi ebi Ijeren ibe ke ‘Emi Ìre Ogwu Nrebe’ oria owu inu me lek kiban̄.”

¹⁵Ikpọkpọk itumu inyi Mosis ibe, “Tumu nyi ebi Ijeren ibe ke îre Okumugwem, Awaji ebi nte kiban̄, Awaji kè Ebereyam mè Awaji kè Ajiki mè Awaji kè Jekọp, oria owu inu me lek kiban̄. Erieen̄ n̄a ire eya ire mgbọ geelek. Îre erieen̄ keyi ke ebi ukot geelek ebesa ikiriọọn̄ emi mege isi ire mgbọ ikakaan̄ge itata.

¹⁶“Eya orọ, fo, mè si titiin̄ ebi ugane Ijeren, mè tumu nyi ema ibe ke Okumugwem, Awaji ebi nte nte kiban̄, òrere Awaji kè Ebereyam mè Ajiki mè Jekọp, ochichini owu, mè itumu inyi owu ibe, me atikọ, ke ọmọ îra itap chieen̄ ikpọ, mè imun̄ otutuuk inu ekirọ ebibi me Ijipiti isan̄a kpai.

¹⁷Tumu nyi ibe ke emi nra itumu ifieek ibe ke mâsan̄a ebibi isibi me emen ijo irek tukutuku ema ekupbe me Ijipiti, mè isa ema isi inyi ijọn̄ ebi Kenan, mè ebi Et, mè ebi Amọ, mè ebi Pereji, mè ebi Ifi, mè ebi Jebus, ata ijọn̄ òkisibi anam mè mfut uti.

¹⁸“Ositumu ikọ chi inyi ema, ema mêgban̄ ida kwun̄, mè ibọkọ ikọ kwun̄ itap. Owu melek ebi ugane Ijeren cha mênenigbaan̄ ije isi lek ogwu ubọọn̄ Ijipiti, mè isi itumu inyi ọmọ ibe, ‘Okumugwem Awaji ebi Iburu îsibi ichichini melek kiji. Eya orọ, soso tele mè eji eje ije egwe ita enin̄ emen èwê esi egwa ngwugwa enyi Okumugwem Awaji kiji.’

¹⁹Ire, emi nriọọn̄ ijaan̄ lek ibe ke ogwu ubọọn̄ Ijipiti ìkpotele mè enyi enan̄a eje ije ya, îtata mè etetet ọmọ me unye ubọk.

²⁰Eya orọ, mâjeen̄ ọmọ unye ubọk n̄a! Mârọ owuwa uyeke inu òkup esese esese me etete ebi Ijipiti isa isulu ema osusut ubọk ògbegbe. Nsirọ isan̄a, ogwu Fero mônenitolek itele ibe enyi efon.

²¹“Mârọ si mè ebi Ijipiti ekaan̄ ata ejit me lek ebi Iburu, inyi enyi ekaje ukpọk ubọk mgbọ enyi mêbenan̄a me Ijipiti isibi.

²²Ogwu enenwaan̄ Ijeren geelek môsi lek ogwu enenwaan̄ Ijipiti ogwu melek kan̄ egbaan̄be iluk me ere ge, mè ìyaka ire ogwu ògọọk ọmọ iluk me uwu ge, mè ido inu mbala-lek echi alata araran̄ mè echi alata okuket, mè ofọnti mè ekwut. Enyi mênenisa inu chi ibala nsabọn kinyi ebirieen̄ mè ebibaan̄, mè isa me ikeya ikwọọk ebi Ijipiti irak.”