Read obolo Isis 31 Bible Online

Isis 31 - obolo bible

Isis 31

¹Okumugwem onenitumu inyi Mosis ibe,

²“Kpọ, nra igobo Bejalen gwun̄ kè Uri, gwun̄ kè Uru, ogwu egep kè Juda,

³mè itap ọmọ Ekwukwu Awaji me emen eyi òbonyi ọmọ iriọọn̄-inu mè ngobo-ntet mè ifuk-ibot eyi ikwaan̄ òkup esese esese,

⁴inyi ọmọ môkọt ikililọkọ inu alata okuket, mè echi alata araran̄, mè echi ekwe,

⁵mè ifieek ewuuk isa ikinwunwan̄ me chieen̄ inu cha, mè iriọọn̄ isa uti ikikọ inu òkup esese esese, mè iriọọn̄ si ikirom sọkọsọkọ inu òkup nke nke.

⁶Kpọ, emi nra isa ubọk n̄a igobo si Oyoliabu gwun̄ kè Ayisamak, ogwu otoko kè Dan, isa inyi ọmọ ibe ikigọọk ọmọ isi ikwaan̄. Ntap si iriọọn̄-inu me emen otutuuk ebi usọ ikwaan̄ geelek, inyi ema mêkọt irọ otutuuk inu geelek nnyibe owu ida ibe erọ.

⁷Ema mêrom Atanga Chinichini, mè okop ata-ikọ mè ogboon̄ nsan òkup me inyọn̄ kan̄, mè otutuuk nroon̄ òje me lek Atanga Chinichini,

⁸mè ikasi Fituru Isi Awaji, mè otutuuk nroon̄ òje me lek, mè ngugọọn̄ mkpukan̄ eyi esabe alata araran̄ eyi kpewọlọ irom, mè otutuuk nroon̄ òje me lek, mè ntook nsensi,

⁹mè ntook ngwugwa, mè otutuuk nroon̄ òje me lek, mè okwa igwọk-lek, mè urak kan̄.

¹⁰Ema mêrom si ofọnti echi ebelọlọk, mè irom si ofọnti mbuban inyi Erọn ogwu òban Awaji mè ebi bọn, inyi ema mêkisa isi ikwaan̄ kubọk ebi ngwugwa.

¹¹Ema mêrọ si aran̄ ebekisa itọkọ ene me ibot, mè irọ nsensi utop olu echi ebekisa irọ ikwaan̄ me Ere Mbuban. Otutuuk inu cha geelek nnyibe owu ida ibe erọ, îre ema eberọ otutuuk isan̄a kpai.”

¹²Okumugwem onenitumu inyi Mosis ibe

¹³itumu inyi ebi Ijeren ibe, “Ikalọlọ ikekisun̄ Usen Mbuban n̄a, mije, eyiyi ìre inu ijejeen̄ òkup me etete kinyi melek n̄a me ukot kinyi geelek. Eyiyi ke mêkisa iriọọn̄ ibe ke emi nre Okumugwem ogwu òsasan̄a enyi isun̄ esese, inyi enyi ekup me mbuban.

¹⁴“Ìkisun̄ Usen Mbuban, mije, îre usen òkup mbuban isa inyi enyi. Ene geelek òchachaka mbuban me lek usen ya ìbokwukwu. Mije, ene geelek òrọrọ ikwaan̄ me usen ya, ebesasan̄a ene ya isan̄a me otu ifuk ebi kiban̄.

¹⁵Usen gweregwen ke enyi ebekisa irọ ikwaan̄ kinyi. Ire, òso usen jaaba ya ìre Usen Mbuban eyi itap-efuuk. Usen ya ìre usen òkup mbuban inyi Okumugwem. Ene geelek òrọrọ ikwaan̄ geelek me usen ya, ebekpakpan̄.

¹⁶Ebi Ijeren mêkisun̄ Usen Mbuban, mè ikifaka mfaka Usen Mbuban me ukot geelek. Eyiyi ìre inyan̄a-ibot eyi mgbọ geelek.

¹⁷Eyi ìre inu ijejeen̄ eyi òkup inyi emi melek ebi Ijeren ire mgbọ geelek, mije, usen gweregwen ke emi Okumugwem nsa irom inyọn̄ mè ijọn̄, mè itele ikwaan̄ me òso usen jaaba, mè isa usen ya isiki efuuk.”

¹⁸Mgbọ Okumugwem otumube otutuuk ikọ chi isan̄a inyi Mosis me inyọn̄ ogoon̄ Saina, ineninyi Mosis akpakpa ewuuk iba eyi Inyan̄a-ibot, òrere ewuuk iba echi egebe Akọp Ikan me lek. Îre Awaji gaalek osa otubọk kan̄ ige inu me lek akpakpa ewuuk iba cha.