Read obolo Isis 32 Bible Online

Isis 32 - obolo bible

Isis 32

¹Mgbọ ebi Ijeren emun̄be ibe ke Mosis ìkpọkpọ ibia me inyọn̄ ogoon̄ ya, ema egbugbuku isi lek kè Erọn, mè ibe ọmọ, “Na na rọ awaji nyi eji echi òbokije me isi kiji me oniin̄ ije kiji, mije, Mosis ogwu òsasa eji inan̄a me Ijipiti isibi, eji kperiọọn̄ inu òsisibi inyi me inyọn̄ ogoon̄ ere îsibe.”

²Erọn ofọfọọk ema ibe, “Ire ikeya, ìjene otutuuk mkputọn̄ alata araran̄ òkup me utọn̄ ebi nwa kinyi, mè utọn̄ bọn kinyi ebibaan̄ mè ebirieen̄, mè ìsa ìjet emi.”

³Otutuuk ebi Ijeren ejejene otutuuk mkputọn̄ alata araran̄ òkup me utọn̄ kiban̄, mè ikpulu isa ijet Erọn.

⁴Erọn obọbọkọ otutuuk alata araran̄ ebi Ijeren esabe ijet ọmọ, mè ikala, mè isa itọkọ mkpọmfaka òkup kubọk gwun̄ eriembuuk. Ema enenisa eriembuuk ya ijeen̄ ebi ene, mè itumu inyi ibe, “Ebi Ijeren, ìkpọ, echichi ere awaji kinyi, echi òsasa enyi inan̄a isibi me Ijipiti!”[22]

⁵Mgbọ Erọn omun̄be inu yi, ineninama ntook ngwugwa me isi eriembuuk ya, mè itumu inyi ebi Ijeren ibe, “Iyakwut, mêrie ijọk isa itọn̄ Okumugwem!”

⁶Me ofit iwele kan̄, ebi Ijeren enanan̄a ikeke me ata ewelegwe, mè ikpan̄ anam isa igwa ngwugwa ewọwọp iriọk mè ngwugwa esuuk, mè isiki ikweek ikirie inorie cha, mè ikinwọ miin̄, mè inan̄a ikeke ikifit ifit ijọk.

⁷Okumugwem onenitumu inyi Mosis ibe, “Ngwa, sibi ijọn̄, mije, ebi kwun̄, ebi owu okpulube inan̄a me Ijipiti isibi, mîra ifiat lek kiban̄ isan̄a.

⁸Me ikafiatge mgbọ, ema mîgwu ikom itele oniin̄ eyi nnyibe ida ibe ema egọọk, mè isi ikala alata araran̄ isa itọkọ mkpọmfaka eriembuuk, mè ikitọbọ ibot inyi, mè ikigwa ngwugwa inyi, mè ikitumu ibe, ‘Ebi Ijeren, ìkpọ, echichi ere awaji kinyi, echi òsasa enyi inan̄a isibi me Ijipiti.’ ”

⁹Okumugwem onenitumu inyi Mosis ibe, “Kpọ, nra imun̄ isan̄a inu ife chi erebe. Ema ìre ebi unye-ibot, mè ife ìnan-utọn̄.

¹⁰Eya orọ, mgbọ keyi, juuk emi tele, inyi ǹjeen̄ ema uyok uyok unaan̄-ejit n̄a, inyi itaka ema iriọk kubọk ukan̄. Nsirọ isan̄a, mânenirọ inyi owu òmumana, mè òkana ikpele ido.”

¹¹Mosis orariaak Okumugwem Awaji kan̄, mè ibeek ọmọ ibe, “Okumugwem, òjeje inaan̄ ejit unye unye ikeyi me lek ebi kwun̄? Keek ibe ke îre owu osa me ikpele unye kwun̄ ikpulu ema isibi me Ijipiti.

¹²Ìre owu môfat ichieek ibe ebi Ijipiti enetumu ibe ke îre mije owu oweekbe ikpakpan̄ ife chi isan̄a me linyọn̄ orọ owu osabe unye ubọk inifiaan̄ ema isibi me Ijipiti, inyi owu môsa ema isi ikpan̄ isan̄a me inyọn̄ ogoon̄? Soso tele uyok uyok unaan̄-ejit kwun̄. Nwene ejit, mè kasa ijo inu yi ìnirọ ebi kwun̄.

¹³Keek use eyi owu ochieekbe ebi usun̄ kwun̄ Ebereyam mè Ajiki mè Ijeren. Owu osa lek kwun̄ inyan̄a ibot inyi ema ibe, ‘Marọ inyi owot iman kinyi imumana, mè iwa kubọk ntoronyan̄ òkup me akpabin inyọn̄. Otutuuk ijọn̄ chi nchieekbe enyi me use, mâsa inyi bọn owot iman kinyi, inyi ikana ìrot kiban̄ mege ire mgbọ ikakaan̄ge itata.’ ”

¹⁴Okumugwem onenitele unaan̄-ejit kan̄, ìkayaka ìkpan̄ ebi kan̄ ike îwuukbe lek itumu ibe ke ọmọ môrọ.

¹⁵Mosis onenigwu ikom, mè inan̄a me inyọn̄ ogoon̄ ya isibi ika, melek akpakpa ewuuk iba cha me ubọk, ewuuk cha echi Okumugwem ogebe akọp ikan cha ijot lek, isi mè udun̄.

¹⁶Akpakpa ewuuk cha ìre ubọk ikwaan̄ Awaji me lek kan̄. Inu cha egebe me lek si ìre ubọk ige-inu eyi Awaji me lek kan̄. Îre Awaji me lek kan̄ otibi ikọ cha me lek akpakpa ewuuk iba cha.

¹⁷Mgbọ Josuwa onọbe ida okput ebi ene ekitaan̄ ukpo, itutumu inyi Mosis ogwu melek kan̄ ibe, “Gban̄-nu, ìbet lek ida okput akọn̄ okitaan̄ me ere m̀gba-ǹgwele ukan̄ ere ebi Ijeren elukbe.”

¹⁸Mosis ofọfọọk ibe, “Ìkare ida okput ijọk ntim-mkpan̄, ìkarere si ida okput ito ebi etimbe ikpan̄, îre ida okput okwa unwọọn̄ ke nkinọ.”

¹⁹Mgbọ Mosis ojebe igbet ere m̀gba-ǹgwele ukan̄ ya ebi Ijeren elukbe, mè imun̄ eriembuuk ya, mè imun̄ ike ebi ene ekijop ifit, ejit onanaan̄ ọmọ enenen. Ibeben akpakpa ewuuk iba cha òkup ọmọ me ubọk kan̄ itọbọ ibak me ebon ogoon̄ ya,

²⁰mè iniben gwun̄ eriembuuk ya ebi Ijeren erọbe, mè itap ukan̄ iwọp, mè ikọk iriọk kubọk ntọn̄, mè ikpulu igigen̄e me emen mudim, mè irọ inyi otutuuk ebi Ijeren enwọ mun̄ ya.

²¹Òta me ubọk, Mosis onenido Erọn ibe, “Ìre kpasi ijo inu ke ife chi erọ owu, eyi owu orọbe inyi ema erọ ikpele ijo inu keyi?”

²²Erọn orariaak Mosis ibe, “Soso kanaan̄ ejit ìnyi emi, ogwu nte. Owu me lek kwun̄ oriọọn̄ ebi ife chi erebe. Owu oriọọn̄ ibe ke irọrọ ijo inu ke ife chi ekup me lek.

²³Ema gaalek eje inu me lek n̄a, mè inibe emi, ‘Na na rọ awaji nyi eji, echi òbokije me isi kiji me oniin̄ ije kiji, mije, Mosis ogwu òsasa eji inan̄a me Ijipiti isibi, eji kperiọọn̄ inu òsisibi inyi me inyọn̄ ogoon̄ ere îsibe.’

²⁴Îre mije keya ke emi nnibe ema, ene geelek òkakaan̄ alata araran̄, isa ijet emi. Ema esasa alata araran̄ cha ijet emi, ntatap me ukan̄ ikala. Ikeya ke gwun̄ eriembuuk yi osa inan̄a isibi.”

²⁵Mosis omumun̄ ibe ke kpeyaka ikọt itet ebi Ijeren, ke Erọn îtele inyi ebi Ijeren ekpọkpọ erọ inu òneme ema, mè ekana inu ochak me isi ebi ochicha kiban̄.

²⁶Eya orọ, Mosis ojeje isi ikeke me otunchit ere m̀gba-ǹgwele ukan̄ ya, mè itaan̄ ukpo ikitumu ibe, “Ene geelek òkekeke inyi Okumugwem, ene ya isibi inu me agba lek n̄a.” Otutuuk ebi otoko kè Libai esisibi isi ikeke me agba lek kan̄.

²⁷Mosis onenitumu inyi ema ibe, “Okumugwem, Awaji ebi Ijeren ìtumu ibe ikeyi, ‘Ene geelek imọnọ oge akọn̄ kan̄ inwaan̄ me agba ebon kan̄, mè ijijen̄e ikana otutuuk ere m̀gba-ǹgwele ukan̄ ya ebi Ijeren elukbe me otunchit me otunchit, mè ogwu ikup ikpan̄ ogwu ngwan̄, mè ìre ogwu melek kan̄, mè ìyaka ire ogwu uwu kiban̄.’ ”

²⁸Otutuuk ebi otoko kè Libai erọrọ ike Mosis onyibe ida, inu òsoso obop ene ita ekwakwaan̄ me etete ebi Ijeren me usen ya gaalek.

²⁹Mosis onenitumu inyi ema ibe, “Enyi mîgban̄ ida Okumugwem chereyi, enyi ebi geelek ìkpakpan̄ ebi bọn mè ebi ngwan̄. Mije keya, ìgbama lek kinyi cherekeyi ìsun̄ esese ìnyi Okumugwem, inyi Okumugwem igbana enyi.”

³⁰Me ofit iwele kan̄, Mosis onenitumu inyi ebi Ijeren ibe, “Ìkpọ, enyi mîrọ atalek ikpele ijo inu. Ire, mgbọ keyi, mânene inyọn̄ ogoon̄ isi lek Okumugwem, isi ibeek ibe itele ijo kinyi inyi enyi. Usini mgbọ, mâkọt irọ esuuk me ibot kinyi mije ijo inu kinyi.”

³¹Mosis ogwugwu ikom isi lek Okumugwem, mè iriaak ibe, “Me atikọ, ife chi mîrọ owu ilọ enenen, mije, ema mîrọ awaji alata araran̄ inyi lek kiban̄.

³²Ire, me mgbọ keyi, ǹkiriaak owu ibe, soso, tele ijo kiban̄ nyi ema. Ire, ire owu òkpotele ijo kiban̄ inyi ema, soso, tutuku emi san̄a me emen ikpa owu ogebe.”

³³Okumugwem ofọfọọk Mosis ibe, “Ogwu òrọrọ emi ilọ, ogwugwa ke mbatutuku isan̄a me emen ikpa n̄a.

³⁴Mgbọ keyi, gwu kom fo, mè si sa ife cha si ere ya ntumube inyi owu. Ogwu osat n̄a môkije enyi me isi. Mgbọ mâbasut ema osusut isikem, mâsut ema osusut mije ijo inu kiban̄.”

³⁵Okumugwem oraria ijo orukan̄ itap me etete ebi Ijeren, mije ema etọbọbe ebum inyi mkpọmfaka eyi gwun̄ eriembuuk ya, eyi Erọn orọbe inyi ema.