Read obolo Isis 35 Bible Online

Isis 35 - obolo bible

Isis 35

¹Mosis onenigwen otutuuk otoko ebi Ijeren ititiin̄, mè inibe ema, “Echichi ore inu Okumugwem onyibe ida ibe enyi ekerọ.

²Usen gweregwen ke enyi mêkisa irọ ikwaan̄, ire, òso usen jaaba môre usen òkup mbuban isa inyi enyi, mè ire Usen Mbuban eyi itap-efuuk isa inyi Okumugwem. Ene geelek òrọrọ ikwaan̄ me usen ya, ebekpakpan̄.

³Ekasọk ukan̄ geege me otutuuk ere geelek ebi kinyi elukbe me Usen Mbuban.”

⁴Mosis onenitumu inyi otutuuk ebi Ijeren ibe, “Eyiyi ìre Ikan Okumugwem onyibe ibe emi ǹsa ǹnyi enyi.

⁵Ogwu ikup, isa me otutuuk ejit kan̄ imọnọ inyinyi me lek inu îkaan̄be me uwu isa ijet Okumugwem. Mêkọt inyi inyinyi alata araran̄, mè alata okuket, mè ekwe,

⁶mè eri oluku oluku, mè echi irio irio, mè echi eje eje, mè atalek lilin̄, mè inwọọn̄ ebot,

⁷mè ikpa orie arọọn̄ ekpan̄be chieen̄ ikana araran̄, mè ikpa ima, mè uti akasia,

⁸mè aran̄ olifu eyi mêkisa imin mkpukan̄, mè owuwa inu utop olu echi mêsabe irọ aran̄ mbuban, mè nsensi òkidun̄u utop olu,

⁹mè ewuuk unye otu ewe onikisi, mè owuwa esese chieen̄ ewuuk unye otu ewe echi mêsabe inwunwan̄ me lek mgbidim ofọnti ikwaan̄ ogwu òban Awaji mè lek ekwut isi ejit kan̄.

¹⁰“Otutuuk ebi usọ ikwaan̄ ìkup me etete kinyi mênu, mè inirọ otutuuk inu geelek Okumugwem onyibe ida ibe erọ.

¹¹Mêrọ Akpatan̄ Mbuban mè atanga kan̄ mè otutuuk inu mêsabe igbaka ichit lek, mè ugọbọ kan̄ mè agbasi kan̄ cha mè mgbugban kan̄ mè atà kan̄ cha mè urak kiban̄.

¹²Mêrọ si okop inyan̄a-ibot mè ogbugboon̄ echi ebekisa iben, mè ogboon̄ nsan, mè ekwut mgban ekisa ifieek ikwek.

¹³Mêrọ ikasi Fituru Isi Awaji, mè ogbugboon̄ òje me lek mè nroon̄ kan̄ geelek, mè Fituru Isi Awaji.

¹⁴Mêrọ si ngugọọn̄ ekisa itoon̄ otitọn̄, mè nroon̄ òje me lek, mè mkpukan̄ kan̄ cha, mè aran̄ ukan̄.

¹⁵Mêrọ si ntook nsensi, mè ogbugboon̄ òje me lek, mè aran̄ mbuban, mè nsensi utop olu. Mêrọ ekwut isotu eyi ebekisa ichit otu isotu Akpatan̄ Mbuban.

¹⁶Mênama ntook ngwugwa, mè odidọ kan̄ eyi esabe ekwe ilọk, mè ogbugboon̄ kan̄, mè otutuuk nroon̄ òje me lek. Mêrọ si okwa igwọk-lek mè urak kan̄.

¹⁷Mêrọ ekwut ukwek mêsabe ikigbaka ikana oyet egep Akpatan̄ Mbuban ya, mè atà kan̄ mè urak kiban̄. Mêrọ si ekwut isotu eyi mêsabe ikichit otunchit oyet egep Akpatan̄ Mbuban ya.

¹⁸Mêrọ si okpọ̀kọ Akpatan̄ Mbuban ya, mè okpọ̀kọ echi ebesa igọbọ ekwut esabe igbaka ichit otutuuk oyet egep ya, mè otutuuk olik òje me lek.

¹⁹Mêlọk si owuwa ofọnti ebi ngwugwa mêkisa isi ikwaan̄ me Ere Mbuban, òrere ofọnti mbuban kè Erọn ogwu òban Awaji, mè ofọnti ebi bọn ebekisa irọ ikwaan̄ ebi ngwugwa.”

²⁰Otutuuk otoko ebi Ijeren eneninan̄a me isi kè Mosis isibi ifo.

²¹Ebi geelek ikọ ya otetbe me ejit mè ebi ekwukwu kiban̄ osisaakbe ema esasa inyinyi kiban̄ ijet Okumugwem, inyi mêsabe irọ ikwaan̄ me lek Atanga Chinichini, mè otutuuk nroon̄ ikwaan̄ kan̄, mè otutuuk ofọnti mbuban ebi ngwugwa.

²²Ebirieen̄ mè ebibaan̄, ebi ìkaan̄ ejit inyinyi, esasa ebi kè asi inwọm, mè mkputọn̄, mè mkpọtubọk, mè otutuuk inu alata araran̄ kiban̄ ijet Okumugwem. Ema enyi inu nken alata araran̄ kiban̄ cha kubọk ngwugwa ewuwuwum isa inyi Okumugwem.

²³Otutuuk ebi ìkakaan̄ eri oluku oluku, mè echi irio irio, mè echi eje eje, mè atalek lilin̄, mè inwọọn̄ ebot, mè ikpa orie arọọn̄ ekpan̄be chieen̄ ikana araran̄, esasa inu.

²⁴Otutuuk ebi ìsasa inyinyi alata okuket mè ekwe inu mîkpulu si isa ininyi Okumugwem. Ebi ìkaan̄ uti akasia eyi mêkọtbe isa irọ chieen̄ ikwaan̄ geelek mîsa inu si me isi Okumugwem.

²⁵Ebibaan̄, ebi usọ ikwaan̄ ilọlọk inu, mîsa ubọk kiban̄ ilọk inu echi oluku oluku, mè echi irio irio, mè echi eje eje, mè echi atalek lilin̄, mè isa inu me isi Okumugwem.

²⁶Otutuuk ebibaan̄ ebi usọ ikwaan̄ ilọk inu, ebi ulọk inyinyi okupbe me ejit mîlọk si inu echi inwọọn̄ ebot isa inu.

²⁷Ebi ibot otoko ebi Ijeren esasa ewuuk unye otu ewe ekigwen onikisi mè owuwa esese chieen̄ ewuuk unye otu ewe igbaalek inu, inyi mêsabe inwunwan̄ me lek mgbidim ofọnti ikwaan̄ ogwu òban Awaji mè lek ekwut isi ejit kan̄.

²⁸Ema mîsa si inu utop olu mè aran̄ olifu, echi mêsabe ikimin mkpukan̄ mè isa si irọ aran̄ itọkọ ene me ibot mè isa irọ si nsensi utop olu cha, inu.

²⁹Otutuuk ebirieen̄ mè ebibaan̄ Ijeren, ebi ìkakaan̄ ejit inyinyi, mîsa si inyinyi kiban̄ ininyi Okumugwem, inyi mêsabe irọ otutuuk ikwaan̄ Okumugwem onyibe ida, inan̄a me otu kè Mosis, ibe ema erọ.

³⁰Mosis onenitumu inyi ebi Ijeren ibe, “Ìkpọ, Okumugwem îra igobo Bejalen, gwun̄ kè Uri, gwun̄ kè Uru, ogwu otoko kè Juda,

³¹mè itap ọmọ Ekwukwu Awaji me emen, eyi òbonyi ọmọ iriọọn̄-inu mè ngobo-ntet mè ifuk-ibot eyi ikwaan̄ òkup esese esese,

³²inyi ọmọ môkọt ikililọkọ inu alata okuket, mè echi alata araran̄, mè echi ekwe,

³³mè ifieek ewuuk ikinwunwan̄ me chieen̄ inu cha, mè iriọọn̄ isa uti ikikọ inu òkup esese esese, mè iriọọn̄ si ikirom sọkọsọkọ inu òkup nke nke.

³⁴Okumugwem înyi Bejalen mè Oyoliabu, gwun̄ kè Ayisamak, ogwu otoko kè Dan, unye ikọkọt ikijeen̄ ebi ofifi ife ikwaan̄ ubọk chi.

³⁵Okumugwem înyi ema ene iba chi iriọọn̄-inu irọrọ sọkọsọkọ ubọk ikwaan̄ òkup esese esese, kubọk ikwaan̄ ititibi inu melek ewuuk mè uti, mè ilililọkọ inu, mè isasa eri ilọk inu echi oluku oluku, mè echi irio irio, mè echi eje eje, mè atalek lilin̄. Ema ìre si ebi usọ ikwaan̄ inu ekpakpa. Ema ene iba chi ìre ebi usọ ikwaan̄ ebi mêkọtbe irọ chieen̄ ikwaan̄ geelek, mè ikọt ikisan̄a chieen̄ inu geelek isibi.