Read obolo Isis 36 Bible Online

Isis 36 - obolo bible

Isis 36

¹“Bejalen, mè Oyoliabu mêrọ otutuuk inu cha ike Okumugwem onyibe ida, ema ene iba mè otutuuk ebi usọ ikwaan̄ kechilọ cha ebi Okumugwem onyibe iriọọn̄-inu mè ngobo-ntet mè ifuk-ibot isasa iriọọn̄ otutuuk sọkọsọkọ ubọk ikwaan̄ geelek òkup me uyọt me lek ikwaan̄ ere òkup mbuban.”

²Mosis onenigwen Bejalen mè Oyoliabu mè otutuuk ebirieen̄ ebi usọ ikwaan̄ ebi Okumugwem onyibe iriọọn̄-inu, ebi ìkakaan̄ ejit itatap ubọk me lek ikwaan̄ ya, mè ibe ema ebene ikwaan̄ ya.

³Mosis onenikana inyinyi cha echi ebi Ijeren esabe inu ibe esa erọ ikwaan̄ ere mbuban ya itap ema me ubọk. Ebi Ijeren ekpọkpọ ikisa si ofifi inyinyi ikinu si ewelegwe geelek initap isọkọ me lek echi ema ewuukbe lek inyi.

⁴Mgbọ nroon̄ ikwaan̄ ebi ene ekisa inu cha omabe lek iwa iraka ike eweekbe, ebi usọ ikwaan̄ cha ìkirọ chieen̄ ikwaan̄ geelek me lek ere òkup mbuban ya etetele ikwaan̄ kiban̄,

⁵mè ije inu initumu inyi Mosis ibe ke ebi ene mêkisa nroon̄ ikwaan̄ inu iwa enenen iraka inu mêweekbe isasa irọ ikwaan̄ Okumugwem onyibe ida ibe irọ.

⁶Mosis oneninyi ida ibe esi elook ekana me otutuuk ere m̀gba-ǹgwele ukan̄ ya ibe ke îkem, ke kpeyaka iweek ibe enerieen̄ mè enenwaan̄ geege iyaka ikpọk inyi ofifi nroon̄ ikwaan̄ me lek ikwaan̄ ere mbuban ya. Sa me ikeyi ke Mosis okput ebi ene ibe ekayaka ìsa inyinyi ìnu ofifi.

⁷Nroon̄ ikwaan̄ òkukup me ijọn̄ îwuuk lek iwawa si enenen igak inu eweekbe isasa irọ otutuuk ikwaan̄ cha iso.

⁸Otutuuk ebi usọ ikwaan̄ me etete ebi ikwaan̄ ubọk cha enenirọ Akpatan̄ Mbuban ya. Esa akọp ekwut ukwek esabe atalek lilin̄ eyakabe ijaan̄, mè eri oluku oluku, mè echi irio irio, mè echi eje eje irọ ekwut ukwek cha, mè ilọk ogugo ebi mbem emen inyọn̄ me lek. Atalek ebi usọ ikwaan̄ ilọlọk inu elọk ebi mbem cha me lek ekwut cha.

⁹Otutuuk ekwut ukwek cha ìre ìkike me otutuuk agan̄. Ujọn̄ọ kiban̄ ìre ejit jaaba jaaba, sà uwele kiban̄ ore ejit ge ge.

¹⁰Ema enenigbaan̄ ekwut ukwek go ichim iriaak ikana unyana ge, mè igbaan̄ si ekwut ukwek go kechilọ ichim iriaak si ikana unyana ge.

¹¹Ema enenisa ekwut oluku oluku irọ ògbọ itap me otu utọn̄ ekwut ya me lek unyana ge, mè irọ si ikeya me lek unyana keyilọ.

¹²Ema etap akọp ògbọ go me otu utọn̄ unyana ekwut ukwek ge, mè itap si akọp ògbọ go me otu utọn̄ ekwut agan̄ ibot me lek unyana keyilọ. Etap otutuuk ògbọ òkup me lek unyana ge inyi ekeyaka isi ekpọ ògbọ echi òkup me lek unyana keyilọ.

¹³Ema enenisa alata araran̄ irọ akọp ugọbọ go, mè isa igọbọ unyana ekwut ukwek ge ikam me lek unyana ge keyilọ, inyi otutuuk Akpatan̄ Mbuban ya ire ge.

¹⁴Ema enenisa inwọọn̄ ebot irọ akọp mè ekwut ukwek ge eyi ebesa ichit inyọn̄ Akpatan̄ Mbuban ya.

¹⁵Otutuuk akọp mè ekwut ukwek ge cha ìre ìkike. Ujọn̄ọ kiban̄ ìre ejit jaaba mè ìkike iba, sà uwele kiban̄ ore ejit ge ge.

¹⁶Ema enenigbaan̄ ekwut ukwek go ichim inyi ikana unyana ge, mè iyaka inigbaan̄ gweregwen kechilọ ichim isa irọ si unyana ge.

¹⁷Ema mîrọ akọp ògbọ go itap me otu utọn̄ ekwut ukwek eyi agan̄ ibot me lek unyana ge, mè irọ si akọp ògbọ go itap me otu utọn̄ ekwut ukwek eyi agan̄ ibot me lek unyana keyilọ.

¹⁸Ema enenisa ekwe irọ akọp ugọbọ go echi mêsabe igọbọ akpatan̄ ya ikaan̄, inyi ire ge.

¹⁹Ema mîsa ikpa orie arọọn̄ ekpan̄be chieen̄ ikana araran̄ irọ ochichit ebekisa iwele ichit akpatan̄ ya, mè isa si ikpa ima irọ si ofifi ochichit ebekisa ichit itoon̄ me inyọn̄ eyi ikpa orie arọọn̄ ya.

²⁰Ema enenisa uti akasia irọ owuwa agbasi echi ebegwugwuun̄ isa irọ akpalek akpatan̄ ya.

²¹Ubene agbasi ge ìre ejit iba mè ìkike iba, sà uwele kan̄ ore agbagba otubọk iba mè ìkike iba.

²²Agbasi cha geelek îkaan̄ atà iba òsọsọọk isibi me ibot kan̄ agan̄ iba. Ikeya ke erọ me lek otutuuk agbasi cha òkup me lek akpatan̄ ya.

²³Akọp agbasi iba ke ema erọ isa itap me agan̄ osiki me lek akpatan̄ ya,

²⁴mè irọ akọp urak alata okuket ini isa itap me irak akọp agbasi ini cha, urak iba me irak agbasi ge, òrere me irak atà iba òkup me lek agbasi ge.

²⁵Me agba owot akpatan̄ ya eyi agan̄ inyọn̄ ke ema etap akọp agbasi iba,

²⁶mè irọ akọp urak alata okuket ini itap me irak agbasi cha, iba iba me irak ge.

²⁷Ike yaage ke ema erọ agbasi gweregwen isa itap me agba owot akpatan̄ ya eyi agan̄ ichep-ura,

²⁸mè irọ agbasi iba isa itap me ibot usọk iba òkup me agan̄ udun̄ akpatan̄ ya.

²⁹Agbasi iba cha òkup me ibot usọk cha geelek, egbagbaan̄ isun̄ ge ibene me ijọn̄ isi ire inyọn̄, mè isa ògbọ ge igọbọ ema ikam. Ike erọbe me ibot usọk ge, ikeya ke erọ si me ibot usọk keyilọ.

³⁰Sa me ikeya, agbasi jeeta mè akọp mè urak gweregwen okup me ibot usọk cha, urak iba iba me irak agbasi ge.

³¹Ema mîrọ mgbugban uti akasia, mè itap go me lek agbasi òkup me agba owot ge me lek akpatan̄ ya,

³²mè itap si go me lek agbasi òkup me agba owot agan̄ keyilọ. Mgbugban go si ke etap me lek agbasi òkup ifo agan̄ udun̄ akpatan̄ ya me ntut agan̄ ichep-ura.

³³Ikeya si ke ema erọ ogbugboon̄ òkup me etete, inyi inyana isaba me eden̄ agbasi cha, ibene me ibot agan̄ ge isi ire ibot agan̄ keyilọ.

³⁴Ema esa alata araran̄ ichọkọ ichit lek agbasi cha, mè isa alata araran̄ irọ ògbọ esabe igọbọ ogbugboon̄ cha ikam, mè isa alata araran̄ ichọkọ ichit lek ogbugboon̄ cha.

³⁵Ema enenisa ekwut oluku oluku mè echi irio irio mè echi eje eje mè atalek lilin̄ eyakabe ijaan̄ irọ ekwut mgban. Ebi usọ ikwaan̄ ilọk inu elọlọk ogugo ebi mbem emen inyọn̄ me lek ekwut mgban ya.

³⁶Ema enenirọ atà uti akasia esabe alata araran̄ ichọkọ ichit lek, inyi ekejeen̄ ekwut mgban ya me lek, mè isa alata okuket itọkọ urak echi mêsabe inwaan̄ me irak atà cha. Ema mîrọ si ugọbọ alata araran̄ eyi mêsabe ikijeen̄ ekwut mgban ya me lek atà cha.

³⁷Ema enenirọ ekwut isotu eyi mêkisa ichit otu isotu akpatan̄ ya. Esa ekwut oluku oluku, mè echi irio irio, mè echi eje eje, melek atalek lilin̄ eyakabe ijaan̄ irọ ekwut isotu ya. Atalek ogwu usọ ikwaan̄ ekwut orọ ekwut isotu ya.

³⁸Ema mîrọ atà go echi mêkisa ijeen̄ ekwut isotu ya, mè isa alata araran̄ ichọkọ ichit ibot atà cha, mè irọ si ugọbọ echi mêkisa ijeen̄ ekwut ya me lek atà cha. Ema esa alata araran̄ ichọkọ ichit lek ndali cha òkup me ibot atà cha, mè isa ekwe irọ urak go echi mêsabe inwaan̄ me ebon atà cha.