Read obolo Isis 4 Bible Online

Isis 4 - obolo bible

Isis 4

¹Mosis onenifọọk Okumugwem ibe, “Ire ife cha kpechieek ikọ n̄a, mè kpegbagban̄ si ida n̄a, mè initumu inyi emi ibe ke Okumugwem ìkasibi ìchichini melek n̄a ye?”

²Okumugwem ododo Mosis ibe, “Ìre keke ire eya me ubọk kwun̄?” Mosis ofọfọọk ibe ke îre mkpat.

³Okumugwem onenibe ọmọ, “Ben tọp to me ijọn̄ nu.” Mosis otọtọp mkpat ya ito me ijọn̄, ikakana ijijinu. Mosis olilibi inan̄a me lek.

⁴Okumugwem otutumu inyi Mosis ibe, “Nyana ubọk kwun̄ tet ijijinu ya me agan̄ edim kan̄.” Mosis onyanyana ubọk itet ijijinu ya, iyayaka ikana mkpat me ubọk kan̄.

⁵Okumugwem onenitumu inyi Mosis ibe, “Rọ ikeyi jeen̄ ebi Ijeren, inyi ema echieek ibe ke îre emi Okumugwem Awaji ebi nte nte kiban̄, Awaji kè Ebereyam mè Awaji kè Ajiki mè Awaji kè Jekọp, nsibi ichichini owu.”

⁶Okumugwem okpọkpọk itumu inyi Mosis ibe, “Tap-nu ubọk kwun̄ me agbagba ofọnti me isi ejit kwun̄.” Mosis otatap ubọk me isi ejit kan̄. Mgbọ îsan̄abe ubọk kan̄ isibi, orukan̄ inyakpa obabaan̄ ichit ubọk kan̄, ubọk kan̄ okukup ikpọk ikpọk, mè itana kubọk abalara.

⁷Okumugwem okpọkpọk itumu inyi Mosis ibe, “Yaka tap ubọk kwun̄ faan̄ me agbagba ofọnti me isi ejit kwun̄.” Ikpọkpọk itap. Mgbọ îyakabe isan̄a ubọk kan̄ isibi, orukan̄ ya otata isan̄a kpai. Akpa ubọk kan̄ ya oyayaka ikup kubọk otutuuk akpalek kan̄ okupbe.

⁸Okumugwem onenitumu inyi Mosis ibe, “Ire ebi ugane cha kpechieek ikọ kwun̄, mè kpesa adasi inu ukechieen̄ ya igwen inu geege, mêchieek me lek eyi òso iba yi.

⁹Ire, ire ema kpechieek si me lek inu ukechieen̄ iba kechi, mè kpegban̄ ida kwun̄, si chibi mun̄ me okwaan̄ Nali gwook me ijọn̄ òchachat, ke mun̄ ya môkana eje me nchat ijọn̄ ya.”

¹⁰Mosis onenitumu inyi Okumugwem ibe, “Jei Okaan̄-ene, me otutuuk ugwem n̄a, otu n̄a ìkakinye me itutumu ikọ. Ikerere mgbọ keyi si otumube ikọ melek n̄a, otu n̄a ìkafet me itutumu ikọ.”

¹¹Okumugwem onenido Mosis ibe, “Tumu-nu, ìre ekene onyi ebilene otu itumu-ikọ? Sà ìre ekene okirọ inyi ene ire mbuuk? Ìre ekene okirọ inyi ene ire ìnan? Ìre ekene okirọ inyi ene imọọn̄ inu, sà ìre ekene okirọ inyi ene ire ǹnàan̄? Ìre ìkare emi Okumugwem nkirọ otutuuk inu chi?

¹²Eya orọ, je, ke mâkup melek kwun̄, mè ijeen̄ owu inu obotumu.”

¹³Mosis otutumu si inyi Okumugwem ibe, “Jei Okaan̄-ene, soso gwen ofifi ene ria ikwaan̄ yi, ke emi m̀kpakọt isi!”

¹⁴Okumugwem onanaan̄ ejit enenen inyi Mosis, mè itumu inyi ọmọ ibe, “Ìre Erọn ogwu otoko kè Libai ìkare ngwan̄ kwun̄? Nriọọn̄ ibe ke otu kan̄ ìkekinye me itutumu ikọ. Kpọ, me mgbọ keyi, ọmọ ògwa òkije inin̄ oniin̄ inu iboniweek owu. Isimun̄ owu, môbele ejit enenen.

¹⁵Enyi isichichini, owu môkpa otutuuk inu chi inyi ọmọ, mè itumu otutuuk ikọ oweekbe ibe itumu itap ọmọ me otu. Emi mâkup melek kwun̄, mè ikup si melek kan̄, mè irọ inyi enyi eta ukpook me lek etumu ikọ, mè ikijeen̄ enyi inu enyi eberọ.

¹⁶Erọn obokitumu ikọ otu kwun̄ inyi ebi Ijeren, mè inikup kubọk otu isa inyi owu. Sà owu obokup inyi ọmọ kubọk Awaji ogwu ikọ cha okinan̄a me otu.

¹⁷Ire, mọnọ mkpat yi kaan̄ me ubọk sa je, mije, îre ọmọ ke owu obokisa irọ inu ukechieen̄ cha.”

¹⁸Mosis oneninan̄a me emen èwê ya ika, mè initumu inyi Jeturu ogwu ute-nwa ibe, “Soso ǹkiweek igwugwu ikom isi Ijipiti isi ikpọ mè ìre îkaan̄ ebi kiji ebi ìyayaka isik me ògat ugwem.” Jeturu obebe ọmọ, “Înwọn ma, je me esuuk.”

¹⁹Sabum Mosis oninan̄a me ido Midian ya, Okumugwem otutumu inyi ibe, “Gwu kom si Ijipiti, mije, otutuuk ebi ìweek ikpakpan̄ owu mîkwaan̄ isan̄a kpai.”

²⁰Mosis onenimọnọ ogwu nwa, mè ebi bọn ebirieen̄ cha, mè iben ema itoon̄ me inyọn̄ inyinya akpan, mè inan̄a inin̄ oniin̄ igwu ikom ifo Ijipiti. Îmọnọ si mkpat Awaji[5] ya ikaan̄ me ubọk isa ije.

²¹Okumugwem onenitumu inyi Mosis ibe, “Osire Ijipiti, mun̄ ibe ke orọ otutuuk inu ukechieen̄ cha nnyibe owu unye ibe owu òrọ me isi ogwu Fero. Ire, mârọ inyi ejit kan̄ inye, inyi ikachieek ibe ebi Ijeren efon.

²²Mgbọ ya owu môtumu inyi ogwu Fero ibe ke emi Okumugwem ntumu ibe, ‘Ebi Ijeren ìre adasi gwun̄ enerieen̄ n̄a.

²³Mwuuk lek itumu inyi owu ibe owu òtele mè adasi gwun̄ enerieen̄ n̄a ifo, inyi isi itọbọ ebum inyi emi. Ire, owu ojijit. Eya orọ, kpọ, emi m̀kpalọlọ ikpakpan̄ adasi gwun̄ enerieen̄ kwun̄.’ ”

²⁴Me oniin̄ ije kiban̄, mgbọ Mosis mè ebi kan̄ egbabe ere ge ilaak, me eririeen̄, Okumugwem onenichichini melek kè Mosis, mè iweek ikpakpan̄ ọmọ.

²⁵Ire, Jipọra ogwu nwa omọmọnọ ubuja esabe ewuuk unye isi irọ, mè isa ifieek ogwu gwun̄ enerieen̄ afi, mè inisa okpọkọ akpa ya ichak me ukot kè Mosis, mè itumu ibe, “Me atikọ, owu ìre olom eje isa inyi emi.”

²⁶Okumugwem onenisan̄a Mosis ubọk me lek. Îre mije ifefieek afi ya ke Jipọra otumu ibe ke Mosis ìre olom eje.

²⁷Okumugwem onenitumu inyi Erọn ibe, “Je nin̄ emen èwê si chichini Mosis.” Erọn onanan̄a ije, mè isi ichichini Mosis me agba lek ogoon̄ Awaji, mè ikana ọmọ ikat.

²⁸Mosis okpakpa otutuuk inu Okumugwem oriabe ọmọ inyi Erọn, mè ikpa si inu ofolek inu ukechieen̄ Okumugwem onyibe ọmọ ida ibe ọmọ irọ.

²⁹Mosis mè Erọn enenigbaan̄ ije ika Ijipiti, mè inititiin̄ otutuuk ebi ugane Ijeren.

³⁰Erọn oneniben otutuuk inu Okumugwem otumube inyi Mosis ikpa inyi ebi ugane cha, mè irọ si otutuuk inu ukechieen̄ cha ijeen̄ ema.

³¹Ema echechieek. Mgbọ ema enọbe ibe ke Okumugwem îkeek ebi Ijeren, mè imun̄ tukutuku ema ekupbe me emen, ema egegele ibot isiki, mè itọbọ ebum inyi Okumugwem.