Read obolo Isis 5 Bible Online

Isis 5 - obolo bible

Isis 5

¹Mosis mè Erọn enenije isi isi ogwu Fero, mè itumu inyi ibe, “Okumugwem, Awaji ebi Ijeren ibe owu, ‘Tele mè ebi n̄a esi efaka mfaka enyi emi me emen èwê.’ ”

²Ogwu Fero ododo ema ibe, “Ekene ore Okumugwem ya ogwu emi mbagban̄ ida kan̄, mè itele ebi Ijeren efon? Emi ǹkariọọn̄ ogwu ọmọ orebe! M̀kpatetele si ibe ebi Ijeren efon!”

³Ema efọfọọk ibe, “Îre Awaji ebi Iburu osibi ichichini melek kiji. Eya orọ, soso, tele mè eji esi egwa ngwugwa enyi Okumugwem, Awaji kiji, inyi ikanaan̄ ejit ìnyi eji, mè ìsa ijo orukan̄, mè ìyaka ire akọn̄ ìnisulu eji osusut. Môbọkọ eji ije egwe ita sabum eji mênire ere eji ebekup igwa ngwugwa ya.”

⁴Ire, ogwu ubọọn̄ Ijipiti obebe, “Mosis melek Erọn, ìre keke orọ mè enyi erọ mè ife cha esan̄a chieen̄ me lek ikwaan̄ kiban̄? Ngwa, ìfon ìsi ìrọ ikwaan̄ kinyi.

⁵Enyi mîmun̄ ubọk ebi kinyi chi ewabe enenen me Ijipiti! Enyi ejeje ikirọ inyi ema ekayaka ìsi ikwaan̄?”

⁶Usen yaage, ogwu Fero onyinyi ebi ìkitọ ikwaan̄ me nnaan̄ mè ebi ibot ikwaan̄ ebi Ijeren ida ibe,

⁷“Bene me chereyi, ikayaka ìkinyi ife chi nchat mbubet ekisa igbaalek ibot okpungwu, ike enyi ewuukbe lek ikirọ. Ìtele inyi ema gaalek ekesi etiten̄e nchat mbubet, mè esa enebot okpungwu.

⁸Ire, otu ifuk ewuuk yaage ema ekiwuuk lek ibot ke ema ebekibot si, ikasan̄a inu geege me lek, mije, ife chi ìre ebi ugbek. Eya orọ ekitaan̄ ukpo ibe ema ebesi igwa ngwugwa inyi Awaji kiban̄.

⁹Ìrọ inyi ikwaan̄ ife chi inye igak adasi mgbọ, inyi ekerọ, mè ekayaka ìkaan̄ irek ìkigban̄ utọn̄ me lek ataak ikọ chi.”

¹⁰Mgbọ yaage, ebi ìkitọ ikwaan̄ me nnaan̄ cha mè ebi ibot ikwaan̄ cha enanan̄a isibi, mè isi ilook ebi Ijeren ibe, “Ìgban̄ utọn̄, ogwu Fero înyi ida ibe ekayaka ìkinyi enyi nchat mbubet inyi enyi ekesa ebot okpungwu.

¹¹Enyi me lek kinyi ebekisi ikana ere iweek nchat mbubet me ere geelek enyi mêkọtbe ikaan̄. Ire, otu ifuk ewuuk yaage enyi ekiwuuk lek ibot ke enyi ebekibot si, kpebesan̄a inu geege me lek.”

¹²Mije keya, ebi Ijeren ekpọkpọk ikana ere geelek me ijọn̄ Ijipiti ikisi iweek ere ema mêkaan̄be nchat mbubet isa inirọ ikwaan̄ kiban̄.

¹³Ebi ìkitọ ikwaan̄ me nnaan̄ cha ekekitutuku ebi Ijeren, mè ikibe ema, “Ìbot okpungwu ìso otu ifuk enyi ekiwuuk lek ibot me egwe usen mgbọ ekinyi enyi nchat mbubet!”

¹⁴Ebi ikwaan̄ ogwu Fero ebi ìkitọ ikwaan̄ me nnaan̄ cha ekekisut ebi Ijeren ebi ema egobobe ito me ibot ikwaan̄ inyi otutuuk ebi Ijeren osusut, mè ikido ema ibe, “Ìre keke orọ enyi kpebot iso otu ifuk ewuuk ebe enyi ebot iyakwut melek eyi chereyi kubọk enyi ekiwuuk lek irọ?”

¹⁵Mije keyi, ebi Ijeren ebi ibot ikwaan̄ cha esisi lek ogwu Fero, mè isi inina lek inyi ibe, “Jei, ogwu ubọọn̄, ìre keke orọ obenebe ikisa unye ubọk irọ inu me lek kiji ebi usun̄ kwun̄ ikeyi?

¹⁶Kpeyaka ikinyi eji ebi usun̄ kwun̄ nchat mbubet, ire, ekpọkpọ ikibe eji ebot okpungwu eso ifuk. Mêkisut eji ikpak ikpak! Ire, inu yi ìkalọ eji me ubọk, ìlọ me ubọk ebi kwun̄.”

¹⁷Ogwu Fero ofọfọọk ema ibe, “Enyi ebi ugbek kechi! Enyi ìre ebi una efuuk! Îre mije keya ke enyi ekitumu ibe ke enyi ebesi igwa ngwugwa inyi Okumugwem.

¹⁸Mgbọ keyi, ìgwu ìkom ìsi ìrọ ikwaan̄ kinyi! Kpebenyi enyi nchat mbubet kubọk ge. Ire, enyi ekaan̄ ibobot okpungwu iso otu ifuk ebe enyi ebot.”

¹⁹Me emen ikọ ya ogwu Fero otumube ibe ke kpebesan̄a inu igele me otu ifuk ewuuk ema ekibot me egwe usen, ebi ibot ikwaan̄ ebi Ijeren cha emọmọọn̄ ibe ke ema ekup me emen atalek ikpele ufialek.

²⁰Ema inanan̄a me uwu ogwu Fero isibi, ema emumun̄ Mosis melek Erọn ekupbe ikikpọ ema.

²¹Ema etutumu inyi Mosis melek Erọn ibe, “Kè Okumugwem imun̄ enyi, mè isibi enyi oyerebet me ibot! Enyi mîrọ inyi ejit ogwu Fero mè ebi kan̄ ijọ me lek kiji. Enyi mîtap ogwu Fero me ebi kan̄ oge akọn̄ me ubọk ibe esa ekpan̄ eji esan̄a.”

²²Mosis ogwugwu ikom isi lek Okumugwem, mè itumu inyi ibe, “Jei, Ogwukaan̄-ene, ìre keke orọ osabe ufialek òkup ikeyi ijet ife chi? Òjeje iraria emi ojelek ikwaan̄ òkup ikeyi mọnọ?

²³Karake nsibe lek ogwu Fero isi itumu ikọ me erieen̄ kwun̄, ogwu Fero ìkpọkpọ ikitap ufialek me lek ebi ife chi. Owu si, òkanyan̄a ebi kwun̄ ìsibi kubọk ge.”