Read obolo Isis 6 Bible Online

Isis 6 - obolo bible

Isis 6

¹Okumugwem onenitumu inyi Mosis ibe, “Gwọk chieen̄ kikpọ, owu mômun̄ inu mbarọ ogwu Fero. Mâsa me unye ubọk itet ọmọ, inyi itele mè ebi n̄a efon. Ìkare eya gaalek, mâsa si me unye ubọk itet ọmọ, ire lek, ọmọ gaalek môsabe ubọk kan̄ irieen̄ ema itap me oniin̄ ibe esibi me ido kan̄.”

²Awaji onenitumu inyi Mosis ibe, “Emi nre Okumugwem.

³Nsa lek n̄a ijeen̄ Ebereyam mè Ajiki mè Jekọp, kubọk Awaji Ogwu Òkaan̄ Unye Geelek. Ire, ǹkasa me achubọk erieen̄ n̄a òrere Okumugwem, ìkpọk mbum lek n̄a ìjeen̄ ema.

⁴Nnyan̄a si ibot inyi ema ibe ke mâsa ijọn̄ ebi Kenan, ere ema elukbe kubọk ebi ichen me mgbọ òraraka, inyi ema.

⁵Me mgbọ keyi, nra inọ ida mfi ebi Ijeren ekito mije ebi Ijipiti esabe ema irọ usun̄ kiban̄. Nra ikeek si inyan̄a-ibot nnyan̄abe melek ebi nte nte kiban̄.

⁶“Eya orọ, tumu nyi ebi Ijeren ibe ke emi ìre Okumugwem, ke mâsan̄a ema isibi me irak kwulukwulu ebi Ijipiti ekinyi ema, mè isan̄a ema isibi me emen unye ikwaan̄ ebi Ijipiti ekinyi ema. Mâsa me unye ubọk mè ikpele unye melek osusut òkup nke nke isan̄a ema isibi me irak ubọk ebi Ijipiti, mè ema ekaan̄ lek.

⁷Mâkpulu ema isa irọ ebi n̄a. Emi mânenire Awaji kiban̄. Mgbọ ya ema mêriọọn̄ ibe ke îre emi, Okumugwem, nre Awaji kiban̄ ogwu òsasan̄a ema isibi me irak kwulukwulu me ido Ijipiti.

⁸Mâsan̄a ema isibi me ido Ijipiti, mè isa ema isi itap me inyọn̄ ijọn̄ eyi mbenebe ubọk inyan̄a ibot ibe ke mâsa inyi Ebereyam mè Ajiki mè Jekọp. Mâsa ijọn̄ ya inyi ema, inyi ikana eyi kiban̄ me ìrot. Emi ìre Okumugwem!”

⁹Mgbọ Mosis obenbe ikọ chi itumu inyi ebi Ijeren, ema kpegban̄ utọn̄, mije ejit kiban̄ owuukbe lek ifiat isan̄a, mè mije ulobo ikwaan̄ ikpak esabe ikeme ema.

¹⁰Okumugwem onenitumu inyi Mosis ibe,

¹¹“Je si tumu nyi ogwu Fero, ogwu ubọọn̄ Ijipiti, ibe itele ebi Ijeren efon enan̄a me ido kan̄.”

¹²Mosis otutumu inyi Okumugwem ibe, “Ire ebi Ijeren kpegban̄ emi ikọ me otu, ogwu Fero ìbojeje igban̄ utọn̄ me lek ikọ n̄a, emi ogwu ǹkakikọt ìtumu ikọ ìjaan̄?”

¹³Okumugwem onenitumu ikọ inyi Mosis mè Erọn, mè iria ema isi me lek ebi Ijeren mè lek ogwu Fero, ogwu ubọọn̄ Ijipiti, ibe isan̄a ebi Ijeren isibi me ido Ijipiti.

¹⁴Erieen̄ ebi ibot egep bọn kè Ijeren ire echi: Bọn ebirieen̄ kè Ruben, adasi gwun̄ enerieen̄ kè Ijeren ìre Anọk mè Palu mè Ejirọn mè Kami. Ebibi ere ebi otoko kè Ruben me ototun̄ ukan̄ me ototun̄ ukan̄.

¹⁵Bọn ebirieen̄ kè Simiọn ìre Jemuwen mè Jamin mè Oyadi mè Jakin mè Sowari, mè Sawulu ogwu ogwu enenwaan̄ Kenan omanbe. Ebibi ere ebi otoko kè Simiọn me ototun̄ ukan̄ me ototun̄ ukan̄.

¹⁶Bọn ebirieen̄ kè Libai ìre Gasiọn mè Koyat mè Merari. Ebibi ere ebi otoko kè Libai me mman kiban̄. Libai îluk iso efit acha mè akọp ita mè jaaba sabum înikwu.

¹⁷Bọn ebirieen̄ kè Gasiọn ìre Libini mè Simei. Ebibi ere ebi otoko kè Gasiọn me ototun̄ ukan̄ me ototun̄ ukan̄.

¹⁸Bọn ebirieen̄ kè Koyat ìre Amiram mè Ijiyari mè Eburọn mè Ujiyen. Koyat îluk iso efit mè akọp acha ita mè ita sabum înikwu.

¹⁹Bọn ebirieen̄ kè Merari ìre Mali mè Musi. Ebibi ere ebi otoko kè Libai me ototun̄ ukan̄ me ototun̄ ukan̄.

²⁰Amiram onenido Jokebedi, ngwan̄ ogwu ute me lek nwa. Jokebedi oneniman Erọn mè Mosis inyi Amiram. Amiram ìluk efit acha mè akọp ita mè jaaba sabum înikwu.

²¹Bọn ebirieen̄ kè Ijiyari ìre Kora, mè Nefegi mè Jikiri.

²²Bọn ebirieen̄ kè Ujiyen ìre Misayen mè Elisapan mè Sitiri.

²³Erọn onenido Eliseba gwun̄ enenwaan̄ kè Aminadap. Eliseba ìre ngwan̄ kè Nasiọn. Ineniman Nadabu mè Abiyu, mè Elieja mè Itama inyi Erọn.

²⁴Bọn ebirieen̄ kè Kora ìre Asiri mè Elikana mè Abiasafu. Ebibi ere ebi otoko kè Kora me ototun̄ ukan̄ me ototun̄ ukan̄.

²⁵Elieja gwun̄ kè Erọn onenido gwun̄ ge me etete bọn ebibaan̄ kè Putieli. Ogwu enenwaan̄ ya omaman Fineyas inyi Elieja. Ebi ebakbe erieen̄ chi ere ebi ibot me otoko kè Libai, me ototun̄ ukan̄ me ototun̄ ukan̄.

²⁶Îre ene iba chi, Erọn mè Mosis, ke Okumugwem otumu inyi ibe esi esan̄a otutuuk ebi Ijeren, me ugbọ me ugbọ, esibi me ido Ijipiti.

²⁷Îre Erọn mè Mosis si esi itumu inyi ogwu Fero, ogwu ubọọn̄ ido Ijipiti, ibe itele mè ebi Ijeren esibi me ido Ijipiti esi ekaan̄ lek kiban̄.

²⁸Mgbọ Okumugwem otumube ikọ inyi Mosis me ido Ijipiti,

²⁹ìtumu inyi ibe, “Emi ìre Okumugwem. Tumu otutuuk ikọ geelek mâtumube inyi owu nyi ogwu Fero, ogwu ubọọn̄ Ijipiti.”

³⁰Ire, Mosis ofọfọọk Okumugwem ibe, “Owu oriọọn̄ ibe ke emi ǹkakikọt ìtumu ikọ ìjaan̄, ìre ogwu Fero ìbojeje igban̄ utọn̄ me lek ikọ n̄a?”