Read obolo Isis 7 Bible Online

Isis 7 - obolo bible

Isis 7

¹Okumugwem onenitumu inyi Mosis ibe, “Kpọ, nra ito owu kubọk Awaji me isi ogwu Fero. Erọn ngwan̄ kwun̄ môkup kubọk ogwu nriran isa inyi owu, ogwu môkitumu ikọ otu kwun̄.

²Otutuuk inu geelek mânyibe owu ida ibe owu òtumu, owu môtumu itap me otu kè Erọn. Erọn mônenitumu ikọ cha inyi ogwu Fero, inyi itele mè ebi Ijeren enan̄a me ido kan̄ esibi.

³Ire, emi mârọ inyi ejit ogwu Fero inye, inyi ǹsa me ikeya ǹrọ owuwa inu ukechieen̄ n̄a mè owuwa uyeke uyeke inu n̄a me ido Ijipiti.

⁴Mije ogwu Fero ìkpogban̄ utọn̄ me lek ikọ kinyi, mâsa unye ubọk isulu ebi Ijipiti osusut eyi ema kperarak ìmun̄, mè isa me ikeya isan̄a ebi n̄a, ebi Ijeren, me ugbọ me ugbọ isibi me ido kiban̄.

⁵Mgbọ nsijeen̄ ebi Ijipiti unye ubọk n̄a, mè isan̄a ebi Ijeren isibi me irak ubọk kiban̄, mgbọ ya, ema mêriọọn̄ ibe ke emi ìre Okumugwem me atikọ.”

⁶Mosis mè Erọn erọrọ ike Okumugwem onyibe ema ida ibe erọ.

⁷Mosis ìre akọp acha jeeta, sà Erọn ore akọp acha jeeta mè ita mgbọ ema esibe isi itumu ikọ melek ogwu Fero.

⁸Okumugwem onenitumu inyi Mosis mè Erọn ibe,

⁹“Ire ogwu Fero ibe enyi erọ uyeke uyeke inu, owu môtumu inyi Erọn ibe itọp mkpat kan̄ ito me ijọn̄ me isi ogwu Fero. Mgbọ ya, mkpat ya môkana ikpele ijijinu.”

¹⁰Mosis mè Erọn enenije isi lek ogwu Fero, mè irọ ike Okumugwem onyibe ema ida ibe erọ. Erọn otọtọp mkpat kan̄ ito me ijọn̄ me isi ogwu Fero mè ebi ibot ikwaan̄ kan̄. Mkpat ya okakana ikpele ijijinu.

¹¹Mgbọ yaage, ogwu Fero ogwegwen ebi ìriọọn̄ inu ebi Ijipiti mè ebi ido-inu. Ebi ofia chi esasa si unye ugwun̄ kiban̄ irọ inu yaage Mosis mè Erọn erọbe.

¹²Ogwu ikup, òtọp mkpat kan̄ òto me ijọn̄, mè mkpat ya okana ikpele ijijinu. Ire, mkpat kè Erọn obeben otutuuk mkpat kiban̄ cha imeen̄ isan̄a kpai.

¹³Ire, ogwu Fero otetet ejit inye, ìkachieek igbagban̄ utọn̄ me lek ikọ kè Mosis mè Erọn, kubọk Okumugwem owuukbe lek itumu.

¹⁴Okumugwem onenitumu inyi Mosis ibe, “Ogwu Fero îtet ejit inye, mè ijit itetele ibe ebi Ijeren efon.

¹⁵Je si chichini ogwu Fero me ewelegwe mgbọ ìboje isibi otu mun̄. Kweek me otu mun̄ Nali ya ban ọmọ. Mgbọ oboje, mọnọ mkpat ya eyi òkakana ijijinu kaan̄ me ubọk.

¹⁶Ogwu Fero isinire ere ya, tumu nyi ibe, ‘Okumugwem, Awaji ebi Iburu oria emi inu me lek kwun̄, ibe emi ǹnentumu ǹnyi owu ibe owu òtele mè ebi kan̄ esi efaka mfaka enyi ọmọ me emen èwê. Ire, mege inire mgbọ keyi, owu òkachieek igbagban̄ utọn̄.

¹⁷Okumugwem ìbe ke inu owu obosa iriọọn̄ ibe ke ọmọ ore Okumugwem ìre ikeyi: Emi mâsa mkpat yi òkup emi me ubọk isulu me inyọn̄ isi mun̄ okwaan̄ Nali. Nsisulu, mun̄ okwaan̄ yi môkana eje.

¹⁸Otutuuk irin̄ òkup me okwaan̄ Nali môkwaan̄. Mun̄ okwaan̄ Nali môjọjọ, mè ikidun̄u olu, ire lek, ebi Ijipiti kpebeyaka ikọt inwọ.’ ”

¹⁹Okumugwem obebe Mosis, “Tumu nyi Erọn ibe imọnọ mkpat kan̄, mè iben inyana me inyọn̄ isi mun̄ me otutuuk ido Ijipiti, mè otutuuk okwaan̄ kiban̄ geelek, mè okolo geelek, mè oyô geelek, mè ere geelek mun̄ okupbe me otutuuk ido Ijipiti, inyi otutuuk mun̄ òkup me ido Ijipiti ikana eje. Eje môjot ere geelek me ido Ijipiti. Mun̄ òkup me emen okwa mè emen ugọn̄ ewuuk geelek môkana si eje.”

²⁰Me ewelegwe, Mosis mè Erọn erọrọ inu Okumugwem onyibe ema ida ibe erọ. Me isi ogwu Fero mè ebi ibot ikwaan̄ kan̄, Erọn obebene mkpat kan̄ isa isulu me isi mun̄ okwaan̄ Nali. Mgbọ yaage, otutuuk mun̄ okwaan̄ ya okakana eje.

²¹Irin̄ òkup me okwaan̄ ya okwakwaan̄, mun̄ okwaan̄ ya ojọjọ, mè ikidun̄u olu, ire lek, ebi Ijipiti kpeyaka ikọt inwọ. Eje ojojot otutuuk ere geelek me ido Ijipiti.

²²Ire, ebi ofia Ijipiti esasa unye ugwun̄ kiban̄ irọ si inu yaage Erọn orọbe. Sa me ikeya, ogwu Fero otetet ejit inye, mè ijit igbagban̄ ida kè Mosis mè Erọn, ike Okumugwem owuukbe lek itumu ibe ke môrọ.

²³Ogwu Fero ogwugwu ikom, mè ije ifo uwu kan̄, ìkanyi utọn̄, ikerere me lek inu ukechieen̄ keyi si.

²⁴Otutuuk ebi Ijipiti eyaka ikisi irọkọ udọn̄ me agba okwaan̄ Nali ikiweek mun̄ ebenwọ, mije, ema kpeyaka ikọt inwọ mun̄ ònan̄a me okwaan̄ Nali ya.

²⁵Usen jaaba oraraka itoon̄ me lek Okumugwem orọbe inyi mun̄ okwaan̄ Nali ya ikana eje.