Read obolo Isis 8 Bible Online

Isis 8 - obolo bible

Isis 8

¹Okumugwem onenitumu inyi Mosis ibe, “Je si lek ogwu Fero, mè tumu nyi ibe ke emi Okumugwem m̀be mè ogwugwu itele mè ebi n̄a enan̄a esibi esi efaka mfaka enyi emi.

²Ire ogwugwu ijit itetele inyi ema efon, emi mâtap àkwọọk ijot otutuuk ido kan̄.

³Àkwọọk môjot okwaan̄ Nali, mè inene inu ininin̄ ijot uwu kan̄ mè agwut kan̄ mè inyọn̄ mkpilaak kan̄. Àkwọọk mônin̄ si ijot otutuuk emen uwu ebi ibot ikwaan̄ kan̄ mè emen uwu otutuuk ebi kan̄, òrere ebi Ijipiti, mè inin̄ si ijot emen uwu ukan̄ ere ekirọ fituru, mè inin̄ ijot emen okwa ere ekifuku akpa wit isa irọ fituru.

⁴Àkwọọk cha si môkiwulu ijeen̄ ọmọ me lek, mè iwulu si ijeen̄ me lek ebi kan̄, mè lek ebi ibot ikwaan̄ kan̄.”

⁵Okumugwem onenitumu inyi Mosis ibe, “Tumu nyi Erọn ibe imọnọ mkpat kan̄ ikaan̄ me ubọk, mè ibene ubọk kan̄ inyana ikpọ okwaan̄, mè okolo, mè udọn̄ mun̄ geelek, inyi àkwọọk inan̄a isibi, mè inene ijot inyọn̄ ijọn̄ ido Ijipiti.”

⁶Erọn obebene ubọk inyana ikpọ otutuuk ere geelek mun̄ okupbe me Ijipiti, àkwọọk onanan̄a isibi, mè ichit otutuuk inyọn̄ ijọn̄ ido Ijipiti.

⁷Ebi ofia Ijipiti esasa ugwun̄ kiban̄ irọ si inu yaage Erọn orọbe. Àkwọọk onanan̄a isibi si me emen mun̄ inene inyọn̄ ijọn̄ Ijipiti.

⁸Ogwu Fero onenigwen Mosis mè Erọn, mè itumu inyi ema ibe, “Ìriaak Okumugwem ìnyi emi ibe isan̄a àkwọọk chi isan̄a me lek n̄a mè lek ebi n̄a, ke mâtele ibe ebi kinyi esi egwa ngwugwa enyi Okumugwem.”

⁹Mosis ofọfọọk ogwu Fero ibe, “Nchieek, mâriaak uriaak me ibot kwun̄, mè ibot ebi ibot ikwaan̄ kwun̄, mè ibot otutuuk ebi kwun̄, inyi àkwọọk chi inan̄a itele enyi, mè inikup me okwaan̄ Nali gaalek. Owu sa otu kwun̄ tumu nyi emi, ìre mgbọ owa ke oweek ibe àkwọọk chi inan̄a?”

¹⁰Ogwu Fero obebe ke ọmọ ìkiweek ibe inan̄a me iyakwut. Mosis ofọfọọk ọmọ ibe, “Môkup ike owu otumube, inyi owu òsa eya òriọọn̄ ibe ke kpunu awaji geege òbet lek Okumugwem Awaji kiji.

¹¹Àkwọọk cha mêsibi inọọn̄ me otutuuk uwu kwun̄, mè uwu ebi ibot ikwaan̄ kwun̄, mè isibi inọọn̄ si me uwu otutuuk ebi Ijipiti. Ire, me okwaan̄ Nali gaalek ke àkwọọk obokup.”

¹²Mosis mè Erọn enanan̄a isibi me isi ogwu Fero. Mosis oneniriaak uriaak igwen Okumugwem ibe isan̄a àkwọọk cha îsabe itap ufialek me lek ogwu Fero isan̄a.

¹³Okumugwem orọrọ inu Mosis obeekbe. Àkwọọk cha okwakwaan̄ ita kpai me emen uwu mè oyet egep mè emen uko.

¹⁴Ebi Ijipiti ekpukpulu nkwukwu àkwọọk cha ititiin̄ ibene me èdọ me èdọ ikana ere geelek. Olu nkwukwu àkwọọk okekijọ me otutuuk ere geelek me ido Ijipiti.

¹⁵Ire, mgbọ ogwu Fero omun̄be ibe ke utelelek înin̄, ke àkwọọk geege ìkayaka ìkup, itetet ejit kan̄ inye, mè ijit igbagban̄ utọn̄ inyi Mosis mè Erọn, kubọk Okumugwem owuukbe lek itumu ibe ke môrọ.

¹⁶Okumugwem onenitumu inyi Mosis ibe, “Tumu nyi Erọn ibe isa mkpat òkup ọmọ me ubọk isulu me ijọn̄, inyi otutuuk achiaan̄ òkup me ijọn̄ ido Ijipiti ikana ijo atantan òkinyi ene orukan̄.”

¹⁷Mosis mè Erọn erọrọ ubọk Okumugwem otemebe ema. Mgbọ Erọn obenebe mkpat kan̄ isa isulu me ntitaak ijọn̄, achiaan̄ òkup me ijọn̄ me otutuuk ere geelek me ido Ijipiti okakana ijo atantan, mè igwook ichit lek ebilene mè anam otutuuk.

¹⁸Ebi ofia ebi Ijipiti esasa lek igak irọrọ inyi achiaan̄ ijọn̄ ikana ijo atantan. Ire, ema kpekọt irọ. Ijo atantan cha îgwook ichit lek ebilene mè anam otutuuk.

¹⁹Mgbọ ema esabe lek igak kpekọt irọ, ema etutumu inyi ogwu Fero ibe, “Eyiyi ìnan̄a me ubọk Awaji.” Ire, kubọk Okumugwem owuukbe lek itumu, ogwu Fero okpọkpọ itet ejit inye, ìkachieek igbagban̄ ikọ Mosis mè Erọn ekitumu inyi ọmọ.

²⁰Okumugwem onenitumu inyi Mosis ibe, “Me ewelegwe, ogwu Fero môsibi isi otu mun̄. Eya orọ, me ewelegwe ewelegwe, je si chichini ọmọ mgbọ ìboje isibi otu mun̄ ya, mè tumu nyi ibe ke emi Okumugwem m̀be mè ogwugwu itele mè ebi n̄a esi efaka mfaka enyi emi.

²¹Ire ogwugwu ijit itetele mè ebi n̄a enan̄a efon, ke mâria ijo nson òkitaka ene mè anam itap orukan̄ me lek, me urum me urum, ichit ogwugwu lek, mè ichit si lek ebi ibot ikwaan̄ kè ogwugwu, mè lek otutuuk ebi Ijipiti, mè otutuuk emen uwu kiban̄. Ijo nson chi ìbochichit otutuuk inyọn̄ ijọn̄ Ijipiti, ere geelek ebi ene ekije.

²²“Ire, me usen ya, mâtap oke me etete ijọn̄ Gosen ere ebi n̄a elukbe, mè ofifi agan̄ ido Ijipiti, inyi ijo nson ya geege ikakup me agan̄ Gosen. Eyi môre inu ijejeen̄ inyi ogwugwu ibe ke emi, Okumugwem, òwa me inyọn̄ ijọn̄ yi nkupbe.

²³Mâtap oke me etete ebi n̄a mè ebi kè ogwugwu. Iyakwut ke inu ijejeen̄ yi obomọnọ irek.”

²⁴Okumugwem îrọ ikọ otu kan̄ iso ike îtumube. Me ofit iwele kan̄, ijo nson ogbọgbọọk me urum me urum inin̄ ijot uwu ogwu Fero, mè inin̄ ijot uwu ebi ibot ikwaan̄ kan̄, mè ikana ichit otutuuk inyọn̄ ijọn̄ ido Ijipiti bùk. Kpunu ere nson ìkachit. Wọlọwọlọ oninin̄ me otutuuk ido Ijipiti mije ijo nson cha.

²⁵Ogwu Fero oraria ikwaan̄ igwen Mosis mè Erọn, mè itumu inyi ema ibe, “Ngwa, ìsi ìsigwa ngwugwa ìnyi Awaji kinyi me inyọn̄ ijọn̄ ido Ijipiti.”

²⁶Ire, Mosis ofọfọọk ọmọ ibe, “In̄-in̄, ìkatat ikeya. Mije, inu eji ekisa igwa ngwugwa inyi Okumugwem Awaji kiji ìre mbuban inu me lek ebi Ijipiti. Ire eji inisa mbuban inu ya igwa ngwugwa me inyọn̄ ijọn̄ Ijipiti, ìre ebi Ijipiti kpebenaan̄ ejit, mè iten̄ ewuuk itọbọ eji?

²⁷Eya orọ, înwọn ibe eji mêje ije egwe ita inin̄ emen èwê isi igwa ngwugwa inyi Okumugwem Awaji kiji, ike înyibe eji ida.”

²⁸Ogwu Fero onenitumu inyi Mosis ibe, “Mâtele mè enyi esi egwa ngwugwa enyi Okumugwem Awaji kinyi me emen èwê. Ire, enyi kpebeje ijọn̄ọ ere. Mgbọ keyi, sabum enyi enan̄a eje, riaak uriaak me ibot n̄a.”

²⁹Mosis ofọfọọk ogwu Fero ibe, “Nsinan̄a isibi me isi kwun̄, mâriaak Okumugwem. Me iyakwut, ijo nson cha mônan̄a isan̄a me uwu kwun̄, mè uwu ebi ibot ikwaan̄ kwun̄, mè otutuuk uwu ebi kwun̄. Ire, owu kayaka ìfiaan̄ eji, mè ìjit itetele ibe ebi Ijeren esi egwa ngwugwa enyi Okumugwem.”

³⁰Mosis onanan̄a isibi me isi ogwu Fero, mè iriaak Okumugwem.

³¹Okumugwem onọnọ uriaak kè Mosis, mè isan̄a otutuuk ijo nson cha isan̄a kpai me uwu ogwu Fero, mè uwu ebi ibot ikwaan̄ kan̄, mè uwu otutuuk ebi Ijipiti. Geege ìkayaka ìsik me ere geege.

³²Ire, ogwu Fero okpọkpọk itet ejit kan̄ inye mgbọ keyi si, ìkachieek itetele ibe ebi Ijeren enan̄a efon.