Read obolo Isis 9 Bible Online

Isis 9 - obolo bible

Isis 9

¹Okumugwem onenitumu inyi Mosis ibe ije isi lek ogwu Fero, mè itumu inyi ibe, “Emi Okumugwem, Awaji ebi Iburu, m̀be mè owu òtele inyi ebi n̄a enan̄a esibi esi efaka mfaka enyi emi.

²Ire owu ojit, mè ikpọkpọ itet si ebi n̄a ikaan̄,

³kpọ, osusut ònan̄a me ubọk n̄a òwa me lek anam kwun̄ me oron, ere ekisa ema isi ikpukpo. Mâria orukan̄ anam inu me lek inyinya, mè inyinya akpan, mè aligọ, mè eriembuuk, mè arọọn̄, mè ebot otutuuk.

⁴Ire, emi Okumugwem mâtap oke me etete anam ebi Ijeren mè echi ebi Ijipiti. Anam geege me etete echi ebi Ijeren ìkpokwu.”

⁵Okumugwem onenisun̄ mgbọ inyi inu ya, mè itumu ibe, “Îre iyakwut ke emi Okumugwem mbarọ inu yi me ido Ijipiti.”

⁶Ofit iwele kan̄, Okumugwem orọrọ inu îtumube iso. Otutuuk anam ebi Ijipiti okwakwaan̄ isan̄a kpai. Ire, anam geege òrere eyi ebi Ijeren ìkakwu.

⁷Ogwu Fero oraria ebi ene ibe esi eweek eriọọn̄ mè ìre anam ebi Ijeren îkwaan̄. Enenilook ibe ke anam ebi Ijeren, kubọk ge ikeyi, ìkakwu. Ire, ogwu Fero okpọkpọ itet ejit kan̄ inye, ìkachieek ibe ebi Ijeren efon.

⁸Mgbọ eya orakabe, Okumugwem onenitumu inyi Mosis mè Erọn ibe, “Ìsi ototun̄ ere ekisọk ukan̄, mè ìgwọ ntọn̄ ìjot ubọk kinyi ìsa ìje ìsi ichichini ogwu Fero, mè Mosis itọp ntọn̄ ya ifo inyọn̄ me isi ogwu Fero, mè efet iben.

⁹Ntọn̄ ya môkana mfuun̄, mè igwook ichit otutuuk ijọn̄ ido Ijipiti, mè isa okporotu ukan̄ igwook ichit lek otutuuk ebilene mè anam òkup me ere geelek me otutuuk ido Ijipiti.”

¹⁰Mosis mè Erọn egwọgwọ ntọn̄ me ototun̄ ere ekisọk ukan̄, mè inikeke me isi ogwu Fero. Mosis otọtọp ntọn̄ ya ifo inyọn̄. Mgbọ yaage okporotu ukan̄ ogwogwook ichit lek ebilene mè anam me ido Ijipiti.

¹¹13 Ebi ofia ebi Ijipiti kpeyaka ikọt ikeke me isi kè Mosis, mije, okporotu ukan̄ îtibi ichit ema lek si kubọk îtibibe ichit lek otutuuk ebi Ijipiti.

¹²Ire, Okumugwem orọrọ inyi ejit ogwu Fero inye, inyi ikachieek igbagban̄ inu Mosis mè Erọn ekitumu, kubọk Okumugwem owuukbe lek itumu inyi Mosis ibe ke môrọ.

¹³Okumugwem onenitumu inyi Mosis ibe inan̄a ikeke me ata otu ewelegwe me iyakwut, mè ije isi itumu inyi ogwu Fero ibe ke ọmọ Okumugwem Awaji ebi Iburu ìbe, “Tele mè ebi n̄a esi efaka mfaka enyi emi.

¹⁴Ire ìkare ikeya, otutuuk ùrioon̄ mbaria inu mgbọ keyi môre owu lek, mè ire si lek ebi ibot ikwaan̄ kwun̄, mè otutuuk ebi kwun̄, inyi owu òriọọn̄ ibe ke kpunu ofifi ogwu òbet lek n̄a me otutuuk linyọn̄.

¹⁵Karake usen, ire maweek, nkaan̄ unye isasa iria osusut eyi môkọtbe ikpan̄ owu mè otutuuk ebi kwun̄ isan̄a me linyọn̄ keyi.

¹⁶Ire, ǹtele ibe owu òluk ugwem, inyi ǹjeen̄ owu unye n̄a, mè erieen̄ n̄a itaan̄ etip ikana otutuuk linyọn̄ sa me lek kwun̄.

¹⁷Kpan̄asi owu obogban̄ utọn̄, owu okpọkpọ ikigumu lek, mè ikitutuku ebi n̄a, mè ijit itetele ibe ema efon.

¹⁸Me ike mgbọ keyi iyakwut òbowewele, emi gwa ǹkiria atalek egwijo ibot mgbọlọ ònyenye enenen, inyi inirep igwook me ijọn̄ Ijipiti. Ojelek ibot mgbọlọ keyi ìkawuwuuk lek ìrep me otutuuk ido Ijipiti karake Ijipiti osibibe, mege inire mgbọ keyi.

¹⁹Eya orọ, nyi ida ibe ekpulu anam kwun̄ mè inu kwun̄ geelek òkup me oyet etap me uwu. Mije, ire egwijo ibot mgbọlọ ya ibọn̄ ene geelek, mè ìyaka ire anam geelek, òkup me oyet, ìkanin̄ uwu, ìbokwukwu.”

²⁰Ebi ibot ikwaan̄ ogwu Fero, ebi ìtetet ukpook me lek ikọ ya Okumugwem otumube, ekpukpulu ebi usun̄ kiban̄ mè anam kiban̄ itaak me uwu.

²¹Ire, ebi kpenyi utọn̄ me lek ikọ ya Okumugwem otumube etetele ebi usun̄ kiban̄ mè anam kiban̄ me oyet.

²²Okumugwem onenitumu inyi Mosis ibe, “Nyana ubọk kwun̄ fo inyọn̄, inyi egwijo ibot mgbọlọ ijibi me otutuuk ido Ijipiti, mè ibọn̄ ebilene ebi kpenin̄ uwu, mè anam geelek òkup me oyet, mè otutuuk inwan̄ oron geelek me otutuuk inyọn̄ ijọn̄ ido Ijipiti.”

²³Mosis obebene mkpat kan̄ ifo inyọn̄, Okumugwem orọrọ, isinyọn̄ okekikebe, mè ikisook. Ibot mgbọlọ okekirep. Omumen-inyọn̄ okekimumen nin̄inin̄inin̄i igwook ire ijọn̄. Sa me ikeyi ke Okumugwem oda ibot mgbọlọ igwook me ijọn̄ me otutuuk ido Ijipiti.

²⁴Ibot mgbọlọ ya înye enenen. Isinyọn̄ okekikebe, mè ikisook ukan̄ isibi me etete ibot mgbọlọ ya. Ojelek ibot mgbọlọ keya ìkararak ìrep me otutuuk ido Ijipiti karake Ijipiti okanabe ido.

²⁵Egwijo ya ojijibi, mè ikpan̄ otutuuk ebilene mè anam ebi kpenin̄ uwu, mè ijijaka otutuuk mbubet, mè isook si otutuuk uti geelek òtibi me ere geelek me ijọn̄ ido Ijipiti igwak isan̄a kpai, geege ìkayaka ìsik.

²⁶Inyọn̄ ijọn̄ Gosen gaalek, ere ebi Ijeren elukbe, ke egwijo ibot mgbọlọ ya ìkajibi ìre.

²⁷Ogwu Fero oneniria etip igwen Mosis mè Erọn, mè inibe ema, “Mmun̄ ibe ke îlọ emi me ubọk mgbọ keyi. Inu Okumugwem orọbe ìre unen. Ire, emi mè ebi n̄a mîrọ ilọ.

²⁸Mgbọ keyi, ìriaak Okumugwem ìnyi eji ke egwijo ibot mgbọlọ melek nsook-isinyọn̄ yi minye enenen, ke mâtele ibe enyi efon, mè ekayaka ìkup ìgak ikeya.”

²⁹Mosis ofọfọọk ọmọ ibe, “Nsinanan̄a me emen ama yi isibi, mâbene ubọk iba n̄a ifo inyọn̄, mè iriaak Okumugwem me ibot kinyi. Nsirọ ikeya, nsook-isinyọn̄ ya môfieek, ibot mgbọlọ yi ìkpoyaka irep ofifi, inyi owu òsa òriọọn̄ ibe ke îre Okumugwem okaan̄ linyọn̄ yi.

³⁰Ire, emi nriọọn̄ ibe, mege na re mgbọ keyi, ke owu mè ebi ibot ikwaan̄ kwun̄ kpetet-nu ukpook me lek Okumugwem Awaji.”

³¹Mije ibot ya, otutuuk uti fàlâs mè akpa balì ejijijaka mè ifiat isan̄a kpai. Mije, me mgbọ ya, akpa balì ìbebene ikisan̄a mfut kan̄ isibi, uti fàlâs si îbene ikigwook ajakajak me lek.

³²Ire, akpa wit mè akpa sìpelit ìkajijaka, mije, akpa kechi ìkakigwat lek ìto mfut.

³³Mgbọ Mosis onan̄abe isibi me uwu ogwu Fero, mè ije isibi me ama ya, ibebene ubọk iba kan̄ ifo inyọn̄, mè iriaak Okumugwem me ibot ebi Ijipiti. Nsook-isinyọn̄ ya mè egwijo ibot mgbọlọ ya ofefieek. Ibot geege ìkayaka ìrep ìgwook me ijọn̄ me otutuuk ido Ijipiti.

³⁴Ogwu Fero imumun̄ ibe ke egwijo ibot mgbọlọ ya mè nsook-isinyọn̄ ya îfieek, ibebene ijo irọrọ kan̄ ya si. Ọmọ mè ebi ibot ikwaan̄ kan̄ etetet ejit kiban̄ inye.

³⁵Ikeya ke ogwu Fero otet ejit kan̄ inye, mè ijit si itetele ibe ebi Ijeren esibi efon, kubọk Okumugwem owuukbe lek itumu inan̄a me otu kè Mosis.