Read obolo Jobu 10 Bible Online

Jobu 10 - obolo bible

Jobu 10

¹“Ugwem n̄a îrook emi; eya orọ, m̀kpakọt itele ininina lek n̄a; mâtumu ikọ ikpọ me lek ubọk ejit ofieekbe emi ire.

²Mâtumu inyi Awaji ibe: ‘Katip emi oyerebet, ire, kpa ibot ikọ kwun̄ melek n̄a nyi emi-nu.

³Ìre înwọn ibe owu òtutuku emi ni? Ìre îgbe ibe owu òjit ubọk ikwaan̄ kwun̄ òtele, mè òkobele ejit me lek ijọ otitọt ebi ikpak ni?

⁴Ìre chieen̄ ebi anam akpalek ikike ke owu okaan̄? Sà ìre owu òkimọọn̄ inu kubọk ebilene ekimọọn̄?

⁵Ìre usen ugwem kwun̄ ìgbidim kubọk echi ebilene, sà ìre acha ugwem kwun̄ ìse kubọk echi ogwu ebilene,

⁶eyi owu okiruk chieen̄ iweek nrọ-nlọ n̄a, mè ikiwọlọ ijo n̄a,

⁷àya, owu oriọọn̄ isan̄a ibe ǹkarọ ijo inu geege, ke kpunu si ogwu òbokọt inyan̄a emi isibi me ubọk kwun̄?

⁸“ ‘Îre ubọk kwun̄ olilọkọ emi, mè irom emi. Ìre owu môyaka inijijaka emi isan̄a ni?

⁹Kawuuk ibe ke òsa arika ibot emi. Ìre owu môkọk emi ikana achiaan̄ mgbọ keyi ni?

¹⁰Ìre owu òkatọkọ emi ìtap me owot nga n̄a kubọk etọkọ mun̄ ebe, mè ìrọ inyi ǹkam kubọk mun̄ ebe akakam okikam,

¹¹mè ìsa akpa mè ufuk ìkana ìchit emi, mè ìgbaan̄ ukwuuk mè nlik ìsa ìlọk emi ni?

¹²Owu onyi emi ugwem, mè ikaan̄ ata ejit me lek n̄a, mè isa ata ubọk kwun̄ ibem ebek ugwem n̄a.

¹³“ ‘Ire, owu olelet inu chi me ejit kwun̄; nriọọn̄ ibe inu yi ìkukup owu me ekiket.

¹⁴Ire marọ ijo inu, kè owu òkokpọ emi; owu kpomochieek ibe emi nkabọkọ osusut ijo inu n̄a.

¹⁵Ire nrọ inu ilọ, njijin lek n̄a òwa! Ikerere ǹrọrọ ata irọrọ, kpamakọt ibene isi, mije, esip ìjojot emi isi, ukwook ìmemeen̄ emi kubọk mun̄ ile.

¹⁶Ire mbene oguga ikigugo lek, owu òbochichim emi kubọk egbe àtat, mè isak emi unan isa ijeen̄ uyeke uyeke unye kwun̄.

¹⁷Owu òkpọkpọ ikisa ebi ata-ikọ kwun̄ inu me lek n̄a, mè ikitap inu isọkọ me lek unaan̄-ejit kwun̄ me lek n̄a; owu òkiria ufialek me ukpa me ukpa ijet emi, kubọk aya isi ebi akọn̄ ekinu ininwene ebi oka.

¹⁸“ ‘Keke orọ osan̄abe emi me akpa gwun̄ isibi inyọn̄? Mebe nkwu sabum chieen̄ ene ònomun̄ emi, kè ònwọn.

¹⁹Meben emi me akpa gwun̄ isi itap me udọn̄-ufuun̄, manikup kubọk ogwu ìkasisibi inyọn̄.

²⁰Sọn̄ usen inen mè inen eyi ugwem n̄a îtata isan̄a ma! Da isi san̄a emi me lek, inyi isi n̄a itọn̄ọ-nu sọntiik,

²¹sabum mbasi ere kpekisi mè iyaka ika, òrere ama ugwuuk mè ufieejit mkpa,

²²ama òdudun kubọk udun me lek kan̄, ama ufieejit mkpa, ere inu geege ikakupge me onineen̄, ere utoon̄ orebe udun.’ ”