Read obolo Jobu 11 Bible Online

Jobu 11 - obolo bible

Jobu 11

¹Sofari ogwu Nayama onenitap otu ibe:

²“Ìre kpebebọkọ otu owuwa ikọ kechi ni? Ìre itutumu ogbogbo ikọ îkirọ ibe oyerebet inwọn ene ni?

³Jobu, ìre wọlọwọlọ ikọ kwun̄ môrọ ibe ene ikasan̄a amọn ni? Ìre kpebekan̄ inu inyi owu me lek ochak chi okirọ ene?

⁴Owu otumu inyi Awaji ibe, ‘Inu nchieekbe me lek ìtatat, emi si ǹkarọ inu geege ìlọ me isi kwun̄.’

⁵Kè ònwọn ibe Awaji itumu ikọ, mè isa otu kan̄ itumu ikọ ikeme owu,

⁶mè ijeen̄ owu nlelet inu òkup me emen iriọọn̄-inu, mije, iriọọn̄-inu ìkup agan̄ iba. Riọọn̄ ibe ke osusut Awaji onyibe owu îsiki igak ijo inu kwun̄.

⁷“Ìre owu môkọt iweek udọk udọk inu Awaji iriọọn̄? Sà ìre môkọt iriọọn̄ otutuuk inu geelek òfo me lek Ogwu Òkaan̄ Unye Geelek?

⁸Inu cha îbene igak akpabin inyọn̄, keke ke owu obokọt irọ? Ema mîdọk igak ama ekwukwu, keke ke owu obokọt iriọọn̄?

⁹Ujọn̄ọ kiban̄ îjọn̄ọ igak linyọn̄, uwele kiban̄ îwele igak okwaan̄.

¹⁰“Ire Awaji ije iraka, mè itet owu igon ikam me mkpọn, mè ititiin̄ uwu oyerebet, ekene obokọt igban ọmọ?

¹¹Me atikọ, ọmọ îriọọn̄ lek ebi ofiaan̄; mè ikimọọn̄ si ijo inu, ìre ìkpokaan̄ ekiket ofolek ni?

¹²Ike inyinya akpan eyi oron ìkpokọt iman gwun̄ ebilene, ikeya si, ogwu mbubut ìkpokọt ikana ogwu òriọọn̄ inu.

¹³“Ire owu osa me otutuuk ejit kwun̄ igọọk ọmọ, mè ibene ubọk ikiriaak uriaak inyi ọmọ,

¹⁴ire owu osan̄a ubọk me emen ijo inu, mè òkachieek ibe ijo inu ikup me uwu kwun̄,

¹⁵mgbọ ya, owu môbene isi, esip ìkpotet owu, owu môkeke inye, ukpook ìkpotet owu.

¹⁶Owu môwuuk ufialek kwun̄, owu môkikekeek ema kubọk ìre mun̄ òlilibi iraka.

¹⁷Usen ugwem mônenikitoon̄ igak utoon̄ ikarek, udun mônenikana ikikup kubọk otu ewelegwe.

¹⁸Owu môkaan̄ utoon̄-ejit, mije, ikpọchieen̄ ọmọ òwa, owu môkpọ ere ikana, mè isiki ilaak me utelelek.

¹⁹Owu môlaak, ene geege ìkporọ owu òfieek owot, owuwa ene mêsa ata otu iniweek nnwọn me ubọk kwun̄.

²⁰Ebi ikpak kpebekọt imọọn̄ inu òborọ ema, kpebemun̄ agan̄ ebelibi itap ibot inwọnọ, otutuuk inu òbokup inyi ema ìre mkpa gaalek.”