Read obolo Jobu 12 Bible Online

Jobu 12 - obolo bible

Jobu 12

¹Jobu onenifọọk otu ibe:

²“Atikọ, enyi ìre ife ìsibi isi, enyi isikwaan̄, iriọọn̄-inu môkwukwu.

³Emi si nriọọn̄ inu kubọk enyi eriọọn̄be, ǹkasiki ìgak enyi. Ìre ekene ikariọọn̄ge otutuuk inu chi geelek?

⁴Emi, ene òkigwen Awaji, mè Awaji ochieek, nkana ogwu ebi une n̄a ekichak ochak, emi ogwu ònenen, mè ire ogwu ǹkalọ, nkana inu ochak ikike.

⁵Ebi inyọn̄ onwọnbe ekikpọ ufialek chieen̄ isiki; ufialek ìkinu inyi ebi ìwuwuuk lek ikup me ufialek.[2]

⁶Uwu ebi inọ afa ìkup me esuuk; ebi ìkirọ Awaji inaan̄ ejit ekup me utelelek, eyi Awaji okisa me ubọk kan̄ ijet ema.[3]

⁷“Do-nu ebi kè anam, ke mêjeen̄ owu; si lek ebi kè unọn òwulu me inyọn̄, ke mêkpa inyi owu;

⁸tumu nyi linyọn̄, ke môjeen̄ owu, ebi kè irin̄ òkup me okwaan̄ mêkpa inyi owu.

⁹Eyi owa me lek otutuuk inu chi ikariọọn̄ge ibe ke inu yi ìnan̄a me ubọk Okumugwem?

¹⁰Ugwem otutuuk inu geelek òkifuuk efuuk ìkup ọmọ me ubọk, mè efuuk ugwem ebilene geelek.

¹¹Ike alọm okigban̄ utop eyi inorie, ikeya si ke utọn̄ okigobo ikọ.

¹²Iriọọn̄-inu ìkikup me etete ebi ìkakan, ebi ìluluk ugwem ijọn̄ọ ekikaan̄ ngobo-ntet.

¹³“Awaji okaan̄ iriọọn̄-inu mè unye, nteme mè ngobo-ntet ìre echi kan̄.

¹⁴Inu îgbugbọbe igwook, kpebekọt ikpọk inama; ogwu îtapbe mkpọn, kpebekọt isan̄a isibi.

¹⁵Ọmọ isitet ibot ikaan̄, ere îra ichat isan̄a; isida ibot igwook, ijọn̄ îra ijijaka.

¹⁶Ọmọ okaan̄ unye mè ntim-mkpan̄, ogwu efiaan̄be mè ogwu òfafiaan̄ ekup me irak ubọk kan̄.

¹⁷Ọmọ okibọkọ iriọọn̄-inu isan̄a me ibot ebi nteme, mè ikirọ ebi ibot oyerebet ekana mbubut.

¹⁸Ọmọ okitọn̄ọ fanti mkpulu isan̄a ebi ubọọn̄ me ebon, mè ikitobo ema ekwut ebi usun̄ me ebon.

¹⁹Ọmọ okibọkọ unye isan̄a me ubọk ebi ngwugwa, mè ikisan̄a ebi ìkibia me irek ilile ito me ijọn̄.

²⁰Ọmọ okitap ebi nteme etoon̄be ejit me lek mbuuk, mè ikibọkọ iriọọn̄-inu isan̄a me ibot ebi ugane.

²¹Ọmọ okisa esip itet ebi ilile, mè ikibọkọ unye isan̄a me ubọk ebi unye.

²²Ọmọ okichili udọk udọk inu me emen udun ibook, mè ikitap utoon̄ me emen ufieejit mkpa.

²³Ọmọ okibene ido ifo inyọn̄, ọmọ si okijijaka ido; ọmọ okirọ inyi ido imin, ọmọ si okiyiyala ido.

²⁴Ọmọ okibọkọ ifuk-ibot isan̄a me ibot ebi ibot me linyọn̄, mè ikirọ inyi ema ekenyinya ekana emen èwê ere kpunube oniin̄.

²⁵Ema ekekitutun iweek agan̄ me emen udun, kpunu utoon̄, mè ikigbugbe kubọk ebi miin̄ osabe.