Read obolo Jobu 13 Bible Online

Jobu 13 - obolo bible

Jobu 13

¹“Kpọ, chieen̄ n̄a îra imun̄ otutuuk inu chi, utọn̄ n̄a si îra inọ, mè igobo itet.

²Inu enyi eriọọn̄be, emi si nriọọn̄; ǹkasiki ìgak enyi.

³Ire, emi m̀batumu ikọ inyi Ogwu Òkaan̄ Unye Geelek, ǹkiweek itutumu ikọ ibot n̄a melek Awaji.

⁴Ire, enyi ekikan̄ ataak isa ichit inu enyi ekariọọn̄ge, enyi otutuuk ene ìre ebi ofia kpekikọt igwa ene.

⁵Mebe enyi mîriaan̄ ere, kpesan̄a amọn geege, eya monijeen̄ ibe ke enyi mîkaan̄ iriọọn̄-inu.

⁶Ìgban̄-nu ibot ibot ikọ n̄a, mè ìnọ ibot ikọ nto-lek nkitumu.

⁷Ìre ikpak ikpak ikọ ke enyi ebetumu me otuchieen̄ Awaji, mè itumu ikọ ofiaan̄ ofiaan̄ me ibot kan̄ ni?

⁸Ìre enyi ebetumu ikọ ulibi-chieen̄ me ibot kan̄ ni? Ìre enyi ebebọkọ ikọ ibot kan̄ itumu?

⁹Ire ọmọ iwọlọ enyi ikpọ, ìre eya môsa nnwọn ijet enyi? Ìre enyi mêkọt ifiaan̄ ọmọ kubọk ekifiaan̄ ebilene?

¹⁰Ire enyi ilibi ene chieen̄ me nlelet, ọmọ ìkpolọlọ ikakan̄ inu inyi enyi.

¹¹Ìre umin ubọọn̄ kan̄ ìkpotet enyi ukpook? Sà ìre mbiribọ kan̄ ìkpogwook enyi me lek?

¹²Ìkpọ, ikọ iriọọn̄-inu kinyi cha ìre urọk ebegegen̄ ifiin̄ kubọk ntọn̄, ikọ enyi ekisa ikput lek cha ìre agbọ arika òkikpukpukpuku.

¹³“Ìchit otu kinyi-nu, inyi ǹtumu ikọ; ikaan̄ inu òborọ emi, irọ.

¹⁴Keke orọ ni? Mâtap olik me ebek, mè isa ubọk n̄a ikpan̄ lek n̄a.

¹⁵Ọmọ môkọt ikpan̄ emi, ǹkayaka ìkaan̄ ikpọchieen̄ geege, ubọk geelek si, m̀batutumu ikọ ibot n̄a me isi kan̄.

¹⁶Eyiyi si môrọ inyi ǹkaan̄ unyan̄a, mije, ogwu ijo ebilene ìkponu me isi kan̄.

¹⁷Ìriọọn̄ ubọk ìgban̄ ikọ n̄a, ìsa utọn̄ kinyi ìkpebe inu nkitumu.

¹⁸Kpọ, nra ineen̄ ikọ n̄a isun̄ isan̄a, nriọọn̄ ibe ke mêmun̄ ibe ke kpunu inu nlọbe.

¹⁹Ìre ekene obonigwen ikọ itoon̄ emi me ibot? Ire ikọ ifieek emi, mâchit otu, mè ikwu.

²⁰“Jei Awaji, rọ inu iba kechi nyi emi, inyi ǹkọt ǹsan̄a lek n̄a ǹsibi me isi kwun̄:

²¹San̄a ubọk osusut kwun̄ jọn̄ọ ere me lek n̄a, mè kayaka ìsa ukpook kwun̄ ìtap emi ufieek-owot.

²²Osirọ, gwen emi, ke mâchieek, mè ìyaka ire, tele emi ǹtumu ikọ, mè owu òfọọk.

²³Nrọ-nlọ n̄a mè ijo inu n̄a ìwawa ikup? Rọ mè ǹriọọn̄ ere njebe ilọ, mè ijo inu nrọbe.

²⁴Keke orọ okilet isi kwun̄ me lek n̄a, mè imọnọ emi kubọk ogwu ochicha kwun̄?

²⁵Ìre emi, nchat inwan̄ efet okiwut ije, ke okitap ukpook me lek? Ìre emi, mfufe akpa ikike, ke okililaba?

²⁶Mije, owu oge inu òjajat ikeme emi, mè irọ ijo inu mgbọ nsabọn irieen̄ n̄a itoon̄ emi me ibot.

²⁷Owu osa mkpọn ibọp ukot n̄a iba igọm, mè ikiruk chieen̄ ikpọ otutuuk ukot ije n̄a, mè itap emi iman̄ me akajit ukot, inyi òkosa òriọọn̄ akpat ukot n̄a.

²⁸Eya orọ nkitak ita kubọk inu òjọjọ, kubọk ofọnti nkarankat otakabe igwak.