Read obolo Jobu 14 Bible Online

Jobu 14 - obolo bible

Jobu 14

¹“Ene, îre enenwaan̄ oman; usen ugwem kan̄ ìre gaalek mgbidim, ufialek ufialek ojot.

²Ìkitibi isibi kubọk ajakajak, mè ògen̄ òsan̄a; ìkigwat lek iraka kubọk ogugo, ìkakifuk.

³Ìre emi ogwu òkup ikeyi ke okigwuun̄ chieen̄ ikikpọ? Ìre owu òborọ emi ǹgọọk owu ǹnin̄ oyerebet ni?

⁴Ìre ekene obokọt isan̄a inu kpunube mbuban me lek isibi me lek inu òkaan̄ mbuban me lek? Kpunu ogwu òbokọt!

⁵Eyi owu odọmọbe usen ugwem ene isun̄ isan̄a, mè idọmọ otu ifuk onyan̄ kan̄ ifieek, mè itap okike mgbọ inyi ugwem kan̄, ìkpokọt isaba iraka.

⁶Eya orọ, da chieen̄ san̄a me lek kan̄, inyi ikaan̄ utelelek, mè irọ ikwaan̄ kan̄ me usen me usen isan̄a kubọk ogwu ọkọ.

⁷“Eyi kè uti înwọn, uti îkaan̄ ikpọ chieen̄; ire ifieek ito, môkpọk isek, ayaya agọọk kan̄ cha ìkpolọlọ ititibi.

⁸Ire ugwun̄-ijọn̄ kan̄ ikan me emen ijọn̄, mè ebon kan̄ ikwu me emen achiaan̄,

⁹isinọnọ olu mun̄, îra itibi oduuk, mè igwook agọọk kubọk ke ewowop.

¹⁰Ire, ogwu ebilene isikwu, unye kan̄ îta, isifuuk òta efuuk kan̄, ìyaka ikup me ere owa ni?

¹¹Ike mun̄ okichiaak ita me nria, mè okolo òchat òsan̄a, mè ojijaka,

¹²ikeya ke ene okilaak, ìkayaka ìkinan̄a ìkeke okup; mege isinyọn̄ oraka òsan̄a, ene ìkpobolo chieen̄ me ilaak, kpebekọkọt si itimi ọmọ me ilaak kan̄.

¹³“Jei, kè ònwọn ire owu molet emi me ama ekwukwu, mè ilet emi mege unaan̄-ejit kwun̄ môrakabe! Kè ònwọn ire owu mosun̄ okike mgbọ mâkupbe me ere ya ire, mè iyaka inikeek emi mgbọ mgbọ ya isiso!

¹⁴Ire ene ikwu, ìre môyaka ikpọk igat ugwem ni? Mâkup otutuuk usen ikwaan̄ n̄a mege ogwu òbonibọkọ irek n̄a mônube, inyi ǹkaan̄ utelelek.

¹⁵Owu môgwen emi, mâchechieek owu; inu ubọk kwun̄ orombe mônenilọk owu.

¹⁶Mije, owu môfuk ukot ije njibibe, òkpoyaka ikiruk chieen̄ ikpọ ijo inu n̄a.

¹⁷Owu môtap nrọ-nlọ n̄a me emen akpa itobo otu ichit, mè ichiọọk ijo inu n̄a ininimi.

¹⁸“Ire, ike ogoon̄ okigbugbọ, mè ikpukpuku igwook, mè ike ewuuk okifan̄a inan̄a me akpat,

¹⁹ike mun̄ okigwọk ewuuk isip, mè ike agbugbuk okigwọk achiaan̄ ijọn̄ isan̄a, ikeya ke owu okijijaka ikpọchieen̄ ogwu ebilene igwook.

²⁰Òkisa unye kwun̄ isulu ọmọ ito ire mgbọ geelek, ọmọ îra ikwu ifo; owu òkisa mkpa inwene isi kan̄, mè iria ọmọ isibi me linyọn̄.

²¹Ire bọn ebirieen̄ kan̄ ibọkọ umin, ọmọ ìkariọọn̄; ire ema iben esip, ọmọ ìkamun̄.

²²Ufiak eyi akpalek kan̄ gaalek ke îkinọ me lek, mè ikifieek ejit inyi lek kan̄ gaalek.”