Read obolo Jobu 16 Bible Online

Jobu 16 - obolo bible

Jobu 16

¹Jobu onenifọọk otu ibe:

²“Inu kechi, nra inọ owuwa owuwa; enyi otutuuk ene ìre ikpak ikpak ebi ìkat ene ejit!

³Ìre ikọ efet efet ikike ìkakikaan̄ itata ni? Keke okifiak owu, eyi okpọkpọ itet lek inye ikiwut ifan̄a?

⁴Mebe enyi ekup me irek n̄a, emi nkukup me irek kinyi, emi si, kè ntumu ikọ enyi ekitumu; kè ntumu ikọ ntoon̄ enyi me ibot, mè ǹkentọp ibot nnyi enyi.

⁵Ire, kè otu n̄a orọ ejit kinyi inye, mè ikọ ukarajit otu alọm n̄a osuuk enyi lek.

⁶“Eyi, ikerere ǹtutumu ikọ, ufiak n̄a ìkasuuk, ire ǹkatutumu, ìkatetele emi si.

⁷Awaji, owu orọ efuuk ita emi me owot; owu ojijaka otutuuk urum ebi n̄a isan̄a kpai.

⁸Owu orọ inyi emi ǹruk ǹchat, eyi ònenire ata-ikọ ikeme emi; lek n̄a ògwọgwọọn̄ îkana ata-ikọ ibe ke emi nrọ ijo inu.

⁹Awaji îsa me unaan̄-ejit igwak emi iche, mè icha emi; înaan̄ ejit uyok uyok inyi emi; ogwu oriara n̄a îyaka chieen̄ igwuun̄ emi me lek.

¹⁰Ebi ene enwenwe otu ibook ikichak emi; ema ekitap emi ada me agba otu isa ikirọ emi ochak, mè igbaan̄ lek itọbọ ikirọ ikeme emi.

¹¹Awaji îyaka emi inyi ebi ijo ife, mè itọp emi itap me ubọk ebi ikpak;

¹²Inu îjaan̄ me lek n̄a, ire, itọtọbọ emi ikpọk; ìtet emi me okọt ebek, mè inwan emi ikpukpuku. Îsa emi ito okukọọk,

¹³ebi oraan̄ kan̄ ekekeke ikana emi okokop. Ìkatoto emi njijin, îchim emi ichip me ebon itibi, mè ifiin̄ olulut n̄a igwook me ijọn̄.

¹⁴Ìlilibi iraak iraak inin̄ emi lek kubọk ogwu akọn̄, mè igwak emi itibi me irek me irek.

¹⁵“Ekwut ufieejit ke nchim isa ichit akpa lek n̄a, mè iben ibot n̄a ifuun̄ me ntọn̄.

¹⁶Ito îjiik emi chieen̄, ito îtap udun ichit emi chieen̄.

¹⁷Ire, ubọk n̄a ìkanin̄ me inu afa, uriaak n̄a si ìtatana ikup.

¹⁸“Jei ijọn̄, kachit eje n̄a ibe ikato ito; kè ito n̄a ikata.

¹⁹Ikerere mgbọ keyi, ogwu ata-ikọ n̄a òwa me emen inyọn̄, ogwu òkitumu ikọ ibot n̄a òwa me akpabin inyọn̄.

²⁰Ebi une n̄a ekichak emi ochak, mun̄ ito chieen̄ n̄a ìkigwook inyi Awaji.

²¹Jei, mebe ene ge moniteek nteek me etete Awaji melek ebilene, kubọk ene okitumu ikọ me ibot ogwu unene kan̄.

²²Gaalek acha inen mè inen oboraka, sabum mâneninan̄a ije eyi ekisi, kpekiyaka ika.