Read obolo Jobu 17 Bible Online

Jobu 17 - obolo bible

Jobu 17

¹“Ekwukwu n̄a îwulu ichep, usen n̄a îta, udọn̄-ufuun̄ ìkikukup iban emi.

²Me atikọ, ebi ochak ekakana emi okokop, mè ikiweek emi ikọ ujat ujat, ǹkakọt ìsan̄a ema chieen̄ me lek.

³“Jei Awaji, owu me lek kwun̄ bọkọ emi me ata-ikọ ma. Ire ilọ owu, ekene obonyana ubọk itet emi ni?

⁴Owu ogon ema ejit ichit, inyi ekakaan̄ ngobo-ntet, eya orọ, kachieek ibe ema etim ekpan̄ emi.

⁵Ogwu ijit ebi une kan̄ bak me lek ikpoko, chieen̄ bọn kiban̄ môchit me useen̄.

⁶“Awaji îsa emi irọ ogwu ekisa irọk urọk, mè ogwu ekicho ataak itọbọ me isi.

⁷Chieen̄ n̄a îdun bak me lek ufieejit, otutuuk unye nriro lek n̄a îniniin̄ ichep kubọk ogugo.

⁸Ufialek n̄a yi îke chieen̄ ebi ìkirọ unen, ogwu ǹkalọ okekinaan̄ ejit ikeme ebi kperiọọn̄ Awaji.

⁹Ogwu ata irọrọ ìtetet inye ibe ọmọ ìre ogwu ata irọrọ, lek ogwu ubọk otanabe ìbokpọkpọ ikinye.

¹⁰“Ire, otutuuk kinyi, ìgwu ìkom, ìnikpọk ìtumu ikọ kinyi! Nriọọn̄ ibe m̀kpamun̄ ene ge òriọọn̄ inu me etete kinyi.

¹¹Usen n̄a îta, otitọt n̄a geelek îlọ isan̄a, inu mbenbe me ejit irọrọ îfieek ichep.

¹²Ebi une n̄a ebe ke eririeen̄ ìre ikarek, emi me emen udun nkupbe, ema ebe ke îre utoon̄.

¹³Ire mkpọ chieen̄ ibe ke udọn̄-ufuun̄ ore uwu n̄a, mè ire nto mkpilaak n̄a me emen udun ilaak;

¹⁴ire ntumu inyi udọn̄ ibe, ‘Owu ore nte n̄a,’ mè ibe mkput, ‘Owu ìre nga n̄a mè ngwan̄ n̄a enenwaan̄,’

¹⁵ìre ikpọchieen̄ n̄a ìkup me owa ni? Ekene obokọt imun̄ ikpọchieen̄ n̄a?

¹⁶Ìre ikpọchieen̄ chi môgọọk emi inin̄ udọn̄? Ìre eji mêgbaan̄ igele isiki inin̄ achiaan̄ ni?”