Read obolo Jobu 18 Bible Online

Jobu 18 - obolo bible

Jobu 18

¹Bilidadi ogwu Suwa onenibọkọ otu ibe:

²Mgbọ owa ke enyi ebetumu ikọ chi ifieek? Ìtet otu ìkaan̄ mè ìgban̄, inyi eji ekọt etumu ikọ.

³Keke orọ ekimun̄ eji kubọk anam? Keke orọ eji ekupbe me chieen̄ kinyi kubọk ebi tuntun?

⁴Owu ogwu òsa me unaan̄-ejit itap unan me lek kwun̄, ìre eyat etele linyọn̄ enyi owu ni? Sà ìre mêbak me lek kwun̄ ijibi ewuuk isan̄a me akpat?

⁵“Mêwut mkpukan̄ ogwu ijo ene iniin̄ dìp dìp, alọm ukan̄ kan̄ ìkpoyaka ilomo.

⁶Utoon̄ emen uwu kan̄ môkana udun, mkpukan̄ òkup me agba lek kan̄ môniin̄.

⁷Unye ukot ije kan̄ môwọ, ekiket kan̄ môben ọmọ itọbọ me ijọn̄.

⁸Ukot kan̄ oben ọmọ isi itap me lek njin, ikwakwala inin̄ me ufe.

⁹Ufe îgọbọ ọmọ me ibot ukot, olik ufe otetet ọmọ ikam.

¹⁰Mîlet olik ufe me ijọn̄ iban ọmọ, mè itip ufe ito me oniin̄ îkije.

¹¹Ukpook uwuuk-lek îkana ọmọ me agan̄ geelek, mè ikigọọk ọmọ me akpat ukot.

¹²Unye kan̄ îta isan̄a mije uraafiọọn̄, ùrioon̄ ìkukup ikikpọ ọmọ ibe inan̄a irọn̄.

¹³Orukan̄ îtaka akpa kan̄ usini ere ijibi, ijo orukan̄ mkpa îrie ọmọ nriro lek igwak.

¹⁴Mîdut ọmọ isibi me uwu kan̄ ere îkaan̄be utelelek, mè isa ọmọ ije ijet mkpa, òrere ogwu ubọọn̄ òkitet ene ukpook.

¹⁵Ebi kpere ebi kan̄ mêluk me uwu kan̄, mîfiaak biridọni ichit ere nluk kan̄.

¹⁶Me agan̄ irak, ugwun̄-ijọn̄ kan̄ îkwaan̄ isan̄a, me agan̄ inyọn̄, agọọk kan̄ îchiaak isan̄a.

¹⁷Kpunu inu mêsabe ikikeek ọmọ me linyọn̄, erieen̄ kan̄ îchep me oyet dìp dìp.

¹⁸Mîrieen̄ ọmọ isibi me utoon̄ itap me udun, mè ilap ọmọ isan̄a me linyọn̄.

¹⁹Ìkakaan̄ gwun̄ mè ìre gwun̄ gwun̄ me etete ebi kan̄, ìkakakaan̄ si ogwu òsisik me ere îlukbe.

²⁰Ebi agan̄ ichep-ura mîtet ukpook mije inu òrọrọ ọmọ, ebi agan̄ mbum-ura mîriki.

²¹Me atikọ, eya ore inu òkukup inyi ebi ikpak, mè ikup si inyi ebi kpekinyi Awaji umin.”