Read obolo Jobu 19 Bible Online

Jobu 19 - obolo bible

Jobu 19

¹Jobu onenibọkọ otu ibe:

²Ìre enyi ebesa ikọ kinyi itap emi ufialek me lek isi ire mgbọ owa, mè isa ikpukpuku emi igwook?

³Akọp mgbọ ire ya enyi ekinye chieen̄ inyi emi, mè ita esip me isi ikinyi emi kwulukwulu.

⁴Ire me atikọ ke nrọ ilọ, nrọ-nlọ n̄a ìbia emi me ibot.

⁵Ire enyi imọnọ me atikọ ibe ke enyi mînwọn igak emi, mè isa ukwook òkitet emi irọ inye ibe ke emi nrọ ijo inu,

⁶ìriọọn̄ ibe ke îre Awaji orọ emi ilọ, mè igwook njin kan̄ ikana emi ikwek.

⁷“Ntaan̄ ukpo ibe ke mêkirọ emi nnaan̄, kpunu ogwu òbọbọkọ emi otu; nto ito iweek ntap-ubọk, kpunu ogwu òrọrọ inu ònenen inyi emi.

⁸Awaji îwak oniin̄ n̄a ichit, inyi nkaraka; îtap udun me oniin̄ n̄a geelek.

⁹Îsan̄a emi ulibi n̄a me lek, mè isan̄a emi okpibot ubọọn̄ eyi umin isan̄a me ibot.

¹⁰Îgwak emi igwook me agan̄ geelek, ngagak iweek; îjibi ikpọchieen̄ n̄a isan̄a kubọk ejibi uti me ebon.

¹¹Unaan̄-ejit kan̄ ìkiyoyok me lek n̄a; îfuk emi itap me otu ifuk ebi ochicha kan̄.

¹²Ebi urum akọn̄ kan̄ mîgbaan̄ ijibi inu, mè ininama urak ukot kiban̄ ikwek emi, mè ikpa mbin ikana uwu n̄a.

¹³Awaji îbọkọ emi ebi ngwan̄ n̄a isi ito me ujọn̄ọ ere; ebi òriọọn̄ n̄a mîkpebe emi lek me lek.

¹⁴Bọn ulọk n̄a mîyat itele emi, ebi une n̄a mîwuuk emi.

¹⁵Ebi ìkirie me uwu n̄a, mè ebibaan̄ ebi ikwaan̄ n̄a emọnọ emi kubọk ogwu ichen, ekimun̄ emi kubọk ogwu ofifi ido.

¹⁶Ngwen ogwu ikwaan̄ n̄a enerieen̄ igak, ìkachieek emi, ubọk geelek nsabe otu n̄a iriaak ọmọ.

¹⁷Nwa n̄a ìlilibi olu otu n̄a; olu lek n̄a ìkijọjọ me lek ebi melek n̄a esibibe me owot ge.

¹⁸Nsabọn si ekililibi emi lek, nsinan̄a ikeke, ema ekichachak emi.

¹⁹Otutuuk ebi unene ibot ejit n̄a ekijọjọ emi ejit me lek, ebi mmun̄be me chieen̄ ekekirọ ikeme emi.

²⁰Ukwuuk n̄a ìjeen̄ me lek akpa n̄a mè lek ufuk n̄a, ìsik sọnja mkpa môsakbe emi ibot.

²¹“Ìto emi nsan, jei ebi une n̄a, ìto emi nsan ma, mije, ubọk Awaji îtoon̄ emi me ijo ere.

²²Keke orọ enyi ekisisaak emi kubọk Awaji òkisisaak emi? Ìre saasaak enyi ekinyi akpalek n̄a ìkaso-nu enyi ni?

²³“Kè oneme emi ibe mîge ikọ n̄a isun̄, kè m̀ma ibe egwat etap me ikpa!

²⁴Jei, ibe mîsa uti ikpa okwukwut irọkọ me lek oporolo, mè irọkọ me lek ewuuk, inyi ikup ire mgbọ geelek!

²⁵Emi nriọọn̄ ibe ke Ogwu Òfaka emi Isibi òwa me ugwem, me òta kan̄, ọmọ môsibi ikeke me linyọn̄.

²⁶Akpa n̄a keyi isijijaka isan̄a, mâmun̄ Awaji me anam akpalek n̄a;

²⁷emi me lek n̄a mbamun̄ ọmọ, ìkare ofifi ene, mâsa chieen̄ n̄a imun̄ ọmọ. “Ejit n̄a îsisik,

²⁸mije enyi etumube ibe, ‘Eji ebejeje itutuku ọmọ, eyi ibot ikọ okupbe me lek kan̄?’

²⁹Enyi me lek kinyi, ìtet ukpook me lek oge akọn̄; mije, unaan̄-ejit ìbosa oge akọn̄ ininyi enyi osusut, eya ke enyi ebesa iriọọn̄ ibe ke oyerebet òwa.”