Read obolo Jobu 2 Bible Online

Jobu 2 - obolo bible

Jobu 2

¹Ofifi usen, ebi Osat Awaji enunu si inikeke me isi Okumugwem. Setan ogọgọọk ema inu si inikeke me isi Okumugwem.

²Okumugwem onenibe Setan, “Owu ònan̄a me owa?” Setan ofọfọọk Okumugwem ibe, “M̀gbugbugbaan̄ ikana me linyọn̄, mè ijijen̄e inyi isi mè udun̄, mè inan̄a ika inu.”

³Okumugwem obebe Setan, “Ìre omun̄ ubọk ogwu ikwaan̄ n̄a Jobu okupbe? Kpunu ene geege òbet lek kan̄ me linyọn̄. Ọmọ ìre ogwu ikarọge inu geege ìlọ, mè ogwu òtatat me ugwem, mè ikitet ukpook Awaji, mè isan̄a lek kan̄ me ijo inu. Ìkpọkpọ ikeke inye, ìkarọ inu geege ìlọ, ubọk geelek orọbe inyi emi ǹsulu ọmọ osusut me ikarọge inu geege ìlọ.”

⁴Setan ofọfọọk Okumugwem ibe, “Ekisa akpa inwene akpa! Ene môsa otutuuk inu îkaan̄be inwene ebek ugwem kan̄.

⁵Nyana-nu ubọk kwun̄ chak me lek ukwuuk kan̄ mè anam akpalek kan̄, mè kpọ-nu, mè ìre ìkpogbo owu me isi kwun̄ gaalek.”

⁶Okumugwem onenibe Setan, “Kpọ Jobu ire ogwa me ubọk kwun̄! Ire, kachak ubọk me lek ugwem kan̄.”

⁷Setan onanan̄a isibi me isi Okumugwem, mè isa ijo okporotu ukan̄ igwook ichit Jobu otutuuk lek, ibene me akajit ukot isi ire eden̄ ibot.

⁸Jobu osisiki ikweek irek me emen ntọn̄, mè imọnọ okpọkọ ugọn̄ isa ikikwa lek.

⁹Ogwu nwa onenitumu inyi ọmọ ibe, “Owu òwa si me lek irere ata ene kwun̄ ya? Gbo Awaji, mè kwu!”

¹⁰Jobu otutumu inyi ogwu nwa ibe, “Ikọ kwun̄ ìkup ebot ebot kubọk ikọ burubut ebibaan̄ ekitumu. Ìre ata inu gaalek ke ebekibọkọ me ubọk Awaji, ìre kpebekibọkọ ijo inu ni?” Me emen otutuuk inu chi geelek, Jobu ìkarọ ijo inu me otu usem.

¹¹Ebi unene ita kè Jobu, Elifaji ogwu Teman, mè Bilidadi ogwu Suwa, melek Sofari ogwu Nayama eneninọ otutuuk ufialek òtetet ogwu unene kiban̄. Ema egbagbaan̄ ichieek ibe ke ema mêsi ifieek ejit melek ogwu unene kiban̄, mè ikat ọmọ ejit, mè ininan̄a me ama kiban̄ ge ge isibi inu.

¹²Mgbọ ema ekupbe me ujọn̄ọ ere imun̄ Jobu, kpekọt iriọọn̄ ọmọ isi. Ema etataan̄ ukpo ito ito, mè igwak ofọnti inyọn̄ ema etapbe, mè ikpulu ntọn̄ itọp ifo inyọn̄ igwook me ibot kiban̄.

¹³Ema enenigọọk ọmọ ikweek irek me ijọn̄ egwe jaaba mè eririeen̄ jaaba. Ene geege ìkasan̄a amọn ìtumu ikọ geege ìnyi ọmọ, mije, ema mîmun̄ ibe ke ujaralek kan̄ îmin enenen.