Read obolo Jobu 20 Bible Online

Jobu 20 - obolo bible

Jobu 20

¹Sofari ogwu Nayama onenibọkọ otu ibe:

²Me atikọ, ekiket n̄a òkisisaak emi ibe emi m̀bọkọ otu, mije, ìkup emi me lek ifi ifi.

³Ikan̄-inu kwun̄ nnọbe ìre unyechieen̄ inyi emi, ekwukwu eyi ngobo-ntet n̄a orọ inyi m̀bọkọ otu.

⁴“Me atikọ, owu oriọọn̄ ibe, bene me ukot ikaan̄, akarake etobe ene me linyọn̄,

⁵ke unwọọn̄ ogwu ikpak ìkakikup ìfiin̄, ubelejit ogwu ikariọọn̄ge Awaji ìkire mgbidim.

⁶Ìrere ọmọ ìjọjọn̄ọ itet akpabin inyọn̄, ibot kan̄ ochachak me lek oduku inyọn̄,

⁷ọmọ ìbochechep ire mgbọ geelek, kubọk ifin kan̄ olak me ijọn̄; ebi ìwuwuuk lek imun̄ ọmọ mêkekido ibe, ‘Sà ọmọ ye?’

⁸Môwulu ichep kubọk mun̄umun̄ ilaak, kpebeyaka imun̄ ọmọ; môniniin̄ ichep kubọk ilaak ọkpọchieen̄ emun̄be me eririeen̄.

⁹Chieen̄ òmumun̄ ọmọ, ìkpoyaka imun̄ ọmọ ofifi, ebi ere ọmọ okiluk kpebeyaka irieen̄ ọmọ chieen̄ me lek.

¹⁰Bọn kan̄ mêyaka inu îbọkọbe ebi ugbọọn̄ inyi, ọmọ si môsa ubọk kan̄ ikpulu inu ubọọn̄ kan̄ iyaka inyi ebikaan̄.

¹¹Ukwuuk kan̄ cha unye osobe me lek kubọk ukwuuk nsabọn irieen̄, môgọọk ọmọ ilaak me emen achiaan̄.

¹²“Ubọk geelek ijo inu okinin̄i ọmọ me otu kubọk uchọk, ọmọ okekitap ijo inu me irak alọm kan̄ ilet ikaan̄;

¹³ubọk geelek îtetbe ikaan̄ me otu kan̄ ikinọ utop, mè ichit isun̄, ìkaweek ikwukwut ifiin̄;

¹⁴ire, inorie kan̄ ìbokana ujat me emen owot kan̄, mè okana iwot asawọ me emen kan̄.

¹⁵Ọmọ môgọkọ inu ubọọn̄ cha îmeen̄be; Awaji môrọ inyi ọmọ igbọ inu cha isibi me owot.

¹⁶Ọmọ môfip iwot asawọ imen, ijo ulu môtọtọk ọmọ ikpan̄.

¹⁷Ìkpoluk isoon̄ nnwọn inu òbokigbuk inu kubọk ibot mun̄, mè aran̄ akwọọk melek mun̄ ebe akakam òbokibaak inu kubọk okwaan̄.

¹⁸Môyaka inu îkwukwulube ikaan̄ igwook, ìkpore ọmọ otu, oruru îkaan̄be me lek ewe înyambe, ìkporie utop ònan̄a me lek.

¹⁹Mije, ọmọ îtutuku ebi ugbọọn̄, mè itọp ema ito; îtet uwu echi ikarege ọmọ onama ibọkọ me ubọk unye.

²⁰“Mije ọmọ orebe ogwu ebek, ìkakọt ìsun̄ inu ubọọn̄ îkaan̄be.

²¹Îrie, mè irie inọọn̄, inu geege ìkayaka ìsik, eya orọ, ata irek kan̄ ìkpokup ifiin̄.

²²Mgbọ ubọk kan̄ môjotbe ke ufialek kan̄ obomin, ukwook mônenikeme ọmọ ikpukpuku.

²³Mgbọ owot kan̄ isijot, Awaji mônenigbuku uyok uyok unaan̄-ejit kan̄ igwook ọmọ me lek, mè irọ ufialek ifan̄a ichit ọmọ kubọk ibot me lek inorie kan̄ ya.

²⁴Ire ọmọ ilibi inwọnọ nroon̄ akọn̄ okwukwut, oraan̄ ekwe otu mônin̄ ọmọ lek igwọt itibi.

²⁵Môtaba oraan̄ ya iwọọk isibi me udun̄ kan̄, otu oraan̄ ya òkimumumen môwọwọọk isibi me ejit kan̄, uga ukpook môtetet ọmọ.

²⁶Uga ekpuk udun ìkukup ikikpọ inu ubọọn̄ kan̄, ukan̄ ekasọsọkge môtaka ọmọ iriọk, mè itaka inu geelek òsisik me uwu kan̄ ikọọk.

²⁷Akpabin inyọn̄ môchili nrọ-nlọ kan̄ ibook; linyọn̄ mônan̄a ikeke ikeke ata-ikọ ikeme ọmọ.

²⁸Me usen unaan̄-ejit Awaji, agbugbuk môjibi uwu kan̄, ukot mun̄ môkwọkwọọk inu geelek îkaan̄be isa ije.

²⁹Eyiyi ore inu òkukup inyi ogwu ikpak inan̄a me ubọk Awaji, òrere ìrot eyi Awaji osun̄be inyi ọmọ.”