Read obolo Jobu 21 Bible Online

Jobu 21 - obolo bible

Jobu 21

¹Jobu onenibọkọ otu ibe:

²“Ìriọọn̄ ubọk ìgban̄ ikọ n̄a, eyi ore ukarajit enyi ebenyi emi.

³Ìnye lek ìnyi emi irek ǹtumu ikọ, nsitumu isan̄a, enyi mêkọt ikirọ emi ochak ifo isi.

⁴“Ìre ǹkinina lek inyi ogwu ebilene? Keke orọ ejit kponaan̄be emi?

⁵Ìraan̄ chieen̄ ìkpọ emi-nu, inyi ikwu enyi lek, mè ìsa ubọk ìchit otu kinyi.

⁶Nsikikeek, ukpook ìkitetet emi, otutuuk lek n̄a ìkiraran.

⁷Keke orọ ebi ikpak ekikup me ugwem, mè èkup èkan, mè inu òkojaan̄ me lek kiban̄?

⁸Ema mîkikup me ugwem imun̄ bọn kiban̄ emiin̄be isibi, mè ikeke inye melek kiban̄, ema mîkikup si me chieen̄ kiban̄ imun̄ bọn bọn kiban̄ ekimiin̄.

⁹Uwu kiban̄ ìkikup me utelelek, kpekikaan̄ ukpook; njijan̄ Awaji ìkakire ema lek.

¹⁰Orie eriembuuk kiban̄ kpekitoon̄ echi uman, mè òlọ, uman eriembuuk kiban̄ ekimaan̄ bọn, owot ìkakisibi.

¹¹Ebi ikpak ekiria bọn kiban̄ isibi ifit kubọk urum arọọn̄, mè asa nsabọn kiban̄ èkejop okwa ekana.

¹²Ebi ikpak ekikọt okwa ikwak ekpete mè uneen̄ ile ikpọ me lek, mè ikiwut òja isa ikibele ejit.

¹³Ema ekirerie ubọọn̄ otutuuk usen ugwem kiban̄, mè èkwaan̄ mkpa esuuk esuuk efon ama ekwukwu.

¹⁴Ire, îre ema ekitumu inyi Awaji ibe, ‘Je nan̄a eji me lek! Eji kpeweek irọriọọn̄ oniin̄ kwun̄.

¹⁵Ogwu Òkaan̄ Unye Geelek ìre ekene, eyi eji ebenikitọbọ ebum inyi? Kpasi oruru okup me lek irariaak uriaak inyi ọmọ?’

¹⁶Ire, inu òkije ijaan̄ inyi ebi ikpak ìkare me unye kiban̄, eya orọ, emi ǹkije ǹsọn ǹsọn me lek nteme kiban̄.

¹⁷“Ire, ìre mgbọ inen ire eya ebi ikpak ekwaan̄be mkpa ugeen̄ mgbọ kubọk eniin̄ mkpukan̄? Sà ìre mgbọ inen ire eya ùrioon̄ otoon̄be ema? Mgbọ inen ire eya ufialek unaan̄-ejit Awaji okemebe ema?

¹⁸Mgbọ inen ire eya mkpa obenbe ema jîp kubọk efet oben nchat uti akpa; kubọk unye efet egwijo oben mfufe akpa?

¹⁹Ekibe, ‘Awaji ìkititiin̄ osusut ogwu ikpak isun̄ iban ebi bọn.’ Kè Awaji ikpe ogwu ikpak ya me lek kan̄ mkpukpe, inyi inọ me lek!

²⁰Kè ọmọ isa chieen̄ kan̄ imun̄ osusut kan̄; kè ọmọ inwọ unaan̄-ejit Ogwu Òkaan̄ Unye Geelek.

²¹Keke ogbaan̄ ọmọ me lek ofolek ototun̄ ukan̄ kan̄ îkwube itele mgbọ otu ifuk onyan̄ esun̄be inyi ọmọ isita?

²²“Ìre ene môkọt inyi Awaji ifuk-ibot, eyi ọmọ orebe ogwu òkisibi oyerebet inyi otutuuk ene, ikerere ogwu òbebene ichit?

²³Ene ge oluk me utelelek mè esuuk, mè inye lek kwok kwok mege ire usen îkwube;

²⁴akpalek kan̄ ìkup ufuk ufuk, ufuk emen ukwuuk kan̄ ìkup nsek nsek.

²⁵Sà ofifi ene oluk tukutuku ugwem ikwu me ujaralek, ìkarie utop otu geege otutuuk usen ugwem kan̄.

²⁶Ema ene iba egbagbaan̄ inin̄ emen achiaan̄, mkput okakana ema ichit bùk.

²⁷“Ìkpọ, nriọọn̄ ejit kinyi ijaan̄ lek, mè iriọọn̄ si ijo nkeek enyi ebesa irọ emi ikan̄.

²⁸Mije, enyi ebe, ‘Mọmọ uwu ogwu ilile ya? Sà mọmọ uwu ọfọ ya, ere ebi ikpak elukbe?’

²⁹Ìre enyi kpedodo ebi ije? Sà ìre enyi kpetet inu ema ekabe inikpa ibe,

³⁰ke usen ùrioon̄ isinu, ke îre ogwu ijo ene okinwọnọ; me usen unaan̄-ejit Awaji, ke îre ọmọ ke ekinyan̄a isibi?

³¹Ekene okikup me isi ogwu ijo ene itumu ijo inu ene ya orọbe isibi? Sà ìre ekene okinyi ogwu ijo ene osusut me lek ijo inu îrọbe?

³²Isiben ogwu ijo ene ifo udọn̄-ufuun̄, ekikekeke ikikpọ udọn̄-ufuun̄ kan̄;

³³otutuuk ene ekigbugbuku igọọk me udun̄, urum ene ebi kperiọọn̄ otu ifuk mîra ikije me isi; okpukpuk achiaan̄ emen iteke ya òchichit ọmọ me emen udọn̄ ìkitotop ọmọ me lek.

³⁴“Ìtumu-nu, ìre enyi ebejeje isa mbubut ikọ ikat emi ejit? Otutuuk ufọọk-otu kinyi ìre ofiaan̄ ofiaan̄ gaalek.”