Read obolo Jobu 22 Bible Online

Jobu 22 - obolo bible

Jobu 22

¹Elifaji ogwu Teman onenibọkọ otu ibe:

²“Ìre ogwu ebilene mônin̄ Awaji oruru? Ìre ogwu òriọọn̄ inu môsibi oruru inyi ọmọ ni?

³Ire owu ore ogwu ata irọrọ, ìre kpasi ubelejit ke eya obonyi Ogwu Òkaan̄ Unye Geelek? Ire owu ore ogwu ǹkalọ, ìre kpasi oruru ke eya obonin̄ inyi ọmọ?

⁴“Ìre bak me lek okitet ukpook me lek kan̄ ke îkikan̄ inu inyi owu, mè igwen ikọ itoon̄ owu me ibot?

⁵Ìre ijo inu kwun̄ ìkafat ìwa ìgana? Ìre ijo irọrọ kwun̄ îkaan̄ okputut?

⁶Owu ogen ibak ifum inu ngwan̄ kwun̄ me lek urieek, mè itet ebi ene ekwut ibọkọ, mè isun̄ ema njak.

⁷Owu ojit inyinyi ebi lek owọbe mudim enwọ, mè itet inorie ikaan̄ ibe ebi uraafiọọn̄ ekarie.

⁸Ogwu unye okaan̄ ijọn̄, sà ogwu egobobe isi okiluk me lek ijọn̄ ya.

⁹Owu orieen̄ ebi nwakpa isibi ukpọk ubọk, mè itutuku ebi kpà-nte.

¹⁰Eya orọ ufe okanabe owu okokop, ọmọ orọ si uga ukpook otetbe owu me uwuuk lek,

¹¹mè itap udun, inyi owu okamọọn̄ inu, mè isa mun̄ ile inimeen̄ owu igen.

¹²“Ìre Awaji ìkabene ìchep me akpabin inyọn̄? Kpọ ubọk ntoronyan̄ echi òbebene ichit cha obenebe ire!

¹³Ire, owu okekibe, ‘Awaji ìriọọn̄ keke? Ìre ìbokup me emen ekpuk udun òchichit ọmọ isan̄a me chieen̄ ene ikisibi oyerebet ni?

¹⁴Oduku inyọn̄ òdudun îkwek ọmọ isi, ìkpomọọn̄ ere, ọmọ ìkije ikana me lek okwuun̄ isinyọn̄.’

¹⁵Ìre owu môje me oka oniin̄ yaage ebi ikpak ejebe ni?

¹⁶Ema mîkwaan̄ sabum mgbọ mkpa kiban̄, mkpa ìkpulu ema ije kubọk agbugbuk orọkọ uwu me ebon ito.

¹⁷Ema ekitumu inyi Awaji ibe, ‘Nan̄a eji me lek! Ogwu Òkaan̄ Unye Geelek ìbokọt irọ eji keke?’

¹⁸“Ire, îre Awaji otap ata inu geelek ijot uwu kiban̄; eya orọ, emi ǹkije ǹsọn ǹsọn me lek nteme kiban̄.

¹⁹Ebi ata irọrọ mîmun̄ ùrioon̄ òkekeme ebi ikpak, mè ikibele ejit, ogwu ǹkalọ okekichak ema ochak, mè ikibe:

²⁰‘Me atikọ, mîjijaka ebi oriara kiji isan̄a kpai, ukan̄ îtaka inu ubọọn̄ kiban̄ òsisik iriọk.’

²¹“Jobu, gọọk Awaji nen̄e sun̄, inyi owu òkup me esuuk melek kan̄; ire orọ ikeya, inu môje ijaan̄ owu me lek.

²²Bọkọ nteme otu kan̄ tap, mè sun̄ ikọ kan̄ me ejit kwun̄.

²³Ire ogwu ikom inu me lek Ogwu Òkaan̄ Unye Geelek, ọmọ môtap ichit inyi owu; ire osan̄a ijo inu isan̄a me uwu kwun̄,

²⁴mè imọnọ alata araran̄ kubọk ke ìre achiaan̄, mè imọnọ atalek alata araran̄ ònan̄a me Ofiri kubọk ke ìre bọn ewuuk eden̄ okolo,

²⁵Ogwu Òkaan̄ Unye Geelek mônenire alata araran̄ kwun̄, mè ire si alata okuket eyi atata inyi owu.

²⁶Inu Ogwu Òkaan̄ Unye Geelek mônenikitop owu me lek, owu mônenikikọt ibene isi ikikpọ Awaji.

²⁷Mgbọ ya, osibeek ọmọ mbeek, ọmọ mônọ mbeek kwun̄, owu mônenirọ inyan̄a-ibot onyan̄abe inyi ọmọ iso.

²⁸Inu geelek otumube ifieek, eberọrọ, oniin̄ kwun̄ geelek ìbokitotoon̄.

²⁹Ebi ofifi ene isinan̄a irọn̄, owu môbebe ke îre mije ugumu, mije, Awaji ìkinyan̄a ebi ìsisiki lek.

³⁰Mônyan̄a ogwu ikarege ogwu ǹkalọ, ìbonyan̄a ọmọ sa me ubọk kwun̄ òtatana.”