Read obolo Jobu 23 Bible Online

Jobu 23 - obolo bible

Jobu 23

¹Jobu onenibọkọ otu ibe:

²“Ikerere chereyi, nana-lek n̄a ìre ujat ujat; ǹsasa ubọk n̄a ikeme nana-lek n̄a ikaan̄.

³Jei, mebe nriọọn̄ ere mbaweek Awaji imun̄, kè ǹsi ere îkikup!

⁴Kè mkpa ikọ n̄a m̀wele me isi kan̄, mè ntumu ikọ ǹtọn̄ọ lek n̄a.

⁵Kè nriọọn̄ inu ìbofọọk emi, mè ngobo inu ìbotumu inyi emi ǹtet.

⁶Ìre Awaji môsa otutuuk unye kan̄ igbini ikọ melek n̄a ni? In̄-in̄, ìkporọ, môgban̄ ikọ mâtumube.

⁷Me ere ya, ogwu ata ene môkọt ikpa ikọ kan̄ iwele melek kan̄, Awaji ogwu òkisibi oyerebet n̄a mônwọn emi ikọ ire mgbọ geelek.

⁸“Ire, ire nsi me agan̄ mbum-ura, ọmọ kpunu me ere keya, ire nsi me agan̄ ichep-ura, m̀kpamun̄ si ọmọ.

⁹Mgbọ îkirọ ikwaan̄ me agan̄ inyọn̄, ǹkakimun̄ ọmọ; isikana inyi agan̄ osiki, ǹkakirieen̄ ọmọ chieen̄ me lek.

¹⁰Ire, ọmọ îriọọn̄ oniin̄ nkije; isiroon̄ emi ikpọ, mâkitoon̄ kubọk alata araran̄.

¹¹Ǹkito ukot n̄a me akpat ukot kan̄, oniin̄ kan̄ ke nkije, ǹkagwaka ìtele.

¹²Ǹkatele isusun̄ ikan îsabe otu kan̄ itap; mben ikọ otu kan̄ me ejit igak inorie nkirie usen geelek.

¹³“Ire, ọmọ ìkeke ọkpọkpọ, ekene obokọt inwene ọmọ ejit? Inu òkup me ejit kan̄ ke îkirọ.

¹⁴Môrọ inu îdọmọbe ibak emi iso; ntọt kecha îtọtbe iban emi, îkaan̄ si ojelek kan̄ owuwa owuwa.

¹⁵Eya orọ ukpook okitet emi me isi kan̄; nsikikeek inu yi, ukpook kan̄ îra ikitet emi.

¹⁶Awaji îrọ emi ǹkana ogwu ukpook owot, Ogwu Òkaan̄ Unye Geelek îtap emi ukpook me lek.

¹⁷Ire, udun ìkachit emi otu nu, ọmọ îchit ekpuk udun isan̄a emi me isi.