Read obolo Jobu 24 Bible Online

Jobu 24 - obolo bible

Jobu 24

¹“Keke orọ Ogwu Òkaan̄ Unye Geelek ìkasun̄ mgbọ oyerebet ìnyi ebi ikpak? Keke orọ ebi ìchechieek me lek kan̄ kpebemun̄ usen oyerebet kan̄ kecha?

²Ebi ikpak mîjujuk ewuuk okike ijọn̄; ema mîchichim urum arọọn̄, mè ikikpukpo ikana eyi kiban̄.

³Ema ekitaba inyinya akpan ogwu kpà-nte isa ije, mè ifum eriembuuk ogwu nwakpa me lek urieek îkaan̄be ema.

⁴Ema ekisa lek lek ida ebi una isan̄a me lek oniin̄, mè ikisa unye irieen̄ otutuuk ebi ugbọọn̄ me linyọn̄, inyi esi elet lek kiban̄.

⁵Eya orọ, ebi ugbọọn̄ ekisisaan̄ ikana ere ikirọọn̄ inorie, kubọk inyinya akpan oron okirọ me emen èwê; emen èwê ke ema ekirọọn̄ inorie inyi bọn kiban̄.

⁶Ema ekisi ititen̄e inu geelek ebikaan̄ uko ekpulube isik, mè ikisi irọọn̄ gerep me uko gerep ebi ikpak.

⁷Mije una ekwut, ema ekikup njak me eririeen̄; kpekaan̄ ekwut geege esabe ikikwek utọọk me lek kiban̄.

⁸Ibot lek ogoon̄ ìkidedek ema lek isan̄a, ema ekikana ewuuk ikat igọm, mije kpunube ere ema ekikwek lek.

⁹Ebi ikpak ekisik gwun̄ kpà-nte isan̄a me otu ebe ogwu uga; ema ekifum gwun̄ ogwu ugbọọn̄ me lek urieek.

¹⁰Ebi ugbọọn̄ ekije njak njak ikana, mije, kpekaan̄ ekwut, mè ikisa ukpọk owot ibeme akpa me uko inyi ebi ubọọn̄.

¹¹Ema ekikup me etete mgban kiban̄ ichimi aran̄ olifu; ema ekijak gerep isan̄a miin̄, ire, mè ikirak ebek.

¹²Me emen ama ile, ebi ìkikwakwaan̄ mêkito mfi, ebi unan osakbe mêkitaan̄ ukpo ibeek ntap-ubọk. Ire, Awaji ìkagana ere ìnyi ene geege ebi ìkirọ inu cha.

¹³Îkaan̄ ebi kpema utoon̄ egwe, kperiọọn̄ oniin̄ eyi utoon̄, kpekimama si ikukup me oniin̄ utoon̄ okupbe.

¹⁴Egwe isifit, ogwu òkpan̄ ene îra inan̄a ikeke, mè òsi òkpan̄ ebi ugbọọn̄ mè ebi una; isire eririeen̄, îra isibi isi ichiin̄ inọ.

¹⁵Chieen̄ ogwu ugan-nwa ìkigwọk ikpọ udun ikakwun̄; mgbọ ya ke îkilileek isi kan̄, mè ikibe, ‘Ene geege ìkpomun̄ emi.’

¹⁶Ebi inọ ekibum uwu ene me irak udun, isire ikarek, ema mîra ichit me uwu kiban̄; utoon̄ ikarek ìkakire inu geege me lek kiban̄.

¹⁷Ekpuk udun ìre ikarek me lek kiban̄ otutuuk, ukpook udun ìkakitet ema kubọk ge.

¹⁸“Ire, ema ekup kubọk awo me inyọn̄ isi mun̄, ikafiat mgbọ, mîniniin̄ ita; Awaji îfieek otu inyi ijọn̄ kiban̄, eya orọ, kpunu ogwu òkisi irọ ikwaan̄ me uko gerep kiban̄.

¹⁹Ike uyok ura melek una ibot ekilaka mbat irak, ikeya si ke ama ekwukwu okikpulu ebi ìrọ ijo inu imeen̄.

²⁰Owot òman ogwu ikpak môwuuk ọmọ, ìkpoyaka ikpọk ikeek ọmọ ofifi; ebi kè mkput mêtaka ọmọ inọ utop, mêtaka ọmọ ikpukpuku kubọk uti echobe ito.

²¹Mije, ọmọ ìkitutuku ogwu ora ikakaan̄ge gwun̄, ìkakaan̄ ata ejit me lek nwakpa.

²²Ire, Awaji ìkisa unye kan̄ idut ebi unye isan̄a; ema ikebebene lek, kpunu ikpọchieen̄ ibe ke ema mêgat ugwem.

²³Awaji môkọt inyi ema utelelek, ema mêkekeek ibe ke ema mînwọnọ; ire, chieen̄ kan̄ ìkakinan̄a me akpat ukot ije kiban̄ geege.

²⁴Ema mêtaan̄ etip sọntitiik mgbọ, mè ininiin̄ ichep, ema mêchiaak, mè igen̄ igwook kubọk ajakajak, mêfefieek ema isan̄a kubọk ekifieek akpa.

²⁵“Ire ìkare ikeya, ìre ekene obokọt ijeen̄ ibe ke emi ìre ogwu ataak, mè ijeen̄ ibe ke ikọ n̄a ìkare atikọ?”