Read obolo Jobu 26 Bible Online

Jobu 26 - obolo bible

Jobu 26

¹Jobu onenibọkọ otu ibe:

²“Jei, owu otap ubọk inyi ogwu ikakaan̄ge unye onọ! Unyan̄a onyan̄abe ogwu ubọk ikanyege ìkare sọntiik!

³Jei, owu onyi ogwu una iriọọn̄-inu nteme onọ! Atalek ikpele ifuk-ibot ire eya owu ojeen̄be!

⁴Ìre ekene otap ubọk inyi owu mè òtumu ikọ chi? Sà ìre ekene otumu itap owu me otu?

⁵“Ebi ìkwukwu ekup me uga ujaralek, ebi ìkup me irak mun̄, mè inu geelek òkup me emen mun̄ ekup me ujaralek.

⁶Ama ekwukwu ìkup njak me chieen̄ Awaji, ere mfufiat ya ìkakaan̄ okwukwek.

⁷Awaji otaba isinyọn̄ agan̄ inyọn̄ inyana me inyọn̄ ofok akpabin inyọn̄, mè isun̄ linyọn̄ ikididen̄, ìkajeen̄ me lek inu geege.

⁸Ọmọ osa oduku inyọn̄ kan̄ ikat ibot isun̄, ire, ulobo ibot cha ìkakọt ìrama oduku inyọn̄ cha ìbak.

⁹Ìchichit isi ikasi ubọọn̄ kan̄,[5] mè ikisa oduku inyọn̄ kan̄ iwele ikwek.

¹⁰Îsa okwuun̄ inyọn̄ itap iman̄ ikana isi mun̄ okokop, mè isa itap oke me etete utoon̄ melek udun.

¹¹Awaji îrama ogoon̄ cha òkibeme isinyọn̄ kubọk atà, ukpook otetet ema, ema ekekiran.

¹²Îsa unye kan̄ isuuk okwaan̄, mè isa iriọọn̄-inu kan̄ itọbọ Rayabu, mgbugbo anam ejit okwaan̄ ya, ikpukpuku.

¹³Îre efuuk kan̄ owut inyọn̄ itoon̄, ubọk kan̄ ochichim ijijinu ya òkije nèèn̄ ikpan̄.

¹⁴Otutuuk kechi ìre echi asasa me lek ikwaan̄ îrọbe; otutuuk ikọ cha eji ekinọ ofolek inu îkirọ ìre gaalek nweenween̄ ikọ! Achubọk unye kan̄ ya ònye kubọk nsook-isinyọn̄, ekene obokọt igobo itet?”