Read obolo Jobu 27 Bible Online

Jobu 27 - obolo bible

Jobu 27

¹Jobu okekitumu ikọ kan̄ ifo isi ibe:

²“Kè lek ugwem Awaji ogwu òjijit emi unen oyerebet; kè lek Ogwu Òkaan̄ Unye Geelek ogwu òrọrọ ibot ejit n̄a imun̄ ujat,

³otutuuk mgbọ nkifuuk efuuk ugwem, otutuuk mgbọ efuuk Awaji okupbe me inwọm n̄a,

⁴otu n̄a ìkabotumu ijo ikọ, ikọ ofiaan̄ ìkabonan̄a me otu alọm n̄a isibi.

⁵Emi ǹkabachechieek mgbọ geege ibe ke ikọ kinyi înen; mege ǹkwu, ǹkabatele itutumu ibe ke emi ǹkalọ.

⁶M̀batetet ata irọrọ n̄a inye, m̀kpatetele ubọk me lek; ejit n̄a ìkpofieek emi ikọ geege mege ǹkwu.

⁷“Kè ogwu ochicha n̄a ibọkọ osusut kubọk ogwu ikpak, mè ogwu òkirọ ikeme emi ibọkọ osusut kubọk ogwu ijo irọrọ!

⁸Kpasi ikpọchieen̄ ke ogwu ikariọọn̄ge Awaji oyaka ikaan̄ mgbọ Awaji isifieek ọmọ ifiin̄, mgbọ Awaji isisan̄a ugwem kan̄ isan̄a?

⁹Ìre Awaji mônọ ida ukpo kan̄ mgbọ ufialek otetbe ọmọ ni?

¹⁰Ìre inu Ogwu Òkaan̄ Unye Geelek môtop ọmọ me lek ni? Sà ìre ọmọ môkigwen Awaji mgbọ geelek ni?

¹¹“Mâjeen̄ enyi inu ofolek unye Awaji, emi m̀kpalet inu Ogwu Òkaan̄ Unye Geelek odọmọbe isun̄ me ejit kan̄.

¹²Enyi otutuuk ene mîsa chieen̄ kinyi imun̄. Ire, keke orọ enyi ekitumu ikọ kpunube ibot me lek?

¹³“Inu Awaji osun̄be iban ogwu ikpak, mè ìrot ogwu òkitutuku ene okikaan̄ me ubọk Ogwu Òkaan̄ Unye Geelek ìre ikeyi:

¹⁴Ike geelek bọn kan̄ ewabe ire, mênin̄ isan̄a me otu oge akọn̄, bọn kan̄ kpebemun̄ inorie irie ijot owot.

¹⁵Ọmọ isikwu inan̄a, bọn kan̄ ebi ìsisik me udun̄ kan̄ ebekwakwaan̄ mkpa, ebi nwakpa kiban̄ kpebeto ito mkpa kiban̄.

¹⁶Ikerere ibe ọmọ ìtititiin̄ alata okuket isun̄ me èdọ kubọk achiaan̄, mè ikaan̄ ekwut itutọmọ ijot ere kubọk ntitaak,

¹⁷ekwut cha îtitiin̄be isun̄, ogwu ata irọrọ obonikwun, alata okuket kan̄ cha, ebi ekalọge inu geege ebenikpulu iche inyi lek kiban̄.

¹⁸Uwu ogwu ikpak onamabe ìbet lek uwu olọnjin, mè atanga ogwu òban egwe onamabe, ìkpofuk.

¹⁹Ọmọ môsiki ilaak kubọk ogwu ubọọn̄, ire, ìkpoyaka ire ikeya ofifi; isibolo chieen̄, inu kan̄ cha ìbotata isan̄a kpai.

²⁰Uga ukpook mônu ọmọ me uwuuk lek kubọk mun̄ ile, egwijo eririeen̄ môsik ọmọ isa ije.

²¹Efet agan̄ mbum-ura môben ọmọ isan̄a, ọmọ môkwukwu ifo; ìbokwọkọ ọmọ isan̄a isibi me uwu kan̄.

²²Efet ya môbieen̄ ọmọ ijo ijo, ìkpokaan̄ ọmọ nsan me lek, ọmọ ìbolibi njak njak iweek inwọnwọnọ me ubọk efet ya.

²³Ìbobet lek efet ya ìkikwakwak ubọk igọọk ọmọ ikirọ ọmọ ochak, mè ikikput, mè ikinunuun̄ ikirieen̄ ọmọ isibi me uwu kan̄.